Lere: Mandatu Hotu Ba Politika

Lere: Mandatu Hotu Ba Politika

- in Politics
63
0
download (29)

Editora: Carme Ximenes

DILI– Xefe Estadu Maior Jeneral FALINTIL Forsa Defeza Timor Leste (F-FDTL), Major  Jeneral Lere Anan Timor hatete, bainhira mandatu remata, nia sei envolve aan iha vida politika, hodi serbi povu no nasaun tuir komprimisiu luta nian.

Dehan Jeneral Fitun Rua nee ba jornalista sira, iha Palasiu Prezidente Republika Nicolau Lobatu,Bairru Pite, Dili, Kuarta (15/01).

Kuandu hau sai husi vida militar, hau tenke ba iha politika duni, hau nia saude diak nee hau tenke serbi hau nia nasaun no hau nia rai, se kuandu ita mate mak ita nia knaar hotu ona, nee ami  girileiru nia komprimisiu mak nee, depois ukun aan se kuandu sei bele kontribui nafatin, Lere hatete.

Lider Masimu Forsa Armada nee dehan, kona ba nia mandatu nee desizaun politika no nia labele deside bainhira mak remata.

Lere hatete, tuir lolos nia remata ona iha tinan ida nee,maibe buat hotu bazeia ba desizaun  politika, tanba Prezidente nuudar Komandante Supremu nia mak sei deside.

Hau labele deside aan katak atu sai ka lasai, uluk funu mos hau laos kualker Jeneral hanesan Jeneral babain, hau nee mai husi funu ida ita dehan diferensa, tanba nee mak hau hanoin desizaun hotu mai husi politika, dehan Lere.

Entretantu responde kona ba informasaun viral  iha  sosial midia katak, Jeneral  fitun rua nee atu kandidata aan ba Prezidente Republika iha futuru, Lere dehan, nia seidauk hanoin atu kandidatu aan, tanba oras nee sei ativu hela iha F-FDTL.

Atu kandidatu ba iha Prezidente Republika, hau seidauk hanoin too ba iha neeba, maibe uluk hau hakarak kandidatu aan ba iha xefe suku, se sira simu hau ba kandidatu iha neeba deit, iha neeba ema lasatea hau, Jeneral fitun rua nee hatete.

Iha biban nee mos Jeneral Lere dehan, nia iha responsablidade ba futuru Armadas Jeneral, tanba nee mak nia labele entrega instituisaun nee ba kualker ema.

Nunee mos politika mos hanesan ema neebe mak kaer nasaun nee mai husi ema rezistensia ,hanesan primeiru ministru mos mai husi ailaran  tinan 24, Prezidente Republika mos mai husi ai laran tinan 24 , tanba nee mak sira lakoi entrega vida instituisaun nee ba kualker ema.

Se bainhira entrega tenke ba ema neebe mak sira komfia, tanba nee mak bainhira atu entrega instituisaun F-FDTL ba fali ema seluk, tenke proposta husi nia, depois mak ba iha politika, Jeneral Lere afirma.

Nia dehan, labele halo tuir politika neebe mak agora, ema neebe  uluk lakoi ukun aan mos bele sai ministru. Politika nee laos hanesan forsa armadas.

Maibe Lere hatete, ema neebe mak kaer forsa armadas nee ema neebe  iha responsablidade, iha nasionalismu no patriotismu forte, ida nee mak bele kaer forsa armadas, labele entrega fali ba ema arte marseais ida.

Nunee mos Koordenador Redi Observasaun Eleisaun Nasional Timor Leste Laurentino Alves dehan, kona ba deklarasaun balun neebe deklara katak, Jeneral Lere sei kandidatu aan ba  Prezidente Republika iha futuru, ida nee nuudar sidadaun iha direitu.

Nia dehan, bainhira hetan konfiansa husi povu nomos militante sira bele  sai Prezidente, tanba lideransa nee rasik mos iha figura neebe mak diak.

Dalan loke hela atu nunee Jeneral Lere mos kandidata aan,maibe importante mak apoiu husi partidu politiku, grupu no entidade hotu, nunee bele sai lider ba ema hotu, para bele lori estadu nee ba oin, dehan nia.

Nunee mos Akademista Jose Sarmentu  hatutan, kona ba deklarasaun neebe mak oras nee viral ona katak Jeneral Lere hetan kontaktu atu sai mos Prezidente Republika ba iha futuru ida nee tuir nia katak, ida nee sei opinaun iha publiku deit.

Se kuandu liafuan nee sai realidade atu kandidata aan duni ba iha PR nia mos apoiu, tanba lei rasik mos garantia ona katak, ema hotu iha direitu atu bele kandidata aan, importante mak tuir kriteria husi partidu politiku rasik, hatete Jose.* Emerenciana Pinto

 

 

Komentariu

Facebook Comments

Leave a Reply

Your email address will not be published. Required fields are marked *