Hetan Tarata Husi GF, Ikus Mai MT Fo Perdua

Hetan Tarata Husi GF, Ikus Mai MT Fo Perdua

- in Metro
97
0
TTD1

Dili-Tribunal Distrital Dili iha loron Tersa, (19/03/2019) liu husi tentativa konsiliasaun, lezada ho inisial MT hakarak dada fila krime neebe, akuza ba iha arguida GF.

Antes tama ba iha julgamentu, tribunal liu husi tentativa konsiliasaun, tanba hare ba krime nia natureza semi publiku lei fo dalan, se lezada aseita bele dada fila.

Tanba nee tribunal liu husi juis prosesu, halo tentativa ba iha lezada, maibe primeru lezada lakohi perdua arguida, tanba la satisfaz ho arguida nia hahalok.

Depois hetan fali esplikasaun husi prokuradora, lezada mos aseita atu dada fila krime nee, maibe lezada husu ba iha arguida atu labele halo tan hahalok hanesan nee, iha futuru.

Hau hakarak perdua arguida, maibe hau husu ba arguida atu loron seluk, labele halo tan hahalok hanesan nee, ”deklara lezada iha sala julgamentu TDD.

Iha fatin hanesan, arguida mos asita ho lezada nia pedidu nee, arguida promete iha tribunal katak, iha futuru nia sei la halo tan hahalok nee.

Hafoin rona tiha husi parte rua, tribunal mos halo advertensia ba iha arguida, husu arguida atu labele halo tan hahalok nee iha futuru. Tenke respeita ema seluk, atu nunee labele hamosu tan problema.

Hafoin advertensia hotu, tribunal mos husu ba iha arguida no lezada atu hadame malu kedan, husu atu problema neebe hakotu ona, labele lori sai ba liur.

Rona tiha husi tribunal parte ministeriu publiku nian solisita ba iha tribunal atu homologa arguida husi instansia. Enkuantu husi parte defeza nian, solisita atu absolve arguida.

Ikus mai juis prosesu absolve arguida husi instansia, sem kustu.

Audensia julgamentu nee prezide husi juis Ivan Suritay, MP reprezenta husi Prokuradora Bemvinda De Araujo, arguida hetan asistensia legal husi Defensor Publiku. Notisia kompletu lee iha jornal STL edisaun Kuarta  (20/03/2019). Terezinha De Deus

Komentariu

Facebook Comments

Leave a Reply

Your email address will not be published. Required fields are marked *