Isménio Martins da Silva

Isménio Martins da Silva

- in Perfil
2021
0
PROFIL

IHA loron Tersa, 15 Agostu 2017, Prezidente Repúblika Francisco Guterres Lú Olo halao reniaun ho ekipa FDCH (Fundu Dezenvolvimentu Kapital Umanu) neebe diriji husi Sekretáriu Ezekutivu FDCH, Isménio Martins da Silva iha Palásiu Prezidente Nicolau Lobato.

Ami koalia sobre fundu dezenvolvimentu kapital umanu destinadu ba iha Prezidénsia Repúblika, neebé sira hatete katak, sei iha hodi bele halao atendementu ba sira seluk. Tanba nee, hau husik hela ba sira hodi haré, atu nunee Prezidente Repúblika bele iha mós posibilidade para halo atendementu ba pedidu sira neebé mak mai bara-barak iha Prezidente Repúblika, atu oinsá mak bele halo atendementu ou bele satisfás sira-nia pedidu sira nee,” hatete Prezidente Lú Olo.

Oportunidade neebe mak estadu ka guvernu prepara hanesan bolsu estudu ka formasaun hanesan meus neebe importante hodi prepara jerasaun foun nunee bele partisipa iha kontribuisaun dezenvolvementu Pais Timor-Leste. Ida nee mak liafuan husi Sekretariu Ezecutivu FDCH Isménio Martins da Silva. Nia husu jerasaun foun tenki aproveita, tanba jerasaun 1975 too 1991 oportunidade nee laiha tanba nee tempu ba ukun aan  iha esperansa boot katak estadu la taka matan ba nia ema sira.

Isménio Martins da Silva ka bolu naran iha uma NITO, oan husi aifunan domin Vicente S. O. da Silva (Ossu) no Mira Martins da Silva (Ermera). Nito moris iha Suku Nahareca, Posto Administrativo Ossu, Munisipiu Viqueque iha tinan 42 liu ba.

Agora dadaun Nito asumi kargu nuudar Sekretariu Ezecutivu FDCH neebe tutela iha Ministeriu Planeamentu Investementu e Estratejiku (MPIE). Iha tempu invazaun Indonésia tinan 1975, Nito sei bebé (kosok-oan), ninian inan-aman halai ba abrigu iha foho matebian no iha tinan 1979 ninia família rende tun ba vila mai iha Dili no hahu moris no bo’ot iha Kapital Timor-Leste to’o ohin loron.

Nivel Edukasaun

Husi ninian eskola Primaria too estudo Sekundaria remata iha tinan 1993 (SMAN 2 Dili) no kontinua estudo Licensiatura iha area Literatura Ingleza iha Universidade Jember, Java-Leste, Indonésia husi tinan 1993-1999.

Hafoin mai kontinua fali estudo iha area Lingua Ingleza Fakuldade da Educação iha Universidade Nasional  Timor Lorosae (UNTL) hahu husi tinan 2000 – 2003. Iha tinan 2006 – 2008, hetan fali oportunidade hodi kontinua ninian estudo iha nivel Mastradu ba iha area International Community Development (espesial iha área Formasaun Profissional) iha Victoria University, Melbourne – Austrália.

Alende formasaun akademika formal, Isménio mos hetan oportunidade hodi partisipa iha kursu tempu badak ka nivel sertifikasaun nivel 1-4 iha areas oin-oin, hahu husi area jestaun administrativu, jestaun programas no projetos, planu no avaliasaun, area formasaun profissional no mercadu do traballu, Sistema Informasaun ba Mercadu de Traballu, Mediasaun no Rezolusaun Konflitu, Impaktu Meiu Ambiente ba Projetus, Assuntos Jeneru, Politíka no Humanidade, ICT (Informasaun Komunikasaun no Téknologia) no sira seluk tan. Fatin formasaun ba iha rai-laran no mos ba iha rai-liur iha regiaun Asia, Pacifico, Australia, Europa, America Latina no sst.

Kareira Professional

Iha fali parte karreira professional, hahu kedas iha Maiu 1999, hetan uluk oportunidade hodi servisu ho UNAMET (United Nation’s Mission in Timor-Leste) nuudar durubasa (interpreter) no tradutor (translator) durante preparasaun ba Konsulta Popular (referendum) iha Timor-Leste. Hafoin kontinua servisu ho UNTAET (United Nation’s Transition Administration of East Timor) destaka ba iha Ministerio da Infraestrutura iha tinan 2000 hodi servisu ho Koordenador ba Missaun nian, ho apoiu husi British Aid nu’udar Project Office,  no kontinua kedas iha 2001 muda fali ba Diresaun de Terras e Propriedades iha Departementu Disputa ba Rai hodi promove Land Mediation System (Sistema Mediasaun ba Rai) hola parte iha prosesu alternativa ida ba rezolusaun disputa ba bens no moveis iha Timor-Leste. Durante tinan ida, servisu iha area nee, Isménio konsege akompaña guverno hodi identifika problemas rai iha Timor-Leste liu-liu mos ajuda sai fasilitador hodi foo formasaun ba Mediador sira iha komunidade baze neebe sai nuudar nain ba prosesu ba konflitu rai sira iha Timor-Leste.

Iha fali inicio tinan 2002, governo Canada liu husi CIDA (Canadian International Development Agency) fo fiar ba Isménio nuudar Project Officer hodi tau-matan ba projetos bilateral sira neebe apoiu ba governo RDTL no ba mos ONG nacional no internacional sira neebe servisu ho komunidade sira ba areas hotu-hotu. Iha fali tinan 2004, enkuantu sei servisu ho CIDA Canada, governu Norwegia mos fo fiar ba Isménio nu’udar Country Representative (part-time job) hodi tau-matan ba sira ninian projetos no programas bilaterais sira.

Servisu neebe mak iha rekere dedikasaun barak, tamba iha tempu hanesan, Isménio mos hetan fiar husi UNTL hodi hanorin part-time iha Departmento da Ingleza – FCE (Faculdade da Ciência e da Educação) ba disciplinas Speaking, Listening and Reading ba universitários husi Semestre 1 to’o 4.

Hafoin kontinua tiha ninian estudu ba Australia no fila iha tinan 2008, Isménio hetan oportunidade hodi sai nuudar Assessor Principal iha Sekretaria do Estado da Formasaun Profissional e Emprego (SEPFOPE) husi tinan 2008 – 2011 iha tempu IV Governo Constitucional, no hetan fali oportunidade Sekretario do Estadu hodi sai Adido de Trabalho Timor-Leste nian iha Australia husi fulan Juñu 2011 – Marsu 2014 hodi lobby ba empregador Australiano hodi simu traballadores Timor-Oan nian iha Australia. Iha tempu hanesan iha 2013, Ministerio da Edukasaun mos foo fiar hanesan Adidu da Edukasaun iha Australia too fulan Marsu 2014.

Hahu fali husi dia 01 de Abril 2014, Isménio hetan fali fiar hanesan Secretário Executivo FDCH too ohin loron.

Tuir Isménio oportunidade sira neebe nia hetan hanesan previleizu boot no iha esperansa katak oportunidade hanesan sempre iha ba jerasaun foun, maibe inportante oportunidade nee tenki utiliza didiak ho objektivu servi ba dezenvolvementu Timor-Leste, tamba tuir Ismenio vontade politika husi nain ulun sira, maun boot sira makaas tebes hodi  fo oportunidade ba jerasaun sira tuir mai.

Ba Hau jerasaun milinium tenki iha neon ida katak ita nia nain ulun sira hakarak fo oportunidade,” hatete Isménio ba STL iha nia knar fatin FDCH Kolmera (eis edifisiu Ministeiru finansas) Dili, Kinta (17/8/2017).

Nia hatutan ita ema moris nee primeiru mai husi oportunidade, oportunidade nee kuandu iha ona oinsa mak ita bele uza oportunidade nee ho didiak tan nee ita ita liu husi Pais post konflitu nunee ita hotu-hotu afeita husi funu tamba nee inprinsipiu ita bele halo hodi utrapasa dezafiu sira nee.

Perguntas mak nee, konfiansa husi jerasaun tuan sira nee ba jerasaun foun iha ga lae? “Ba hau konfiansa nee iha maibe oinsa mak ita bele hamutuk, tamba ita nia nain ulun sira sempre koalia oportunidade iha maibe ita la utiliza ho masimu,” dehan Nito hodi hatete nia lema neebe uza mak nee ita utiliza ho didiak oportunidade no haraik aan ba ema hotu-hotu nia diak.

Jovem husi Municipiu Viqueque nee senti previlezu tebes wainhira iha oportunidade, tamba nee Nito sempre utiliza didiak liu husi meus hakraik aan, sakrifika, aprende no servisu nunee bele alkanza nia rezultadu.

Hanesan mos jovem ida, iha ninian tempu livre gosta mos rona no toka muzika no mos halo atividade disportiva. Hahu kedas iha tinan 1990 ba leten, iha mos grupu banda no ikus mak metin ho grupo banda Destino Band neebe ninian batarista ida maak harii fali grupu muzika Inferno Band.

Isménio mos involve aan iha atividades futebol no artes marsiais neebe hahu kedas iha tinan 1991, neebe nia aprende dissiplina no konviksaun moris ho preparasaun mental ida diak atu bele hakbiit nian aan atu ajuda fali ema seluk.

Iha tempu hanesan mos, nia mos involve aan iha atividades juventude iha organizasaun massa no mos atividades Igreja nian inkluindu atividades joven nian iha ninian bairo Matadouro, Suco Vila-Verde neebe nia hela no moris ba hahu husi tinan 1979 too ohin loron.

Isménio iha karakter ida neebé gosta halo konvivensia ho ema seluk, no halibur belun sira hodi motiva atu bele mos sai ema ida util ba nian aan, sociedade no nasaun. Iha ninian vida loron-loron, nia iha lema ida katak “aprende ho diak hodi servi ho haraik-a’an ba ita hotu nian moris diak”.

Antes remata Ismenio hatete nia parte sempre prontu atu kontribui ba nasaun Timor-Leste liu husi area neebe nia dedika aan ba, nunee nia mos sempre hein akompanamentu husi lideransa sira nunee bele sai matadalan ba dezenvolvementu Timor-Leste, “ Prevelezu tebes ba hau atu kontribui ba nasaun ida nee, espera katak iha futuru sei iha nafatin konfiansa husi nain ulun sira,”

Isménio iha esperança boot ba Timor-Leste ninian desenvolvimento nasaun nian. Nia hare katak, komparandu ho pais sira seluk, Timor-Leste iha potencia bo’ot hodi sai nasaun ida neebe bele fo moris diak ba ninian povo sira. Tamba, ita liu husi ona processo naruk id aba ukun aan, povu hahu iha maturidade politica, Ukun-nain sira iha duni atensaun hodi tau-matan ba moris povo no nasaun nian, Timor-Leste iha riku-soin natureza nian neebe barak, ita iha mos relasoens diplomatícas forte ho países no povo viziñu no’mos iha regiaun iha Asiatíco ne’e.

Tan nee destinu nasaun nian, iha timor-oan hotu-hotu nian liman tantu ba jerasaun tuan ’75 nian ka jerasaun foun husi ’91 nian ba too fali jerasaun miléniu nian neebe hahu husi ita restaura ukun aan nian husi inisiu tinan 2000 mai too ohin loron. Natalino Belo

Facebook Comments

Leave a Reply

Your email address will not be published. Required fields are marked *