Julião Rejigna Laiha impaktu

Julião Rejigna Laiha impaktu

- in Politics
35
0
download (17)

DILI-Bainhira redus Orsamentu SEPFOPE ninian, mak Sekretariu Estadu Politika Formasaun Profisional Empregu Julião da Silva hakarak rejigna aan, ida nee laiha impaktu ba governu, tanba sira hanesan iha AMP.

Deklarasun nee Xefe Bankada CNRT Duarte Nunes hatoo, relasaun ho estetimentu neebe Sekretariu Estadu Politika Formasaun Profisional Empregu Juliao da Silva hatete, bainhira orsamentu SEPFOPE redus liu nia sei rejigna aan.

 SEPFOPE dehan atu rejigna aan karik orsamentu 2020 ba SEPFOPE redus, nee laiha impaktu ba governu. Ami AMP hotu neebe nia mak koalia, nia rasik mak bele hatan, hatete Duarte ba Jornalista sira, iha PN,Dili, Kinta (12/12/2019).

Xefe bankada CNRT nee hatete, Sekretariu Estadu nee mak koalia nia mak responsabiliza, tanba nia mak halo estetimentu.

 Ida nee laos hau nia membru, maibe ami hotu hanesan iha AMP, neebe nia koalia nia mak responsabiliza, tenik Duarte.

Nunee mos Vise bankada FRETILIN deputadu Francisco Branco hatete, kestaun nee lamentavel liu, tanba ida nee problema interna entre sira neebe hola parte VIII governu, nee komflitu entre sira maibe depois konsekuensia mak lori estadu iha situasaun impase nia laran.

Ami hanoin ita tenke seriu ho asume komprimisiu neebe partidu sira hatoo ona, atu servisu hamutuk i laos  ukun lao too dalan klaran selok malu fali. Ami hanoin atitude sira nee ladiak, katak Branco.

Nia haktuir, tanba sa mak governu AMP sira nia reprezentasaun bankada iha  PN laiha konsentrasaun atu aprezenta OJE,  tanba iha OJE nee sira bele defende, maibe ikus mai governu aprova, depois ikus mai bankada governu  rasik kestiona.

 Nee  ida nee fenomena neebe foun,  ida nee labele sai pratika ba futuru atu governantes sira halo tuir tanba ida nee ladiak no lasaudavel ba nasaun.

Kona ba redus orsamentu deputadu nee dehan, tuir loos pakote fiskal neebe fahe mak sai baze ba ministeriu ida-idak atu  halao nia orsamentu, maibe lakumpri ona. Governu ida deit, maibe minsteriu sira halo ida-idak nian, fali ida nee labele.

Tanba tuir nia katak, haree ba solidu AMP nee ema hotu haree ho matan, ema hotu sente preokupa ho situasaun sira nee, tanba sira lahatudu ona sira nia solidu maibe sira fahe malu ona.

Entretantu informasaun neebe mak SEPFOPE atu rejigna-aan, publika ona iha media balu no oras nee sai viral loos iha media sosial.  Guilhermina Franco

 

Komentariu

Facebook Comments

Leave a Reply

Your email address will not be published. Required fields are marked *