KOMBATE KORRUPSAUN TRATA HO PRUDENTE TUIR KORIDOR LEI

  KOMBATE KORRUPSAUN TRATA HO PRUDENTE TUIR KORIDOR LEI

- in Opini
571
0
image002

Husi : Rosário Salsinha Araújo

Artigu 30 Lei Kriasaun KAK temin kona ba, Natureza komisaun nian mak nudar pesoa koletiva ida ne’ebé iha direitu públiku, hakna’ar ho personalidade jurídika, ho independensia téknika no autonomia administrativa no finanseira, komisaun  simu kna’ar nudar orgaun polisiál  kriminál espesializada,  ne’ebé independente, halo intervensaun  tenke tuir deit kritériu legalidade no objetividade ne’ebé lei haruka, iha ninia kualidade nu ‘udar orgaun polisía kriminal nian, komisaun atua ho diresaun hosi autoridade judisiária kompetente tuir lei haruka.

Artigu 30 Lei kriasaun KAK ida ne’e mak nudar instrumentu polítika ida husi instituisaun nian hodi asegura nafatin independensia komisaun nian iha asuntu hotu ne’ebé liga ba boas prátikas hodi hamoris  integridade komisaun nian nudar orgaun independente Estadu nian ba kombate no prevene  korrupsaun iha Timor-Leste, aumesmu tempu halao servisu seim intervensaun husi parte polítiku sira, komisaun nia rekursu téknika sira hahu husi ekipa téknika no superior máximu sira  tenke ema ne’ebé independente no iha integridade atu nune’e bainhira halao kna’ar sira iha terenu sei la prejudika ho interese oi-oin ne’ebé iha, tamba ne’e komisaun sei asegura nafatin to’o minute ida ne’e katak  komisaun laos pesoal ka grupu ka organizasaun privadu ka polítiku nian, maibe hamri’ik ho objetivu Estadu nian mak klaru ona tuir mandatu ne’ebé Lei kriasaun  ne’e rasik hakerek ba.

Saida mak akuntese bainhira trata asuntu Kombate korrupsaun  lakon  seriedade no independensia hanesan instituisaun ne’ebé neutru, sosiedade iha nia direitu no dever tomak hodi kestiona no hato’o krítikas konstrutivu sira  hodi salva lalais instituisaun nia lalaok ne’ebé sei sai husi koridor no kompromisu hodi servi ba povu no Estadu tuir lei, tamba  asuntu kombate korrupsaun ne’e sosiedade hotu nia papel, midia nia papel, setor privadu, setor akadémiku, sosiedade sivil, konfisoens relijiozu sira nia kontribuisaun mak hodi habo’ot komisaun nia misaun servisu kombate korrupsaun iha Timor-Leste, tamba ne’e  setor hotu importante hanesan  orgaun kontrolu sosial ne’ebé tenke fihir nafatin, koalia nafatin kona ba lalaok tomak komisaun nian  atu komisaun labele lao sala dalan maibe lao tuir dalan no mensajen sira sosiedade nian hodi lori nasaun no povu ida ba atinze dezenvolvimentu ne’ebé sustentavel tuir visaun sirak mak fundador ,patriotas no heroi sira nia mehi ba libertasaun patria no libertasaun povu husi kiak no mukit.

Leitores sira karik pertinente duni atu defende soberania Estadu nian atu labele monu ba konflitu oi-oin, ida ne’e mak dalan ne’ebé ita nia konstituisaun RDTL hakerek iha artigu 20 konaba soberania no konstitusionalidade, katak soberania haktuur metin iha povu, ne’ebé hala’o soberania ne’e tuir Lei-Inan haruka (paragrafu 1) Lei-oan sira no hahalok seluk tan hosi Estadu no kbiit autoridade local sira-nian foin sai válidu wainhira sira la’o tuir duni  Lei-Inan haruka (paragrafu 3),  se’e nune’e ita tenke prudente  atu tau matan, signifika katak hakna’ar ba nasaun tuir kontestu ne’ebé determina iha Lei, komponente nasaun tomak tenke hatudu responsabilidade ne’ebé real tuir nia funsaun sira hodi promove nafatin funsionamentu instituisaun nian, kumprimenta ba Lei hodi atinze boa governasaun no kombate korrupsaun, lia fuan ka terminolojia “ Prudente “ tuir  A.C Page no R.B. Fergusos iha livru “The Prudent Man Rule”  katak ema ka pesoal ne’ebé servisu tau matan ba halo jestaun sira ka investimentu sira ba jestaun públiku nian, tenke kuidadu nafatin, no prinsipal liu mak tenke iha korajen moral nafatin, katak saida mak agora  responsabiliza dadaun ne’e sei hato’o tuir responsabilidade ba públiku enjeral, parte seluk mos Ross Cranston tuir  nia hanoin  katak asuntu preventiva no protetiva tenke sai prinsipiu ida kona ba asuntu prudensia nian iha instituisaun estadu sira hodi sai qiaun ba atitude no komportamentu  iha jestaun ne’ebé bele apoiu sistema no prosedura eskrita sira  tuir nia dalan.

Wainhira falla iha jestaun ba asuntu sira mak liga ba sistema sira mak  tenke halo ho prudensia sei  fo’o  implikasaun ladiak ba hari’i boa governasaun, nune’e sei hamosu  krize oi-oin  ne’ebé sai impedimentu ba lalaok governasaun nian, tamba prinsipiu legalidade rasik permite trata asuntu sira tenke ho prudente hodi integra  prinsipiu fundamentu  sira mak hanesan transparente, akuntabilidade, independensia no justu, tamba ne’e  jerente estadu ida-idak ne’ebé hanesan mákina estadu nian iha nia responsabilidade moral tomak hodi labele halo Korrupsaun, Konluiu no Nepotismu, nune’e mos jerente estadu sira tenke hatudu ezemplu diak hodi kumprimenta ba Lei, iha dedikasaun diak hatudu lealdade ba instituisaun estadu sira, laiha interese ruma hodi buka lukru ka benefisiu ilegitimu ruma ne’ebé tamba asuntu familia, belun, koor no seluk tan,  nune’e hodi kontra no viola Lei.

Prinsipiu independente mak pontus ne’ebé prinsipal liu tamba ne’e wainhira halo jestaun sira tenke trata nafatin ho profisionál no laiha potensia ba konflitu de interese  tamba karik presaun husi parte balun sira ne’ebé kontrariu ho Lei hodi viola normas, Lei  tenke sai supremu iha lalaok servisu estadu nian iha instituisaun hotu, ema hotu tenke hakruk no obedese ,” the equality before the law” , iha parte seluk ita tenke rekuñese katak implementasaun sira kona ba boas prátikas no boa governasaun ladauk atinze tuir estratejia ne’ebé diak, mesmu Lei nasionál no Lei UNCAC rasik temin no ezije hodi hadia komportamentu no sistema servisu sira maibe prátika hatudu dook husi realidade, ida ne’e mak ejizensia governantes no polítiku sira nia mandatu atu fo’o resposta ba prekupasaun riil ne’ebé Timor-Leste infrenta daudaun.

Mochtar Lubis liu husi nia hanoin kontroversial hateten katak,“Fenómenu korrupsaun realmente mosu iha nasaun hotu iha mundu tuir nia periodu ida-idak, maibe nia problema mak, karik fenómenu korrupsaun ne’e aumenta bubu ba bebeik hodi invade no domina hahalok ema nian, laos deit burokrasia estadu, maibe setór privadu sira no sosiedade enjeral”  iha kazu barak ke deskobre liu husi estudu oi-oin kona ba lalaok korrupsaun sira iha nasaun sira iha mundu  ne’ebé ema barak mak komiti, maibe  esforsu barak ke governu husi estadu parte sira  halo hodi kontra hahalok korrupsaun ne’e rasik hakerek tuir  istoria lalaok ema nian, tamba ne’e mesmu korrupsaun lao kleur ona tuir istoria evolusaun ema nian iha mundu maibe diak liu korrupsaun ne’e labele sai kultura diak hodi proteze hahalok at sira, diak liu mak kombate no fokit to’o nia abut.

Atu evita hodi labele monu ba aktus korruptus diak liu aprende husi ita nia esperiensia sosiedade nian ne’ebé hakarak rona malu, respeitu malu, mezmu krítika malu maibe la sai inimigo, amigo nafatin tamba tenke tau interesi komun as liu buat hotu, ida ne’e mak ezensia demokrasia ne’ebé lo’os liu, katak ita diferente iha hanoin maibe laos sai kestaun hodi hafahe ita, tamba diversidade ne’e mak arte ida husi ezensia demokrasia nian, karik ida ne’e la akuntese bele iha potensia hamosu feodalismu ne’ebé Liurai antigo sira uza hodi lidera nia povu sira, katak ukun ne’e mai husi Maromak tamba ne’e tenke hahi no hanai tamba  fiar katak liurai sira sei labele halo sala, Liurai sira sempre ema perfeitu,  kultura ida  ne’e lao mai to’o ohin loron Liurai sira troka naran sai Ministru, Diretor Jeral, Deputadu, Militar, Governador no seluk tan, mesmu muda naran maibe hahalok no ran feodalísmu ne’e sei eziste nafatin, nune’e  sei la gosta rona krítikas, fahe hanoin konstrutivu sira, kurizen, no seluk tan, sirkumstansia hirak ne’e lori governantes sira lakohi rona ema, esklusivu ka taka-an demais, limite atu komunika ba malu, izola atu la tau kunsiderasaun, ida ne’e sei prejudika lalaok tomak mákina dezenvolvimentu estadu nian, tamba informasaun ne’e  mais importante ba vida nasaun hodi muda dezenvolvimentu iha setores sira hotu, informasaun hirak ne’e bele liga ba asuntu ekonomia, polítiku, siensia, teknologia no seluk tan, nune’e sei ivita atendimentu ne’ebé represivu sira husi leten ba kraik wainhira mosu desintendimentu entre governantes sira ho sosiedade.

Diversensia oi-oin ne’ebé mosu, ezije dezisaun ne’ebé proporsionál atu hare fila fali katak Lei mak baze no fundamentu ne’ebé lo’os liu iha instituisaun estadu hotu, nune’e mak sidadaun ida-idak lao tuir duni koridor Lei nian no sei lase’es no eskapa husi Lei, haktuir fila fali Lei UNCAC artigu 180 ne’ebé koalia kona ba Trading in influence ka fa’an ka buka influensia hodi buka  lukru ba an rasik, iha ne’e solisita momos katak abuzu konfiansa sei nakait ba halo abuzu poder wainhira ema ka ofisial ida buka atu haknauk-an liu husi influensia oi-oin hodi atinze objetivu ruma mezmu ema  ka ofisial ne’e rasik envolve iha kazu kriminál ka sansaun administrativa balun, artigu ida ne’e hetan reazen maka’as  iha estadu parte balun ne’ebé  fo’o marzen hodi abuzu no kontra lei, tamba ne’e autoridade sira tenke nafatin jere sira nia kapasidade hodi internaliza ho didiak Lei internasionál ka Nasionál sira  ne’ebé sai obrigasaun hodi kumprimenta, dala barak mos akuntese desintendimentu sira oi-oin hodi  prejudika ba implementasaun ne’e  rasik iha rai laran, tamba menus  kuñesimentu no informasaun ba lei hirak ne’e,  maibe autoridade sira  tenke rigor nafatin halo konsultasaun diak kona ba asuntu hirak ne’e atu labele hamosu diskrepansia iha dezisaun no responsabilidade.

Timor-Leste ladauk iha indikasaun forte ba asuntu hirak ne’e maibe, risku ba potensia hirak ne’e sei mosu mai, tamba ita nasaun indepensia ne’ebé hakarak ka lakohi ita tenke loke an hodi simu buat hotu, bele mos simu buat at, maibe ita  nia kompromisu tenke nafatin hanesan Timor Oan ne’ebé hadomi povu no nasaun ida ne’e.***rlelosae,.

Opiniaun rasik  no pesoal : Hakerek nain servisu iha CAC Karik iha hanoin ruma bele kontaktu ba  Hp:+ 670  7732 6592,

Email: rlelosae@yahoo.com

 

Komentariu

Facebook Comments

Leave a Reply

Your email address will not be published. Required fields are marked *