Kompania Winer Hetan Bomba Iha Baguia

Kompania Winer Hetan Bomba Iha Baguia

- in Distritu
162
0
pouzada

BAUCAU-Kompania Winer neebe halao hela projetu dada elektrisidade ba komunidade iha area Posto Administrativu Baguia, Baucau, hetan bomba  iha area Aldeia Uru, Suku Larisula. Bomba nee sei aktivu, ho ninia naruk 50 cm.

Too horsehik bomba refere sei iha au laran, seidauk foti. Polisia husu atensaun ba komunidade sira iha neba, labele besik ba bomba nee. Informasaun hetan bomba nee, hatoo husi Xefe Aldea Uru, Gabriel Antonio de Almeida ba jornalista iha Aldea Uru, Sesta (6/10/2017).

Bomba nee hetan bainhira trabailhador Winer harii airin elektrisidade no dada fiu elektrisidade ba komunidade nian uma iha Aldea Uru. Sira dada fiu liu husi aularan ba komunidade nian uma, fiu kona au. Tauk hamosu risku ba komunidade, trabailhador sira ba taa tiha au iha aularan. Sira ba taa au nee mak, hetan bomba iha aularan.

Depois konfirma kedas ba Komando Polisia Eskuarda Baguia hodi ba haree no foti tiha. “Too horsehik, polisia seidauk foti bomba nee. Tansa seidauk ba foti, ida nee hau lahatene,” hateten Gabriel de Almeida. Nia ho ninia komunidade lahatene, oinsa bomba refere iha aularan neba.

Simu tiha informasaun husi Kompania Winer, Polisia Eskuarda Baguia haruka kedas ninia membru ba haree kedas bomba nee no husu komunidade iha neba, labele besik ba bomba nee tanba sei aktivu. I atu ba foti bomba nee, sei hein membru PNTL husi nasional. No evita komunidade labele ba besik bomba nee, polisia dada tali haleu bomba nee para komunidade labele ba besik.

Hatan konfirmasaun, Komandante Eskuarda PNTL Baguia, Sarjento Chefe Alberto Manuel Piedade Gusmao rekonese, sira simu ona informasaun sobre bomba nee. Kompania Winer mak informa ba PNTL Eskuarda Baguia. Bomba nee hetan bainhira trabailhador Winer, ba taa au iha aularan hodi dada fiu elektrisidade. Hetan tiha sira informa kedas PNTL Eskuadra Baguia. Bomba nee ninia naruk 50 cm. Too horsehik seidauk foti, sei hein ekipa especial husi PNTL Nasional. Emerenciana Pinto

 

Facebook Comments

Leave a Reply

Your email address will not be published. Required fields are marked *