Impase Influensia Rendimentu Povu

Impase Influensia Rendimentu Povu

- in Economics, Politics
727
0
images

Editor: Godinho Barros

DILI — Impase politik neebe lao iha rai laran, fo impaktu ba rendimentu povu kiik sira nian iha baze, sasan iha loja la folin, rendimentu tun, halo ekonomia rai laran la produtivu. Tanba nee husu lider sira atu solusiona.

Ita triste ho situsaun neebe lao iha rai laran ladun estavel, tanba nee fo influensia ba ekonomia rai laran, sasan neebe faan iha super market no mini market kuaze  lafolin hotu ona, maske presu normal hela, maibe ema neebe atu sosa laiha, tan nee husu lider sira hamutuk rezolve problema rai laran, hodi normaliza ekonomia hanesan uluk, Preokupasaun nee hatoo husi Daniel Magalhaes Lay ba Jornalista Tersa (18/02/2020) iha nia knaar fatin Audian.

Nia hatutan ekonomia iha rai laran dadaun la lao, kompara ho tempu uluk, kada semana tenke hatama sasan mai TL, liu liu nesesidade baziku, tenke importa kada semana, maibe agora bele fulan rua tolu maka foin hatama mai,  no stok nakonu hela maibe sosa nain sira menus.

Rendimentu ami nia  la hanesan ho uluk, agora  rendimentu tuun tebes, kompara ho uluk rendimentu diak, tanba movimentasaun ekonomia lao, liu liu  merkadu de kompra diak tebes, maibe agora merkadu de kompra tun, tenik Lay.

Iha parte seluk Prezidente Camara Comersiu Indutria Timor Leste (CCI-TL), Oscar Lima dehan,  impase ida nee fo impaktu boot ba ekonomia rai laran,  loja boot sira nee la hetan rendimentu, produtu importasaun kontinua menus, loja nain sira importa hela produtu barak mai TL, maibe sosa nain sira laiha, tanba nee susar atu dudu ekonomia ba oin, kuandu situasaun  politika nafatin hanesan nee.

Hanesan mahon ba setor privadu ita preokupa, tanba ekonomia bainhira tun ona, susar atu hasae fila fali, tanba nee husu ba lider sira hakotu lalais impase politika ida nee, ho nunee bele fo hikas moris diak ba povu, liu husi sira nia atividade loron loron nian, dehan Prezidente CCI-TL nee.

Nia afirma katak, ezijensia setor privadu sira nian ba lider sira hamutuk hodi buka solusaun  ba problema rai laran, tanba povu iha rai ida nee hakarak dezenvolvimentu lao diak.

Nunee mos Deputadu Adriano do Nascimento rekonese los duni durante nee setor privadu barak maka halerik, balu too agora governu seidauk halo pagamentu ba obra neebe sira finaliza, no balun halerik tanba sasan neebe faan iha sira nia loja la folin, maske presu normal hela, maibe sosa nain sira laiha.

“Halerik sira nee mosu tanba impase politik neebe lao iha rai laran durante tinan rua nia laran, laiha solusaun. Maibe  korajen nafatin ba setor privadu sira, tanba desizaun iha lider sira nia liman atu hakotu impase nee,” tenik Adriano.* Rep: Madalena Horta

 

Komentariu

Facebook Comments

Leave a Reply

Your email address will not be published. Required fields are marked *