Harohan Hadook Husi Violensia Moris Simples

Harohan Hadook Husi Violensia Moris Simples

- in Headline
172
0
image006

DILI-Festa Natal nuudar biban ba sarani sira atu harohan ba Aman Maromak liu husi Kosok Oan Nai Jesus Kristu neebe mai iha mundu hodi soi ema husi hahalok violensia.

Arsebispu Metropolitana Arkedioseje Dili, Dom. Virgilio do Carmo da Silva, SDB hatete lia hirak nee liu husi homilia iha Selebrasaun Natal, Katedral Dili, Tersa (24/12/2019).

Liu husi Kosok Oan Jesus Kristu nia moris hias, husu sarani sira harohan ba kosok oan atu bele haraik Dame no paz ba sarani ida idak atu nunee iha selebrasaun Natal no tinan foun nee ho unidade no hadook aan husi violensia oin oin, dehan Arsebispu.

Dom Virgilio hatutan sarani sira presiza hatene aan, rekonese aan nuudar ema sala nain, maibe moris kalan nee nian, moris paz no dalan Naroman nian.  Sarani sira presiza duni naroman, paz ida nee mak hun dejezu paz, tan nee hamutuk harohan atu kontente fo aan no didika aan liu atu harii dame. Harohan iha kalan Natal nee laiha violensia, laiha tuda malu no laiha hana malu, hirus malu, asalta malu no estraga malu, no husu kosok oan Nai Jesus neebe mak mai moris iha sarani sira nia leet atu tama iha ida idak nia fuan, ida nee mundu presiza tebes.

Dom. Virgilio husu sarani sira atu hakiak mundu ho paz iha ema ida idak nia fuan atu konstrui paz iha ida idak nia familia no nasaun. No kalan Natal kosok oan mai nakonu ho pas naroman nia no naroman neebe mak mai husi Jesus neebe mak kompletu tebes no hakarak ema hotu hakbesik hodi atrai. Liu husi kosok oan nia moris lori naroman, no halakon nakukun iha ema ida idak nia laran.

Ohin naroman nee mosu mai ita, nia maksoin moris mai, ita povu neebe mak moris iha nakukun laran, hare naroman boot ida nee, dehan Dom Virgilio.

Arsebispu nee sita profeta Izaias nia liafuan ida iha momentu nee povu atrabesa hela iha dalan nakukun, basa povu neebe mak moris iha presaun, teror violensia no povu ida nee terus duni iha nakukun no iha momentu ida hanesan nee mak profeta mosu hodi Nai Maromak nian naran haklake paz no fo hikas esperansa ba povu ida nee ho prezensa jJsus nia liafuan hakmaan povu nia terus.

Bibi atan uma kreda husu sarani hotu liu husi kosok oan nia moris ida nee lori ksolok paz ba mundu, familia ida idak loke fuan ho laran, rai domin iha familia, sosiedade no nasaun, nunee iha sosiedade neebe mak nakonu ho paz naroman mundu nian. No kalan Natal ida nee kalan ksolok nian no kalan naroman nian no laos kalan babain ida.

Dom Virgilio dehan Maromak la baruk atu buka nia povu, maibe ema ida idak mak sai obstaklu ba ksolok ida nee. Tan nee husu atu harohan atu sarani hotu bele moris iha paz no liu husi naroman nee halakon nakukun sira iha fuan no leet atu bele fo moris dame no paz iha sosiedade nia leet no ida idak nia fuan.

Iha selebrasaun Natal nee Dom Virgilio harohan ba Nai Kosok Oan neebe mak halo aan kiik, mai moris iha bibi luhan nee atu rona povu sira nia halerik, halakon nakukun sira iha ema ida idak nia fuan hodi bele moris iha paz no dame nia laran.

Maromak tuir Dom Virgilio Dame nain, rona netik  harohan dala barak ona buka atu rezolve konflitu ho forsa rasik no iha momentu neebe mak nakukun halakon esperansa, dalabarak mos diskursu hotu lakon saugate deit, tan nee husu nai nia tulun atu haraik  dame, hanorin atu iha dame, lori dame, loke fuan atu dehan lae ba violensia no violensia naksobu kuda iha korajen atu konstrui Dame, Nai Abrao sira nian Maromak profeta sira nia Maromak no Maromak domin nain haraik mai atu moris hanesan maun alin ho ema hotu.

Haraik mos mai ami atu sai instrumentu dame nian no tulun mos ami iha kapasidade hatene apresia husi ema seluk, harohan dom Virgilio.

Arsebispu nee harohan mos ba Nai Jesus atu halakan ahi esperansa nian atu hakaas aan ho pasensia buka halo dialogu no iha ligasaun atu nunee bele hetan duni paz no halakon ema ida idak nia fuan neebe mak ho odiu no violensia no halakan fuan ho domin no paz.

Bibi Atan nee husu sarani sira loke fuan ho domin,  paz atu nunee Maromak neebe halo aan sai kiik nee bele tama atu hadok tiha nakukun aat neebe mak ukun nee atu nunee ema ida idak bele moris iha domin, dame no paz nia laran.

Selebrasaun misa kalan nee partisipa husi Prezidente Republika Francisco Guterres Lu Olo ho espoza inklui mos membru governu balun no sarani neebe  partense iha Katedral Dili.

Moris Simples no Haraikaan

Selebrasaun misa Natal Igreja Nossa Senora Imaculada Konceicão Balide, Amo Paroko Pe. Graciano do Santos Baros husu sarani parokia Balide atu banati tuir Jesus Kosok Oan.

Tuir nia Jesus Kosok Oan nia moris manifesta  domin Nai Maromak nian neebe aas liu hotu, ho Jesus nia prezensa fo garantia ba ema atu moris hakmatek iha dame, iha trankuilidade nia laran, iha amor, iha paz, iha karidade no simplisidade, haraik dame no simplisidade, paz no trankuilidade.

Pe. Graciano do Santos Baros, liu husi nia homilia iha selebrasaun misa Natal kalan iha Igreja Nossa Senora Imaculada Konceicão Balide, Dili, Tersa (24/12/2019).

Iha Homilia nee Pe.Graciano dehan, Natal uluk nanain selebra misteriu boot neebe hanaran misteriu inkarnasaun, katak Nai Maromak nia liafuan, hola isin ida sai hanesan ema.

Ita hare no rona bebeik iha leitura sagrada sira katak Nai Maromak, hatoo nia promesa ba Israel nia beiala sira, ba profeta no liurai sira no povu Israel tomak katak sei mai Mesias salvador ida neebe sei salva povu tomak husi ukun aat mundu nee ninian, dehan Pe. Graciano.

Nia relata Jesus Kosok Oan moris mai ho forma ida neebe simples liu, liu husi forma labarik ida, bebe ida neebe moris iha kalan ida nee, Nai Maromak la mai hakbesik ema hanesan ema boot, liurai ou prezidenti ida neebe vizita nia povu, maibe liu husi labarik ida neebe moris iha ema nia leet.

Hare kosok oan Jesus neebe toba hela iha prezepiu iha gruta nia laran, oferese mai ita atu hare no kontempla iha ita nia realidade, iha parte ida ita hare buat simples no kiik sira hanesan forma no prezensa Nai Maromak ninian, tenik Pe. Graciano.

Iha parte seluk katak Graciano buat simples no kiik sira, manifesta identidade lolos no autentiku ita ema hanesan illas Maromak ninian, Jesus Kosok Oan manifesta realidade nee, dignidade Maromak ninian no autentisidade ita ema ninian.  Jesus kosok oan hanorin ema  atu moris iha simplesidade, haraik dame no laran mos, Jesus kosok oan fo hanoin mai ita atu hatudu  domin respeita no fiar metin ba Nai Maromak, Jesus kosok oan mos fo hanoin atu hadomi sira neebe kbiit laek no abandonado. Jesus kosok fo hanoin atu respeita kosok oan sira neebe moris no respeita no tau matan ba pesoal funerabel sira, sei moris dook husi realidade neebe temi dadauk.

Natal mos sai hanesan pasajen ida, Nai Maromak halo pasajen ida husi lalehan aas tun, mai rai husi dignidade Maromak nian, hola isin ida sai hanesan ita ema, finalidade husi pasajen nee mak salvasaun ita ema iha mundu, dehan Pe.Graciano

Jesus kosok oan manifesta  domin Nai Maromak nian neebe aas liu hotu, ho Jesus nia prezensa fo garantia ba ema atu moris hakmatek iha dame, iha trankuilidade nia laran iha amor, iha paz, iha karidade no simplisidade, haraik dame no simplisidade, paz no  trankuilidade hetan iha Nai Jesus kosok oan, nunee mos atu bele moris iha domin, dame, moris hakmatek, tenke banati no moris tuir Jesus Kosok Oan, Jesus Kosok Oan prezenti ida rohan laek mai ema, ba domin no dame, simplisidade, haraik aan no moris hakmatek, boas Festa do Santo Natal ba hotu-hotu.

Selebrasaaun misa Natal kalan iha Igreja Nossa Senora Imaculada Konceicão Balide, hetan partisipasaun masimu husi sarani sira iha parokia Balide. Crisogono Magalhães/ Emerenciana Pinto

 

Komentariu

Facebook Comments

Leave a Reply

Your email address will not be published. Required fields are marked *