Graduasaun DITKREO Nain 56, Simu Konfere Grau Akademiku

Graduasaun DITKREO Nain 56, Simu Konfere Grau Akademiku

- in Distritu
7136
0
DIT Graduasaun

AMBENO-Dili Institute Of Technologi (DIT) Kampus Regional Oecusse (KREO) halo graduasaun ba dala IV ba estudante finalista nain 56 (feto nain 17, mane nain 39).  

Solene Graduasaun ba dala IV nee foti tema “Hakbiit Ita Nia Aan via Disiplina no Konsistensia Dezenpemha Hodi Servi” nee halao iha Kampus DITKREO iha Bairu Palaban, Suku Costa, Sub-Rejiaun Pante Makasar, Oecusse, Sesta (8/12/2017).

Iha ninia diskursu, Reitor DIT Sentral, Alvaro Menezes Amaral hatete, ba tinan ida nee, DIT sentral halo graduasaun ba dala IX ba estudante nain 495 no DITKREO nain 56. Graduasaun DIT sentral ba dala IX nee, total estudante barak liu fali tinan sira uluk nian. Numeru dosente no fasilidade iha DIT sentral mos aumenta hodi posibiliza estudante sira para halo sira nia estudu ho diak. Nunee bele konklui sira nia estuda lalais.

Sesta semana kotuk, estudante DITKREO nain 56 simu ona sira nia sertifikadu nudar lisensiadu. Maibe buat neebe sira simu, foin pasu primeiru, aban bairua sira sei infrenta dezafius barak liutan (atu hetan servisu ruma) tanba agora kompetisaun makaas. Maske nunee, nia husu graduadu sira hotu, sai nafatin estudante iha sira nia vida tomak. Ho nunee sira bele aprende nafatin saida mak sai valor diak iha sira nian vida.

Nudar lisensiadu, sira iha ona matenek, sira nia ain iha sira nia sepatu laran hodi halo transformasaun ba sira nia familia, kolega no bele transforma ba nasaun. “Lao ba, labele tauk. Imi agora sai ona Embaxador Perfeitu DIT nian ba komunidade. Hatudu hatudu ba komunidade katak, DIT laos deit naran maibe ninia graduadu mos iha kualidade atu kontribui ba desenvolvimentu nasaun ida nee,” hateten Alvaro Menezes Amaral.

Tema graduasaun katak, “Hakbiit Ita Nia Aan via Disiplina no Konsistensia Dezenpemha Hodi Servi”, nia esplika, signifikasaun teme nee hakarak esplika klaru katak, prosesu aprendiziajen laos deit produs IPK (Indeks Prestasi Komulatif) maibe oinsa estudante melhor iha sciensia espesifiku ruma.

Rrezultadu peskizador husi Amerika, Thomas Stanley, hatur ona kategoria hamutuk 100. Ida, fatores neebe determina ema atu hetan susesu. IPK neebe aas la tama iha numeru 1 too 10 atu halo ema hetan susesu maibe iha liu numeru 30. IQ neebe as latama iha numeru 1 too 10 maibe monu iha numeru 21.

Fatores determinante atu hetan susesu, tuir Thomas Stanley, maka honestu, disiplina, liga ema seluk, apoiu husi fen ka laen, servisu makaas liu ema seluk, hadomi O nia servisu. Ho referensia sira hanesan nee, fo mensajen ba ita konaba importansia disiplina no konsistensia desempenha hodi servi nafatin ba komunidade no nasaun.

Entretantu, Direktur DITKREO Lamberto Salu esplika, prezensa DIT iha Oecusse nudar ensinu superior. Nudar pasu ida hodi fo honra no valorizasaun ba komunidade Oecusse. I DITKREO sai fatin buka matenek nian.

Ba lisensiadu nain 56, nia dehan, disiplina graduadus tomak durante nee kumpri ona sira nian obrigasaun formais tuir tempu neebe determina. I nia husu sira hotu, labele uja sira nia lisensiadu sai masin neebe hamoruk buat midar maibe tenki uja hanesan masako hodi hamidar buat moruk.

Iha sosiedade akademika, nia dehan, rekere minima buat tolu ba sira hodi haktuir. Ida maka disiplina, nee hatudu liu husi hahalok no tenki sadere ba rasionalidade sein hakore an husi etika no fiar. Segundu, konsistensia ba hahalok neebe lafo deit vantajen ba an rasik maibe mos fo vantajen ba sosiedade. Terseiru, disiplina no konsistensia, hodi hamosu produktividade. Nee sei hasae sira nia dezempenha iha sosiedade nia leet.

Fondasaun ba buat sira nee hotu maka haraik an, rona ema seluk, servisu badinas no kontinua aprende iha kualker tempu no fatin.

Hau husu ba imi atu aprende makaas, servisu badinas hodi ajusta imi nia an tuir mudansa neebe iha. Hasae imi nia kompetividade sein halakon imi nia identidade nudar Timor oan,” hateten Salu.

Sira nia estudu remata ona maibe aprende sei la hotu. I professor boot liu hodi avalia sira nian aan maka “long life apprehensife”. Nee  maka sosiedade no mercadu servisu. “Hau husu imi tenki halo buat diak ruma iha sosiedade para sosiedade senti imi nia prezensa no marka  imi nia historia diak iha sira nia leet. Labele sai fali parte problemador ba povu no nasaun. Ohin, DITKREO husik fali imi ba fali imi nia familia no sosiedade. Fila ba hodi servi povu no nasaun ho dignidade. I labele haluha mos imi nia knua DIT no DITKREO, fila mai ita hamutuk hodi haburas no hametin nafatin. Sai nafatin matan sciensia no teknolojia hodi transforma ba sosiedade,” hatete Salu. Abilio Elo Nini

 

Facebook Comments

Leave a Reply

Your email address will not be published. Required fields are marked *