Haree Malu Diak, DT Perdua MB

Haree Malu Diak, DT Perdua MB

- in Metro
48
0
TTD1

DILI-Lezadu Deolindo Tome (DT), perdua arguidu Marcelino Barreto (MB) iha Tribunal Distrital Dili (TDD), tanba sira haree malu diak fali ona.

Antes atu tama ba iha julgamentu, tribunal liu husi tentativa konsiliasaun husuba lezadu aseita atu bele dada fila krime nee, lezadu mos aseita dada fila.

Hau hakarak krime nee bele dada fila, maibe husu arguidu atu labele halo tan hahalok nee, iha futuru,”deklara lezadu iha Sala Julgamentu TDD, Kinta (7/3/2019).

Lezadu aseita, razaun tanba lezadu tolok uluk, maka arguidu foin lori fatuk tuda lezadu. Arguidu mos deklara, arguidu tuda lezadu ho fatuk, tanba lezadu hasai lia-fuan mal ba arguidu.

Iha fatin hanesan, arguidu mos aseita bainhira lezadu hakarak dada fila krime nee, arguidu husu kedan deskulpa ba lezadu, promete sei lahalo tan hahalok nee iha futuru.

Rona tiha husi arguidu no lezadu, Ministeriu Publiku (MP) husu ba tribunal atu homologa arguidu.

Nunee mos, husi parte defeza husu ba tribunal atu absolve arguidu.

Rona tiha husi parte rua, tribunal mos absolve arguidu husi krime nee sem kustu.Maibe tribunal husu ba arguidu no lezadu, tenke komprende malu, labele halo tan hahalok nee, iha future,tanba nee ezemplu neebe ladiak.

Tuir akuzasaun husi MP neebe tribunal lee sai katak, iha loron 26 fulan Fevereru 2018, iha oras tuku 2:00 kalan, lezadu Deolindo Tome hamutuk ho testamuna Vasco, Martinha ho Alicia, sai husi uma ba sosa etu kinur iha Aimutin.

Bainhira sira sosa hotu fila ba uma, lao iha dalan arguidu lori fatuk, tuda kona lezadu nia ulun rezulta kanek. Lezadu nia kolega halai ba iha uma, hodi fo hatene ba sira nia familia.Mai iha fatin buka arguidu atu husu tuir, maibe arguidu laiha, tanba nee sira ba hato keixa.

Konsekuensia husi arguidu nia hahalok nee, halo lezadu sente moras iha ulun.

Arguidu hanesan autor ba krime ofensa integridade fisika simples neebe previstu iha artigu 145 husi KP.

Audensia julgamentu nee, prezide husi juis singular Ana Paula, Ministeriu Publiku reprezenta husi Prokurador Renato Bere Nahac, arguidu hetan asistensia legal husi Defensor Publiku. Terezinha De Deus

Komentariu

Facebook Comments

Leave a Reply

Your email address will not be published. Required fields are marked *