Jaime “Nemalay” Xavier

Jaime “Nemalay” Xavier

- in Perfil
1057
0
Profil Jaime

Edisaun ohin aprezenta figura ho naran kompletu, Jaime “Namalay” Xavier. Uluk tempo resistensia too manan ukun aan, naran kodiku: Ramelau. Signifika, fokontribuisaun ba luta libertasaun patria, direita ka indireita. Nia aktiva liu husi organizasaun massa no pessoal (individu).

Tinan 1975-1978, nudar aktiva nudar membru OPJT no estafeta iha baze de apoiu (konsentrasaun) “Wasa’iraina”, halao knar hanesan lori no entrega Delegadu/Adjuntu Komisariu/Komisariu Fretilin husi baze apoiu ida ba baze apoiu seluk. Knar hirak nee nia halo no halao,bazea ba orientasaun husi dirijenti masimu Fretilin/Falintil, liu husi saudozu Adjuntu Komisariu/Komisariu Mau-Russu, Julio Ferreira no sira seluk tan.

Nomos involve grupu armada ida neebe orienta direita ho Komisariu Julio Ferreira (saudozu),Komandante Falintil Pedro Faria, Faustino Juvito (sei moris) no Komandante Falintil Mateus Vilonova (sei moris). Maske ninia involvimentu barak, desde tama ba fae ukun aan too agora, Ramelau seidauk deklara nia aan konaba ninia partisipasaun ba luta ukun, hodi simu buat ruma husi estadu,hanesan ninia kolega balu neebe uluk servisu hamutuk no alin balu, simu ona kondekorasaun (penghargaan) ka pensaun husi estadu.

Ba hau,importante liu mak foo fatin no tempu ba luta nain sira neebe merese sai heroi (pahlawan) ba Nasaun Timor-Leste,” dehan Ramelau.

Iha tempu okupasaun Indonesia, nia mehi hakarak sai prokurador (Jaksa) maibe la konsege. Maske la realiza,maibe konsege sai funsionariu publiku (PNS) iha instituisaun prokuradoria. Husi tinan 1988-1989, sai funsionariu (estajiariu) Prokuradoria Distrital Ermera, tinan 1989-1994 funcionariu publiku Prokuradoria Superior Dili, tinan 1994-1996, funcionariu publiku Prokuradoria Distrital Lautem, no ikus liu,tinan 1996-1999, funcionariu publiku iha Prokuradoria Jeral Jakarta-Indonesia.

                                   ***

Ramelau moris iha Suku Com, Postu Administrativu Lautem, Municipiu Lautem, dia 4 Marsu 1961, nudar oan daruak husi maun alin nain 7, oan dobeng husi Damiao da Costa (Mehara-Tutuala) no Mariana de Jesus Xavier (Com-Lautem). Iha tinan 1991, Ramelau hakotu ninia vida klosan. Forma uma kain ho Francisca “Payaromon” Lopes. Agora iha ona oan nain 8 hanesan Jose Fernandes Xavier (Je-malay), falesidu, Ronald Reagan Xavier (Lesu-Malay), falesidu, Mariana Margareth Teacher Xavier (Lalu-malay), falesida, Mariazinha Francisca Xavier (Renu-malay), Januario Fernandes Xavier (Kaku-malay), Leonia Francisca Xavier (Paya-May), Leonilva Francisca Xavier (Lau-may) no Alexandro Olderico Junior Marques (Pereso).

Ramelau hahu eskola pre-primaria iha Eskola Baziku Publiku (Sekolah Dasar Negeri) No.8 Com (1979-1984), Pre-Secundaria iha Sekolah Menengah Pertama Negeri (SMPN)No.1 Lospalos. Remata husi SMP, tinan 1984-1987 kontinua eskola sekundaria iha SMA Negeri No.1 Dili,maibe la konsege hotu tamba tuir rekrutamentu Calon Pegawai Negeri (estajiariu). Liu husi seleksaun meritu no ikus mai sai duni PNS iha Prokuradoria (Kejaksaan), estajiariu nia halao tinan ida (1) iha Munisipiu Ermera (1988-1989).

Tama faze ukun aan, tinan 2000-2001 sai funsionáriu publiku (Assistente Legislativo) iha Conselho Nacional Timor Leste, tinan 2001-2002, funsionáriu publiku (FP) iha Assembleia Constituante Timor Leste (Técnico Superior Júnior), tinan 2002-2009, FP iha Parlamento Nacional Timor Leste (Técnico Superior Senior). Tinan 2003-2009, kontinua nia estudo iha Universidade da Paz (Unpaz) Dili, Fakuldade Direitu no konsege hetan lisensiatura Direitu. Tinan 2010-2012, Mestradu Siensia Direitu (Magister Ilmu Hukum), konsentrasaun (especialidade) Direito Konstitusional iha Universidade Kristen Satya Wacana (UKSW) Salatiga-Jawa Tengah (Semarang) Indonesia, hetan bolsu estudo husi Estadu  Timor-Leste.

Tinan 2009-2014, FP no halao knar nudar Tekniku Profesional iha Gabineti Peskuiza no Analize (GAPA) Diresaun Peskuiza no Informasaun Teknika (PIT) Sekretariadu-Geral Parlamentu Nasional, tinan 2014-2017, halao knar nudar tekniku superior iha Gabinete Peskiza no Analize (GAPA) Diresaun PIT Sekretariadu-Geral Parlamentu Nasional.

Alende halao knaar hanesan kuadru permanenti (servidor estadu) iha Sekretariadu-Jeral Parlamentu Nasional,nia mos dosente iha Universidade Oriental Timor Lorosa’e (Unital). Tinan 2012-2016, dosente konvidadu iha Fakuldade Direito Unital no asumi kargu nudar Chefi Departamentu Direitu Jeral, no posizaun ikus sai nudar Diretur Programa Direito Jeral Fakuldade Direitu Unital.

                                                            ***

Ninia experensia servisu barak tebes, komesa kedas tempo okupasaun Indonesia. Tinan 1988-1989, FP iha Prokuradoria Distrital Ermera, (Despachu Prokurador Geral da Republica Indonésia), tinan 1989-1994, FP iha Prokuradoria Superior Timor Leste–Dili (Despachu Procurador Geral da Republica Indonésia), tinan 1994-1996, FP iha Prokuradoria  Distrital Lautem (Despachu Procurador Geral da Republica Indonésia), tinan 1996-1999, FP iha Procuradoria Geral RI, Jakarta (Despachu Procurador Geral da Republica Indonésia).

Nivel edukasaun naun-formal mos barak, no labele hakerek hotu iha rubrika badak oan nee. I edukasaun naun formal neebe nia tuir, hot-hotu relasiona ho ninia area estudu no servisu, tantu laos deit iha Timor Leste maibe mos barak iha railiur hanesan tuir formasaun konaba Gestaun Administrasaun Parlamentar iha NWS-Sidney no Canbera Australia, 2002; Estudu komparativu konaba prosesu legislativu no AdministrasaunParlamentar iha Camára dos Deputados do Brasil, 2004;Formasaun konaba Prosesu Legislativu Komum iha Assembleia daRepública de Portugal, 2007;Estudu komparativu konaba hamenus kiak, dezenvolvimentu rural,regional no igualdade generu iha Brazil no sel-seluk tan. Ho experiensia bar-barak nee, fo opurtunidade luan ba ninia kareirra. Ninia kareirra barak tebes, komesa tempo Indonesia too ukun aan, la too atu hakerek hotu iha nee.

Antes sai hanesan ohin loron, iha ninia vida, Ramelau hasoru dezafiu lubuk. Iha tinan 1975-1978, hetan kapturasaun husi TNI iha ailaran parte Mehara-Tutuala. Lori mai Lospalos vila, hodi hahu eskola primaria iha SDK Dom Bosco Fuiloro (1978-1979), tempu nee hahu kedas (kontinua) halao servisu diretu ba kuadru politiku Fretilin no Falintil ho grupu ida naran Irakuru, kompostu husi saudozu lubuk ida mak hanesan saudozu Lucas, Pancracio, Horacio, Hermenegildo, nia rasik no saudozu seluk nomos maluk balu ne’ebe sei moris hela.

Iha tempu neba, TNI sira inklui mak saudozu nain hat iha leten no oho tiha nain tolu, saudozu Hermenegildo ho saudozu balu TNI lori no husik iha Ilha Jaco maibe salva an, sae aikabelak husi Jaco ba Ilha boot Timor (Timor-Leste), ikus mai mate hamutuk ho komandante saudozu Falu-Chai momentu kontak Dame iha Aldeia Chaivaca/Lospalos.

Ramelau la konsege remata estudu iha eskola Dom Bosco Fuiloro, ikus mai muda fali ba SDN No.8 Com no konsege remata estudu. Husi nee kontinua nafatin foo kontribuisaun ba ukun an. Simu orientasaun husi Adjuntu Komisariu/Komisariu Politiku Fretilin saudozu Mau-Russu ba nia nudar Vice-Sekretariu Sub Nukleu iha Suku Com hamutuk ho saudozu Jose Carvalho, Mario Vilanova, Carlos Amaral (Sekretariu Sub Nukleu) sei moris no membru sira seluk ne’ebe sei moris.

kontinua eskola Pre-sekundaria iha SMP Negeri No.1 Lospalos, halibur maluk lubuk ida kompostu husi matebian Nolasco Viegas, Inacio Vilanova, Jose Mendes (moris), Carlos Vilanova Amaral (moris) no maluk seluk sei moris, simu orientasaun husi Komandante saudozu Miguel dos Santos (Liurai Mehara/Raja Miguel) no Jose Lary-Foe “API-UKU” (sei moris) no heroi (luta nain) balun ne’ebe sei moris no aktivu iha F-FDTL, hodi organiza ema atu partisipa levantamentu armada iha Mehara-Tutuala.

Depois kontinua eskola iha SMA No.1 Dili, la konsege remata tamba kondisaun ekonomia lapermiti. Nia servisu nafatin, foo nafatin kontribuisaun ba luta ukun an (simu orientasaun husi saudozu Sabele no Alarico, Iralafai). Iha situasaun defisil no ekonomia la normal no presaun nia laran,  nia diside tuir rekrutamentu funcionariu publiku prokuradaria no konsege liu husi izame (selesaun) meritu iha 1988.

Ikus liu, Ramelau hatoo lia menon ba joventude tomak. Nia dehan, juventude sira mak jerasaun foun ba dezenvovimentu rai doben Timor-Leste. Tamba nee, prezisa prepara an para sai jerasaun neebe kualifikadu no professional tuir idak-idak nia matenek no badaen. Nudar jerasaun foun, tenke hatene no hadok an husi komsume alkoholika (tua) no aimoruk at (drogas) no mos hahalok ne’ebe estraga sira nia futuru. Neduni, husu inan-aman sira kuidadu oan sira. Nunee hodi evita sira husi ransu livre. I ransu livre nee, ninia konsensia boot ba oan sira nia futuru, ransu livre demais influensia moras HIV/SIDA, Ransu livre ne’ebe liu limitasaun tuir kultura Timor nee kontra regra familia, igreja no etika/moral, hahalok sira ne’e hotu lori konsekuensia boot tebes ba nasaun bainhira ita kualia juventude sira mak sai futuru ba nasaun. Emerenciana Pinto

Facebook Comments

Leave a Reply

Your email address will not be published. Required fields are marked *