Iha Tempo Udan, Mota Achulaca Ameasa Komunidadae

Iha Tempo Udan, Mota Achulaca Ameasa Komunidadae

- in Distritu
157
0
karauulun1

MALIANA–Iha tempo udan hanesan agora dadaun, komunidade neebe hela besik Mota Achulaca, sempre hetan ameasa husi mota nee. Laos ameasa deit komunidade, maibe ameasa mos edificio Administrasaun Postu Administrativu Maliana no edificio antigu Central EDTL Maliana.

Nunee informasaun husi Administrador Postu Administrativo Maliana, Alipio Moniz ba STL foin dadaun nee iha enkontro ida iha Maliana. Tinan hirak liuba, iha tempo administrador postu tuan, sira sempre haruka proposta ba ministeriu kompetente, para halo netik barajen iha Mota Achulaca maibe proposta hirak nee, laliu iha nivel Sorumutu Kordenasaun Ditrital (SKD) autoridade Municipal Bobonaro.

Iha tempo Portuques, Mota Achulaca ladun boot, maibe tempo ukun an nee, mota sai boot, no fo ameasa ba komunidade neebe hela besik mota ibun, nomos edifisiu estadu sira mak hela besik mota ninin. Tamba ne’e, proposta ba tinan 2017, sira tau prioridade, hodi submete ba autoridade Municipal Bobonaro.

Iha tempo hanesan, Director Servisu Saude, autoridade Municipal Bobonaro, Victor da Costa Martins hateten, persiza halo konstruksaun uma maternidade ba inan partus normal no laboratoriun iha Centro Saude Maliana. Nomos perzisa halo konstruksaun ba Postu Saude Lugululi no uma maternidade ba inan partus normal iha Suku Leohitu, Postu Administrativu Balibo.

Alende nee, Victor sente deskontente tamba proposta atu loke postu saude ida iha Suku Tapo-Memo. Ida nee Prezidente da Republika mak propoin wainhira halao vizita official iha Memo, maibe la liu iha SKD autoridade Municipal Bobonaro. Aleinde nee, Postu Saude Dilai, Suku Lupal, Postu Administrativu Lolotoi, tinan hirak ona maibe la pasa.

Entertanto, Administrador Postu Administrativo Kailaku, Alfredo da Costa Moniz hateten, sira nia parte halo ona proposta ida hodi halo konstruksaun ba Postu Saude iha area Atudara parte foho, halo rehablitasaun ba uma eskola Raiheu no eskola Samutaben, Suku Manapa.

Uma eskola rua nee konstrui iha tempo Indonesia kedas, agora presiza halo rehablitasaun tamba kondisaun lapermiti ona ba estudante sira,” hateten Alfredo.

Director Agrikultura autoridade Municipal Bobonaro, Alexandrino hatete, persiza estabelese klinika animal nian iha Postu administrativo Lolotoi. Iha tempo oin mai, klinika sei atende ba postu Bobonaro no komunidade nia animal iha Postu Lolotoi rasik.

Sefi Departemeno planemento e desenvolmento, Autoridade Municipal Bobonaro, Semedu Lacu da Costa hatete, proposta ida atu aprova, hodi submete ba nivel nasional, desizaun mai husi Sorumutu Koordenasaun Distrital (SKD), maibe bazeia menu indikativo nasional haruka ba autoridade.

Semedu hatete, proposta mai husi linha seitorais, sucu, tenke bazeia menu indikativo. Wainhira hamosu proposta ida mai husi bazeia menu indkativo. Tamba, menu indikativo, nudar gia no mata dalan ida ba to’o implementasaun.

Kuando proposta ne’e submete mai iha sucu, postu, autoridade municipal, kontinua haruka ba nasional la bazeia menu indikativo, mak proposta ne’e sei la pasa,” Semedo hatete.

Nia dehan, PIIM la sai targetu kuantidade ba proposta, maibe persiza hare liu ba kualidade proposta. Tamba nee, antes hamosu planu iha nivel municipio ida-idak, governo nasional, liu husi ninia reprezentante halao ona sorumu ida iha nivel nasional hodi koalia konaba saida mak sai perioridade liu ba komunidade.

“Ita persiza mak kualidade de proposta. Kuando proposta ida tama la tuir menu indikativo. Ita koa kedas, labele submete ba nasional. Kuando proposta la tuir menu indikativu haruka ba nasional, numero deit mak barak, mais la tama kriteria, to’o nasional ema koa kedas,” Semedio hatete. João Mau Leto

Facebook Comments

Leave a Reply

Your email address will not be published. Required fields are marked *