Kontribui Ba Dezenvolvimentu Nasaun, Feto Tenke Brani Kompete Ho Mane Sira

Kontribui Ba Dezenvolvimentu Nasaun, Feto Tenke Brani Kompete Ho Mane Sira

- in Distritu
68
0
FETO

BAUCAU-Too ona tempo ba feto sira fo kontribuisaun makaas ba dezenvolvimentu nasaun. Hatan vizaun nee, feto sira tenke brani kompete ho mane sira. Tenke esforsu makaas hodi kontribui ba dezenvolvimentu nasaun.

Tuir membru OPMT, Eva Soares, atu bele kompete ho mane, feto sira tenke aprende buat neebe merese atu aprende. Aprende labele para deit iha fatin maibe tenke kontinua ba oin nafatin. Tenke aproveita oportunidade neebe iha, hodi aprende no partisipa iha kualker aktividade. Nee presiza esforsu makaas.

Se laiha laiha esforsu, feto labele kompete ho mane sira. Atu kompete ho mane, feto sira tenke kapasita aan, hasae kapasidade. Nee importante tebes ba feto sira,” hateten Eva Soares ba STL iha ninia hela fatin, Vila Noza Baucau, Kuarta (11/10/2017).

Nia husu feto labele tauk kompete ho mane sira tanba iha ona lei mak proteje no fo importansia ba feto sira. Tanba nee, feto sira persija esforsu aan hadia kapasidade matenek.  Atu nunee bele igual ho mane sira. Kbit no matenek hanesan mos ho mane sira iha aktividade hotu.

Konaba kestaun nee, Celina Soares  (estudante) fo ninia hanoin. Nia dehan, feto ninia dever no direitu hanesan mos ho mane sira. Feto labele lakon oportunidade. Tenke aproveita opurtunidade neebe iha, para bele kompete ho mane sira hodi hasae kapasidade matenek.

Ita agradese ba inan aman sira neebe maka oras nee dadauk komprende ona saida maka direitu, no sira mos komprende ona katak oan feto mane iha direitu hanesan, entau sira lahalo diskrimina ba oann feto sira hodi halao estudu iha nivel hotu maske iha dezafio neebe maka iha maibe sira nafatin esporsu ann hodi dudu oan sira ba escola, nomos iha mos maluk mane sira balun mos haruka nian feen ba escola ona lahanesan uluk katak feto iha dapur deit,” hateten Celina.

Ba papel feto nian nee, katak Celina, lei fo dalan ona ba feto sira atu kontribui ba dezenvolvimentu nasional. Neduni, feto sira tenke esforsu aan makaas hodi partisipa iha sector hot-hotu. Opurtunidade neebe iha tenke aproveita, aprende buat neebe bele aprende. Labele para, tenki kontinua bebeik ba oin, hodi hasae kapasidade no koinesementu ba area hot-hotu.

Husi fatin lahanesan, Direktora Caucus, Paula de Cortereal Araujo hateten, atu hasae kapasidade, feto persija kapasita aan iha kualker sector, atu nunee bele iha ninia abilidade hodi partisipa iha dezenvolvimentu nasaun. “Kuandu feto laiha koinesementu diak, ita labele halo buat ida. Tanba nee, husu feto maluk sira tenke book aan, aktiva involve iha vida politika, ekonomia no setor hot-hotu. Ho nunee feto bele kompete ho mane sira”. Emerenciana Pinto 

Facebook Comments

Leave a Reply

Your email address will not be published. Required fields are marked *