Kresimentu Larefleta Povu Nian Moris

Kresimentu Larefleta Povu Nian Moris

- in Economics
288
0
66merkadu-taibesi2

DILI-   Dadus neebe maka produs husi Dirasaun Jeral Statistika katak, Kresementu ekonomia sae maibe hare realidade, kresimentu ekonomia rai laran, larefleta povu nian moris, tanba hare povu barak sei moris iha lina pobreza.

Tuir Diretor Ezekutivu Luta Hamutuk Mericio Akara hatete, kresementu ekonomia tenke baseia ba dezenvolvimentu ekonomia iha rai laran, kresementu ekonomia sae, maibe dezenvolvimentu lalao la bazeia ba povu nian moris.

Ita hare kresementu ekonomia sae, maibe kampu servisu menus, dezempregu aas, signifika katak, dezenvolvimentu laiha, kapasidade kompras povu kiik nian limitadu, kondisaun moris povu nian, nafatin kiak, loron ida han dala ida, signifika katak, kresementu falsu la refleta povu nia moris,” dehan Akara ba STL, Sesta (17/03/2017) iha knar fatin Farol.

Nia hatete, kresementu ekonomia sae presiza halo balansu ho dezenvolvimentu rai laran lao,   para hadia povu nia moris, importante governu aloka orsamentu hadia setor riil fo rendimentu ekonomia ba povu nia moris.

Iha parte seluk Reprezentante povu iha Uma Fukun Parlamentu Nasional Deputadu Arao Noe de Jesus Bankada CNRT hatete, Kresementu ekonomia depende ba osan minarai aloka ba dezenvolvimentu rai laran, maibe setor privadu sira seidauk fo kontribuisaun ba kresimentu ekonomia.

Agora dadaun governu esforsu hadia infranstrutura baziku, oinsa dada investor sira mai halo investimentu kria kampu servisu ba Timor oan sira, bele dudu kresmentu lao ba oin,” dehan Nia.

Nia hatete, Investidor estranjeriu sira hahu dadauk mai halo investimentu iha rai laran, hanesan  investimentu simenti, sei harii iha Munisipiu Baucau, investimentu Heneiken produs tua serveza kria kampu servisu ba joven sira hodi kontribui hadia kresmentu ekonomia povu TL.

Nunee mos Diretor Ezekutivu CCI-TL Nuno Trindade hatete, kresementu ekonomia sae depende ba osan minarai, aloka ba OJE halo dezenvolvimentu iha rai laran, maibe kontribuisaun setor privadu ba investimentu menus.

Ita rekuinese tanba Setor privadu problema kapasidade finanseiru minimu, presiza governu apoiu asesu kreditu finanseiru hodi halo investimentu, kria kampu servisu ba joven sira, bele redus numeru dezempregu, bele dudu kresementu ekonomia TL lao diak,’’dehan Nia.

Nia hatete, Setor privadu sai parseiru governu, prontu apoiu governu dezenvolve ekonomia rai laran, planu halo investimentu iha setor produtivu, neebe governu define ona, iha setor hat hanesan setor agrikultura, peskas, turismu, pekuario, industria manufacture. Josefa dos Santos

 

Facebook Comments

Leave a Reply

Your email address will not be published. Required fields are marked *