LNG Beacu Muda Ba  Natarbora

LNG Beacu Muda Ba  Natarbora

- in Nasional
49
0
Fabião de Oliveira

DILI-Planta Liquefied Natural Gas (LNG) iha Beacu  sei muda ba Natarbora (Manatuto red), tanba mosu dezentendimentu entre Xefe Negosiador ba Delimitasaun Fronteira Maritima ho populasaun Beacu kona ba indiminizasaun.

Dehan deputadu bankada FRETILIN Fabião de Oliveira, ba jornalista sira, iha Parlamentu Nasional,Dili, Kinta (05/12/2019).

Nia dehan, xefe negosiador  halo ona negosiasaun ho populasaun Beacu, atu hodi halo planta LNG iha neeba. Maibe realidade akontese fali katak sei muda mai Natarbora, Munisipiu Manatuto.

Hau mos rona katak, planta LNG  la akontese iha Beacu, maibe sei muda fali mai iha Natarbora, tanba dezentendimentu entre xefe negosiador ho ita nia populasaun kona ba indiminizasaun ka ganti rugi ida nee mak boot, tanba rai neeba populasaun sira hela kleur ona, katak nia.

Nia dehan, mosu dezentendimentu tanba governu hakarak muda populasaun sira ba hela foho, maibe  bee mos laiha. Nunee populasaun deside hela nafatin iha Beacu.

Husi fiskalizasaun komisaun E nian ba hare iha neeba problema aas liliu  bee mos ladun diak,tanba nee populasaun Beacu  hela nafatin iha sira nia fatin, hatete deputadu Fabião.

Deputadu nee haktuir tan katak, material sira neebe Timor GAP ka AMP tau iha neeba, sei muda fila fali mai hotu iha Natarbora. Maibe muda mai Natarbora mos sei halo negosiasaun ho populasaun Natarbora, atu konkorda ka lae depende ba xefe negosiador ho populasaun Natarbora sira.

Nunee mos Vise Parlamentu Nasional, Maria Angelina Saramento dehan, tuir notisia neebe akompana iha midia bainhira halo negosiasaun kona ba libertasaun rai atu bele uja ba planta LNG nian iha Natarbora.

Ita akonpana populasaun Natarbora barak  entiziamu tebes atu fo sira nia rai gratuitamente ba estadu, hodi bele halo dezemvolvimentu ekonomia no dezenvolvimentu setor petroliferu iha area Natarbora, katak nia.

 Nia hatutan, maibe planta LNG neebe nuda ba iha natarbora, Parlamentu Nasional seidauk iha informasaun klaru, tanba nee seidauk bele pronunsia iha nee, maibe bainhira iha oportunidade atu halo audensia ho governu tanba saida mak iha mudansa.

Alende nee mos Jornalista STL koko halo konfirmasaun ho Empreza Timor Gap, liu husi lina Telefone maibe laiha resposta.

Dada Kadoras Lafasil

Iha biban nee mos deputadu Fabião duvida atu dada kadoras mai Timor leste, tanba  dada kadoras laos buat neebe fasil.

” Hau sei duvida hela, tanba atu dada kadoras Greater Sun Rise nee laos buat ida neebe fasil no laos buat ida neebe atu akontese ona iha tinan ida ka tinan rua  mai,”   dehan deputadu nee ba jornalista sira,iha PN, Dili, Kinta ( 05/12/2019).

 Tanba atu dada kadoras tuir nia katak, presiza estudu ida too tinan tolu no atu halo explorasaun presiza tinan lima, nee  esperensia iha Bayu Undan hanesan nee.

“Estudu biabilidade para atu hatene, ita nia riku soi iha laran,” katak nia

Nia dehan,explorasaun husi kompania deit mos lori tinan lima iha 2007 foin mak konsege osan tama ba iha kofer estadu husi fundu minarai nian, apalagi ida bayu undan nian neebe hanesan buat ida sei tomak los.

“ Ita la hatene gas iha mina nee iha ka lae nee lori prosesu naruk laos buat ida fasil,  depois semak atu halo explorasaun no osan mai husi neebe nee tenke halo instimasaun hotu, ita nia rekursu humanus too ka lae i osan iha ka lae, karik osan foti husi fundu mina rai mak halo investimentu, entaun lakleur osan mohu,” dehan nia.

Deputadu nee afirma tan katak, explorasaun seidauk tama, tinan 2022 osan laiha ona tanba kontratu ba bayu undan hotu ona, entaun reseitas sei la tama mak depende hotu mai husi Griter Saun rais nee bainhira los, tanba kriteria  laos fasil ohin koalia aban dada mai ona nee lae.

Nia dehan, durante nee governu seidauk halo estudu ida, maibe tenke halo estudu biabilidade profunda ida para hatene mina nia kedalaman nia perfunidade hira, nomos plataforma atu harii husi kompania ida neebe, kompania internasional ka Timor GAP.

“ Hau ladun iha konfiansa katak kadores husi Greater Sun Rise atu dada mai iha tempu besik aban ka bain rua, nee inposibel tanba presiza tempu naruk, maski ita hotu hakarak kadoras atu mai maibe laos atu agora sei iha tempu naruk,” katak nia.

Iha fatin seluk Kordenador Lao Hamutuk(LH) Celestino Gusmao dehan, nivel gastu despeza hanesan nafatin ho orsamentu estadu 2020 mak Fundu Petroliferus nee sei mamuk iha 2027 ka tinan ualu oin mai.

“ karik ita nia nivel gastu despeza hanesan nafatin ho orsamentu estadu 2020, mak ita nia fundu petroliferus nee sei mamuk iha 2027 ka tinan ualu oin,,” dehan nia.

Nia dehan, agora iha diskusaun barak dehan bainhira osan husi Fundu Petroliferus mamuk, enatun  osan atu mai tan husi neebe. No  husi Governu dehan osan sei mai husi Greater Sun Rise neebe mak governu promete atu halo produsaun iha 2026.

Nunee mos Vise Parlamentu Nasional, Maria Angelina Saramento dehan,suplai neebe planeia ona atu halao ka establese iha Beacu depois mai Betanu no Covalima.

“Hau hanoin empreza Timor GAP nudar entendimentu estadu nian atu halo investimentu iha setor Petroliferu iha rai maran, sira aprezenta dala hira ona planu sobre investimentu dada kadoras mai rai maran hahu husi Beacu mai too Covalima oinsa prosesumentu ikus ba saham nian,” dehan nia.

Nia dehan, teknikamente karik Timor GAP halo ona estudus Viabilidade kona ba oportunidade sira saida mak sei bele hetan bainhira halo investimentu rai maran nian dada kadores mai iha Beacu.

Karik Governu haree katak nee la biavel no la fo oportunidade atu hetan profit ida neebe diak, entaun ida nee maka estadu muda nia estratezia, maibe too agora ba mudansa Parlamentu Nasional seidauk hetan informasaun kona ba ida nee.  ESTI 03

Komentariu

Facebook Comments

Leave a Reply

Your email address will not be published. Required fields are marked *