Lider TL Banati  Jokowi-Prabowo

Lider TL Banati  Jokowi-Prabowo

- in Notisias Online
50
0
timor-leste-780x405

DILI-Embaixador Indonezia ba Timor Leste Sahat Sitorus preokupa  ho situasaun politika iha rai laran no husu, atu banati tuir ezemplu Prezidente Republika Joko Widodo ho Prabowo Subianto.

Nia dehan, haree ba politika iha Timor Leste nee nasaun demokratiku tebes, agora tama ona ba V lejislatura lider sira oinsa buka dezenvolve nasaun no povu,  laos ba partidu.

Sahat haktuir katak, partidu bainhira sae, importansia  tenke ba povu laos ba partidu. Dalaruma iha kestaun laintende malu oituan, maibe nee sei iha dalan, atu nunee bele buka dalan ba dezenvolvimentu.

Kona ba impase politika neebe mak lao hela iha rai laran, ida nee hau No Comment. Maibe atu solusiona , dalan diak mak mak lider sira buka malu, hau fo ezemplu hanesan iha Indonezia tempu kampana Jokowi  ho Prabowo la intende malu, maibe depois de prosesu nee lao rona rezultadu sira diak malu, no buat hotu lao normal, hatete Sahat Sitorus ba STL, iha Timor Plaza, Dili, Kinta (05/12/2019).

Nia afirma tan katak, nusa mak ezemplu ida nee labele halao iha Timor Leste. Tuir nia Timor mos bele bainhira  koko ida nee, tanba nee lideransa  nasaun sira, inklui mos partidu sira neebe iha Parlamentu atu hamutuk hodi bele solusiona ba impase neebe mak iha.

          Timor tuir Sahat katak, mezmu nasaun kiik maibe nia demokrasia nee hanesan ho nasaun boot sira seluk hanesan Amerika, India, Indonesia, neebe secara demokratiku nee kapas tebes.

Iha parte seluk deputadu bankada PD Adriano do Nascimento hatete, Timor Leste nia jornada politika pasada nakonu ho diverjensia no polemika politika entre lider politika sira, nunee hamonu povu no nasaun iha impase politika neebe naruk no klean. Tanba nee mak kredibilidade lider no lideransa nasaun nian sai foer no folin laek iha povu Timor-Leste no komunidade internasional nia oin.

Deputadu nee haktuir tan katak, iha momentu neebe atu debate OJE,  nia tatoli  ho orgullu pesoal no fo korajen nafatin ba Primeiru Ministru Taur Matan Ruak no Prezidente Republika Francisco Guterres Lu Olo, neebe hakaas aan nafatin hodi tau interese estadu aas liu interese ema ida-idak nian.

De faktu prosesu governasaun nasaun iha lideransa PM Taur no PR Lu Olo, todan atu tane no susar atu hakat liu obstakulu  politiku neebe kruil no intoleransia  iha nia natureza, tenik Adriano.

Nia dehan, atu justifika konkluzaun nee nia hatuur aktus politiku 3 hodi fundamenta, hanesan lider politika sira falla haketak interese nasional no interese partidaria  tanba nee huus atu PM buka dalan oinsa hamutuk ho PR bele hakotu impase.

Entretantu deputadu bankada PLP Sabino Guntur hatete, problema membru governu laintende malu ikus halo proposta OJE 2020 retira, nee diferensa konseptu normal, parte orgaun soberanu hanesan governu prepera OJE sai proposta lori mai PN no PN mos tenke haree.

Nia hatete, PN iha kompetensia atu haree materia sira nee, liu-liu koalia kona ba regras orsamentu atu bele koloka tuir nia tempu maibe nee lasignifika katak AMP lasolidu.

AMP nia interese oinsa mak salva guarda OJE atu bele dignifika prosesu dezenvolvimentu selae gasta deit osan, se objetivu laklru nee problema boot,nia hatete.

Deputadu nee afirma tan katak,nasaun nee harii estabelese iha pensamentu neebe diferente, liu-liu vizaun ba prosesu dezenvolvimentu, tanba nee mak haksesuk malu, ho sentidu atu konsolida konseptu sira nee para lori dezenvolvimentu ba oin. Tanba nee labele nafatin lori metode tuan sira mai,  agora AMP halo mudansa tanba haree saida mak ladiak koalia atu hadia. Guilhermina Franco

Komentariu

Facebook Comments

Leave a Reply

Your email address will not be published. Required fields are marked *