Horta Kontaktu Lider Rezistensia

Horta Kontaktu Lider Rezistensia

- in Politics
239
0
download (2)

Editora: Carme Ximenes

DILI– Eis Prezidente Republika, Jose Ramos Horta sei esforsu makaas, hodi halo kontaktu ho lider rezistensia sira, atu nunee bele ultrapasa lalais impase politika iha rai laran.

Hatete Horta ba Jornalista sira, bainhira remata enkontru ho Prezidente Republika Francisco Guterres Lú Olo, iha Palasiu Prezidente Nicolau Lobato, Bairu Pite, Dili, Sesta (14/02/2020).

 Ohin Prezidente ho nia laran luak, fo tan tempu atu bele simu hau dala ida tan. Foin dadaun hau hasoru malu ho maun boot Kay Rala Xanana Gusmao,  hau koalia mos ho Primeiru Ministru Taur Matan Ruak inklui koalia mos ho partidu politiku sira hotu. Iha tempu badak hau mos espera sei hasoru malu Dr. Mari Alkatiri Sekretariu Jeral, hau esforsu kontinua nafatin dehan Horta.

Nia dehan, liu husi Dialogu neebe  halao Prezidente Republika entrega ba iha Partidu Politiku sira atu nunee bele hetan solusaun, no partidu politiku sira  tenke lori mai iha Prezidente atu hetan solusaun saida mak tenke halo. Husi governu uza mekanismu saida mak atu lao ba oin, iha fulan ida nee ou fulan Marsu nia laran.

Premiadu Nobel ba Pas nee haktuir tan katak,reuniaun entre lider nasional sira ho PR iha loron 10 Fevereiru, Eleisaun Antesipada laos solusaun premeiru, diak liu partidu sira hatudu sira nia matenek atu nunee bele hetan solusaun.

Hau pesoalmente kontinua hau nia esforsu, koalia ho kolega sira lider sira, fera ulun ho umilidade, matenek para hetan solusaun, neebe diak ba intrese nasional, dehan Premiadu Nobel ba Pas nee.

Horta hatete, lider Karismatiku Kayrala Xanana Gusmao  oras nee halao hela serbisu balun, no Xanana kontinua halo konsulta ho partidu CNRT no partidu sira seluk buka solusaun, tanba Xanana iha responsablidade  rai ida nee.

Nia dehan, atu rezolve problema maritima, terestres ho Indonezia nee laos fasil maibe difisil. Xanana laos kaer deit problema partidu nian ka governu nian, maibe haree mos problema neebe mak boot ba intrese nasional.

Maibe Eis aman nasaun nee hatete, bainhira  iha tempu Xanana mos iha obrigasaun atu halo dialogu ho partidu CNRT no partidu sira seluk, atu  nunee bele hetan rezultadu ruma hodi aprezenta ba Xefe Estadu.

Se laiha solusaun, tenke ba duni Eleisaun Antesipada nee ultima rekursu, Horta afirma.

Horta mos fiar nafatin lider sira, hanesan Kay Rala Xanana Gusmao katak, nia  iha kbiit no forsa atu hetan solusaun, no CNRT rasik mos deklara katak, problema nee mosu tanba Prezidente Republika la fo posse ba membru nain sia mak mosu impase, laiha abut seluk tanba nee mak tenke rezolve abut ida nee.

Durante hanesan mediador eis aman nasaun nee mos hasoru malu ho Primeiru Ministru, atu bele hatoo  preokupasaun no ideas ruma, atu nunee tau hanoin hamutuk oinsa mak bele hakotu impase iha rai laran.

Hau hasoru Primeiru Ministru atu halo konfirmasaun hodi hatoo hau nia preokupasaun,tanba ita rona iha midia PLP ho AMP iha koligasaun remata ona, maibe Primeiru Ministru hatudu nia sentidu estadu kontinua garante funsionamentu governu, para labele iha paralizaun, nee mak ami koalia ho Primeiru Ministru no ema ida neebe mak iha sentidu estadu, hakarak kontribui para bele hetan solusaun saida mak diak ba nasaun ida nee, hatete eis aman nasaun nee.

Iha parte ketak antes nee Xefe Estadu Maior Jeneral  F-FDTL Major Jeneral Lere Anan Anan Timur dehan, Lider rezistensia sira presiza hamutuk iha konsensus, atu nunee bele hakotu impase politiku neebe  lao iha rai laran, dehan Jeneral Lere.

Nunee mos Koordenador Redi Observasaun Nasional Eleisaun, Timor Leste Laurentino Alves mos iha esperansa katak, liu husi dialogu neebe mak halo husi lideransa rezistensia sira sei hakotu impase politika neebe mak lao iha rai laran, tanba lider sira  mesak ema neebe mak luta ba rai ida nee.* Reportajen: Emerenciana Pinto

 

 

 

 

Komentariu

Facebook Comments

Leave a Reply

Your email address will not be published. Required fields are marked *