Konfrontu Gariwai, 4 Kanek Grave, Polisia Aplika Siaga 2

Konfrontu Gariwai, 4 Kanek Grave, Polisia Aplika Siaga 2

- in Politics
273
0
Povu Oecuse

BAUCAU — Depois konfrontasaun Taibesse hamate joven ida, tuda malu entre joven Hudi Laran, rezulta loja 2 estragus inklui kareta patrulamentu PNTL Eskuadra Don Aleixo,   konfrontasaun seluk akontese mos tan iha Suku Gariwai Posto Administrativu Baucau Vila, Munisipio Baucau rezulta ema nain 4 kanek grave.

Konfrontasaun hirak nee mai ho nia motivu la hanesan, konfrontasaun iha Dili laran oras nee sei prosesu investigasaun, maibe konfrontu iha Gariwai motivu mai husi impedementu halo uma adat, tanba problema rai.

Konfrontu neebe maka akontese iha Suku Gariwai 7 Outobro tanba iha impedementu husi uma kain rua maka hanesan uma aurala nomos uma uma tame isi, problema nee mosu tanba haksesu malu iha uma kain tame isi laos iha uma tame isi, iha mos uma maturate haksesuk malu konaba rai,” informa Adjuntu komandante Eskuarda Baucau Vila, Sarjentu Xefe Sebastiao Freitas ba STL Tersa feira 10/10 iha salaun Eskuarda Baucau Vila.

Sarjentu xefi Sebastiao informa iha momentu neeba sira husi parte uma tame isi sae ba taka uma kakuluk, balun mos iha uma okos,  iha momentu nee kedas, uma aurala halo impedementu ba uma tame isi atu labele taka uma nia kakuluk, tanba uma nee iha hela problema nian laran, liu  problema rai uma maurate nian neebe maka nian solusaun too agora laiha, tanba nee uma kain tame isi mos senti la satisfas tanba iha impedementu ba  sira nian kultura, mosu konfrontasaun,  iha konfrontasaun parte rua lori kroat hasoru malu, baku malu no ikus hakanek ema nain 4 kanek grave.

Komandante nee hatutan konsekuansia husi konfrontasaun nee komunidade husi uma aurala nain 3 kanek, hanesan Aurio Freitas kanek iha ain parte karuk no ain parte loos hetan taa, Fernando Freitas hetan kanek iha ain deit no Mateus   hetan taa iha kotuk no ulun. Enkuantu, husi uma tame isi ida mak kanek hanesan Mateus hetan taa husi nian ain no liman.

Ba kazu nee parte rua kanek hotu sira hotu sai vitima no suspeitu,” Sebastiao informa iha akontesementu, polisia OPS too kedas iha fatin akontesementu atu halo atuasaun ba konfrontasaun neebe lao hela, maibe labele halo buat ida, tan nee tenke husu apoiu ba taskforce hodi hapara situasaun, no konsege lori sira neebe maka kanek ba hospital hodi halo tratamentu, no lori mos eskuadra polisia atu halo prosesu kontinuasaun.

Ami nia polisia investigasaun halo ona keixa sira nee hotu no lori ona ba iha ministeriu publiku tanba nee aban bainrua ministeriu publiku maka hatene no rejultadu nee oinsa, iha akontesementu nee hau bolu kedas Administrador Baucau Vila nomos bolu mos Xefi Suku Gariwai nomos parte rua neebe maka halo konfrontasaun atu responsabiliza atu labele hamosu tan violensia,” esplika Sebastiao.

Parte rua neebe envolve konflitu, halo mos deklarasaun konjunta ida atu sira tuur iha sira ida-idak nian fatin nunee hein rezultadu, karta deklarasaun iha parte rua nial iman no balu iha polisia, xefi suku.

Metodu ida nee maka ami halo, kazu krime nee ami avansa ba oin nafatin atu dame malu fila sira parte rua, maibe ami nuudar polisia ami halo tuir deit lei neebe maka iha katak ami asegura seguransa no halo prevensaun ba krime, ida nee maka ami nian responsabiliza maibe konaba simu malu ka lae nee fila sira parte rua, nomos fila fali ba suku nomos lia nain sira,” komenta Sebastiao.

Enkuantu iha sidade Dili joven ida ho idade (17) foin dadaun hetan hana ho rama ambon husi grupu organizadu iha area Palapasu inklui nain rua seluk iha area Taibesse. Insidente neebe akontese iha area Taibesse nee kuaze tuku 11: 00 kalan hafoin vitima nain rua nee atu fila ba uma.

Tuir Segundu Komandante PNTL Munisipiu Dili, Superintendente Assistente Polisia, Euclides Belo, insidente  akontese iha fatin tolu hanesan iha Taibesse iha fatin rua no ida iha Palapasu.

PNTL Munisipiu Dili horikalan kedas ami buka suspeitu, suspeitu nain tolu nee ho motor ida sira la uza sapa matrikula, mais ami buka nafatin para hetan sira nia paraderu,” dehan Euclides ba Jornalista iha nia knar fatin Kuartel PNTL Munisipiu Dili, Caicoli Tersa (10/10/2017)

Segundu Komandante PNTL nee konsidera, katak, nee grupu organizadu sira mak halo tentativa omesidu ba ema seluk. Maibe parte polisia orienta nafatin membru sira ativu nafatin iha terenu, halo komunikasaun ho autoridade lokal prevene movimentu publiku nia liu liu iha tempu kalan.

Nia informa insidente tentativa omesidu neebe akontese area Palapasu vitima hetan kanek parte iha liman no kelen, tanba hetan hana husi grupu neebe neebe la identifika, nunee mos vitima nain rua seluk hetan hana husi rama ambon iha Taibesse,  vitima ida hetan kanek parte iha kotu laran, ida seluk besik kalilin okos, dadaun halao hela tratamentu iha Hospital Nasional Guido Valadares (HNGV). Enkuantu parte polisia husi seksaun investigasaun kontinua halo hela identifikasaun.

Segundu Komandante PNTL Munisipiu Dili, Superintendente Assistente Polisia, Euclides Belo informa,   Polisia Nasional Timor Leste (PNTL) seidauk identifika suspeitu ba konfrontasaun area Hudilaran iha loron Domingu (08/10), hodi tuda rahun kareta no loja rua. Tanba nee Ofisial Polisia Suku ho autoridade lokal sei halo hela identifikasaun ba estragus inklui mos ba suspeitu sira. “Ita nafatin halo identifikasaun ba suspeitu,   presiza tempu para rekolla informasaun tanba nee sei iha prosesu identifikasaun,” dehan Euclides.

Relasiona ho situasaun neebe la seguru, Euclides apela ba publiku katak, Polisia Nasional Timor Leste (PNTL) sei kontinua implementa alerta 2 (Siaga 2). hodi nunee garantia estabilidade seguransa nasional.

Ami sei implementa siaga 2 husi kedas fulan Marsu too mai agora,” komenta Euclides

Nunee Diretur Fundasaun Mahein (FM), Nelson Belo hatete konfrontasaun entre joven sira nee sempre akontese kada loron no laiha meus ida atu hapara, pior liu mak laiha programa governu uluk too agora laiha orienta ba prevensaun konflitu.

Nia hatutan ba artemarsiais nian uza rezulusaun hodi taka, depois taka tiha sidadaun sira ilegalmente hakur fronteira para sae sabuk, grupu sira nee kontinua treinu nafatin sub-subar, maibe lolos grupu hetan tratamentu ida tuir lei neebe vigora.

Artemarsiais tuir Nelson lolos regulariza laos bandu, problema governu la mampu atu regulariza depois bandu deit, maske lolos nee tipu nee la los nee tenke husik sira moris, maibe tau regra ba sira para bele kontrola. Ida nee mak governu la halo, maibe taka tiha deit, ida sai problema.

Iha sorin seluk Akademika UNTL, Januario da Costa aseita tebes ho implementasaun alerta 2 nunee bele garantia seguransa iha rai laran. Polisia tenke halo operasaun mais rigorozu hodi prevene konflitu kiik sira neebe nafatin sempre akontese iha rai laran.

Hanesan sidadaun hau aseita tebes ho razaun ita bele dehan katak ikus ikus nee ita haree situasaun iha ameasadu tanba ema fasil halo tentativa omesidu ho meus oin oin,” tenik Januario.

Nunee mos Deputadu Jacinto Viegas sujere ba komandu PNTL atu husu apoiu Falintil-Forsa defesa Timor Leste kontrola situasaun iha sidade Dili.

 “Hau hakarak nee ita fo poder ba F-FDTL para sira mos kontrola iha Dili laran too tinan ida tok, klaru katak F-FDTL nia knar nee ba ameasa eksterna mais ida nee mos ameasa interna, tanba halo ema kalan labele lao, purke polisia sira halo atuasaun mais ema la tauk entaun ita fo took poder F-FDTL,” dehan Jacinto. Emerenciana Pinto/Lucia Ximenes

Facebook Comments

Leave a Reply

Your email address will not be published. Required fields are marked *