Joven Barak Halai Ba Liur

Joven Barak Halai Ba Liur

- in Politics
118
0
image002

Editora: Carme Ximenes

DILI– Joven barak halai ba liur hanesan Inglatera ho Australia hodi buka servisu, tanba kampu servisu iha rai laran laiha.

Hare ba realidade kondisaun servisu neebe mak iha Timor laiha, halo joven sira tenke buka servisu ba ema nia rain, hodi bele sustenta moris.

Tanba dala barak ukun nain sira kolia dehan, sei lori kompania boot husi rai liur mai halo investimentu iha rai laran, para fo servisu ba joven sira, iha neebe too agora kompania hirak nee lamosu.

Nunee mos promesa governu neebe hatete, atu kria kampu servisu 60.000 kada tinan, maibe promesa  nee hela deit iha ibun tutun, tanba larealiza.

Ho nunee mak Outreach Asia Justice and Right (AJAR), Inocencio de Jesus Xavier nia haree, ohin loron joven barak leba sira ninia diploma S1 lao tun sae, balu  trata dokumentus, ba servisu iha Ingletera no Australia, tanba servisu  iha rai laran laiha.

Ita nia ema sai ba liur, ema estranjeirus mak tama mai fali ita nian rai, ita tenke hatene, tanba saida ema seluk mai ita nian rai buka osan hetan, tanba saida ita labele, tanba nee, joven barak haksoit ba servisu iha Inglatera no Australia, hatete Inocencio ba STL, iha Farol, Dili, Tersa (07/01/2020).

Maibe nia dehan, tuir lolos tenke uza joven sira nee, ba rai ida nee hodi halo dezenvolvimentu, tanba katuas sira neebe idade too ona reforma, tenke tama ona iha reforma.

Tanba tuir Inocencio katak, Timor Leste  iha universidade lima no instituisaun hira kedas, kada tinan ema graduadus bele too 10 mil. Bainhira eskola remata, sira leba sira nia diploma lisensiatura nee, hein vagas para atu tuir.

Ida nee kontribui ba tasa dezempregu, ema neebe  hatudu idade joven produtivu nee bele ita uja, ita bele halo reforma ona ba funsionariu publiku sira, neebe mak idade tama ona ba iha reforma ninian,para depois ita bele uja joven sira nee, hatete

Nia dehan, selae katuas sira mak kontinua nafatin servisu iha nee ba, depois joven sira nee, husik badiu deit.

Iha sorin seluk Luis de Jesus Moniz da Costa, hanesan graduadu (joventude)  hatete, joven barak ba servisu iha liur, tanba governu rasik ladun kria kampu servisu.

Nia dehan, oinsa governu koopera ho emprezariu Timor oan sira, para loke investimentu boot, atu nunee  bele fo servisu ba Timor oan sira neebe kada tinan remata estudu iha universidade.

Se ita nia governu ida nee, iha politika neebe mak diak, ezemplu sira halo servisu kooperasaun neebe diak ho ita nian emprezariu lokal sira, liu-liu apoiu finanseiru, para bele halo investimentu boot, selae kada tinan, ita nia joven barak mak sai ba liur, dehan nia.

Entretantu  Reitor ISC, Sebastiao Perreira hatete, los duni kada tinan universidade no institute sira halao graduasaun ba finalista sira neebe mak remata ona sira nian estudu, maibe  atu  kompete iha kampu servisu nee, depende ba sira ida-idak nian area neebe mak sira hili.

“Ami nian graduadu barak mak servisu ona, tanba balun agora tur iha Parlamentu sai deputada no balun asume kargu sai diretor no seluk tan ,”dehan nia. Jacinta Sequeira

 

 

Komentariu

Facebook Comments

Leave a Reply

Your email address will not be published. Required fields are marked *