Lere: “Xanana Terus Liu Ami”

Lere: “Xanana Terus Liu Ami”

- in Notisias Online
146
0
Lere1

Editora : Carme Ximenes

DILI– Xefe Estadu Maior Jeneral F- FDTL Major Jeneral Lere Anan hatete, Kay Rala Xanana Gusmão terus liu gerrileiru sira seluk, tanba hetan torturasaun husi forsa Indonezia, durante iha kadeia.

Dehan Lere ba jornalista sira, bainhira remata enkontru ho Prezidente Republika Francisco Guterres Lú Olo, iha Palasiu Prezidente Nicolau Lobato, Bairru Pite, Dili, Kuarta (12/2/2020).

Hau 24 iha ai laran, lahanesan hau nia maluk sira seluk, ami terus iha ai laran, maibe Xanana terus liu ami, nee mak hau dehan hau nia prinsipiu tesi hau nia ulun lori ba vila, hau lori moris ida nee hau lakoi, tanba hau nudar ema, hau nudar defensor direitu ida, o ba halimar fali halo buat hotu tuir o nia hakarak, ida nee hau lakoi, entaun hau bele dehan , hau nia Maun Xanana terus liu ami, hatete Jeneral Lere.

Jeneral Fitun Rua nee realsa tan katak, nia triste bainhira  Xanana deklara foin lalais iha midia katak,durante partisipasaun minimu iha luta libertasaun.

Hau triste bainhira rona katak, nia dehan, partisipasaun luta libertasaun nasional nee minimu, dehan Jeneral fitun rua nee.

Jeneral Lere mos tau Konfiansa ba lider sira hanesan Mari Alkatiri, Ramos Horta no Xanana Gusmão katak, sira nee mak iha oin no FALINTIL mak funu too hotu. Lider nain tolu nee  labele haketak malu, maibe nain tolu tenke kompleta malu.

Nia dehan, Xanana ema neebe mak destakera, neebe mak trasa estratezia. Mari ema neebe  Jestor iha politiku, jere politiku tuir buat neebe mak Xanana estratezia no Ramos Horta, ema neebe mak diplomata hodi manan simpatia mundu tomak nian, atu apoiu Timor-Leste.

Hau husu lider sira nee presiza buka malu, hanesan PR, PM ho lider nain tol,  atu bele rejolve problema neebe mak iha, nia hatete.

Lere hatutan, iha enkontru lider nasional nee iha opsaun neebe mak hatete katak, laiha Eleisaun Antesipada no Eleisaun Antesipada nee ultima rekursu.

Tanba nee  partidu politiku mak halo movimentu, atu buka malu hodi forma governu. Husu Halakon mos arogansia no ambisaun, atu nunee bele lori povu nee, ba moris iha dezenvolvimentu.

Entretantu responrde kona ba deklarasaun neebe mak hatoo husi Xanana Gusmão katak, atu hakotu impase politika neebe mak lao presiza ba Eleisaun Antesipada, Lere Dehan, nasaun demokrasia nee maioria mak manda, maibe Eleisaun Antesipada nee desizaun ba ikus.

Nunee mos Prezidente Partidu Congresso Nacional Reconstrução Timor-Leste (CNRT), Kay Rala Xanana Gusmão mos entrega ba Prezidente Republika, Francisco Guterres Lú Olo, atu foti desizaun ba impase politika neebe lao hela iha nasaun nee.

Lider Karismatiku Xanana Gusmão mos deklara katak, nia hanesan ema babain, nia partisipasaun ba iha luta ba libertasaun ida nee mos minimu tebes.

Nia dehan, Prezidente Republika hanesan institusaun Estadu no Primeiru Ministru kaer institusaun Governu, sira mak iha lejitimidade no reprezenta Estadu atu rezolve impase polítika.

Hau fora husi Governu. Hau hanesan sidadaun biasa ida, baibain, dehan Xanana.

Maski nunee, atu solusiona impase politika neebe daudaun lao iha rai laran, Eleisaun Antesipada mak justu no demokratiku liu.

Nia mos husu atu iha situasaun nee hotu-hotu fo fiar ba Prezidente Republika, Governu, Parlamentu Nasional no Konsellu Estadu tanba fiar katak sira sei la lori nasaun nee ba rai kuak.

Nunee mos Koordenador Redi Observasaun Nasional Eleisaun Timor-Leste, Laurentino Alves mos husu ba iha lider sira, maski iha dialogu husi lider sira, lider rezistensia Xanana Gusmão lapartisipa, maibe nia  iha esperansa katak, lider sei iha hanoin neebe mak diak, tau intrese nasaun iha oin, buka malu tuur hamutuk, hodi hakotu impase politika neebe mak lao iha rai laran.

“Se karik iha liafuan ruma neebe mak durante nee koalia naksalak ba malu, bolu malu koalia ba malu ho ulun malirin, atu nunee bele hakotu impase politika neebe mak lao iha rai laran,” Laurentino hatete* Rep: Emerenciana Pinto

Komentariu

Facebook Comments

Leave a Reply

Your email address will not be published. Required fields are marked *