Kazu CI Sasin rekonese asina formulariu

Kazu CI Sasin rekonese asina formulariu

- in Krime
96
0
index

DILI-Tribunal Distrital Dili (TDD) iha Kinta loron 25 fulan nee kontinua halo julgamentu ba kazu Conselho Imprensa (CI) nian neebe deskonfia involve Diretora Rekursu Humanu CI arguida LVA no Diretora Exekutiva CI arguida ATS, tanba utiliza kareta Estadu hodi tula família ba halo tratamentu médiku iha Kupaun Indonezia.
Iha julgamentu kontinuasaun nee, Tribunal fo tempu ba sasin OA neebe asumi knar hanesan Direktur Apoiu Juridiku hodi fo ninia deklarasaun konaba involvimentu arguida sira nian iha kazu ne’e.
Iha audensia sasin rekonese asina dunik formulariu arguida LVA nian ba utilizasaun kareta Estadu hodi ba halo tratamentu iha Indonezia, maibe nia parte la aprova tanba laiha pedidu.
“Konaba arguida LVA nia lisensa hau aprova, maibe konaba utilizasaun kareta Estadu hodi ba konsulta oan iha Kupaun hau la aprova maske formulariu nee hau asina maibe iha tempu neeba hau husu fali no haruka fali nia hatama pedidu maibe hau hein too lokraik hau la simu pedidu, tanba nee hau la halo despaichu hodi autoriza tanba normalmente tenki hatama uluk pedidu mak foin priense formulariu hodi fo mai hau asina no aprova,”deklara sasin iha sala Julgamentu Kinta (25/07/2019).
Iha fatin hanesan sasin AM deklara katak wainhira iha servisu fatin arguida LVA fo formulariu ida hodi fo ba arguida ATS asina ho kontiudu formulariu ba utilizasaun kareta Estadu.
“Hau hasoru malu direitamente ho arguida hodi fo formulariu ida mai hau hodi lori ba arguida ATS hodi asina, maibe nia husu formulariu nee konaba saida no hau responde formulariu nee konaba utilizasaun kareta Estadu,”deklara sasin.
Nunee mos sasin H deklara maske nia hanesan Direktur Finansas CI maibe nia parte la simu karta konesimentu konaba utilizasaun kareta estadu nee, tanba nee parte finansa la prosesa konaba perdian no mina.
Hafoin rona sasin sira Tribunal adia hikas julgamentu ba loron 30 fulan nee hodi submeter ba alegasaun.
Entertantu arguida sira deskonfia komete krime abuzu de poder no pekulatu de uzu neebe previstu iha artigu 297, 296 husi kodigu penal Timor-Leste (TL), relasiona ho utilizasaun kareta Estadu hodi tula familia ba halo tratamentu iha Kupang Indonezia.
Audensia julgamentu prezide husi juiz singular Yudi Pamucas, Ministeriu Publiku reprezenta husi Prokurador Aderito Tilman, no arguida sira hetan asistensia legal husi Advogada Privada Cesaltina dos Santo.Lucia Ximenes

Komentariu

Facebook Comments

Leave a Reply

Your email address will not be published. Required fields are marked *