Graduadus Tenke Sai Lider Transformador

Graduadus Tenke Sai Lider Transformador

- in Edukasaun
17
0
DIT-Graduasaun

DILI-Graduadus neebe remata estudu iha Dili Institute of Tecnhology (DIT) tenke iha mehi neebe boot, uza matenek hodi serbii, halo kreatividade ho inovasaun para bele sai lider transformador  bazeia ba kultura akademika.

Magnifiku Reitor DIT, Alvaro Menezes Amaral, PhD hatete, DIT  nuudar ensinu superior neebe harii iha 10 Maiu 2002, too 29 Novembru 2019,   produs ona matenek nain hamutuk 3.245 iha jornada  tinan 17 nia laran.

Tanba nee nia  husu ba graduadu hotu atu iha mehi nebe boot, uza matenek hodi serbii, halo kreatividade ho inovasaun, halo transformasaun ba iha familia, kolega no transforma ba nasaun doben Timor Leste.

Husu ba imi atu iha mehi neebe boot, uza matenek hodi serbii, hodi halo kreatividade ho inovasaun, hodi halo transformasaun ba ita nia familia, kolega, e transforma ita nia nasaun. Imi agora sai ona embaxador perfeitu  DIT nian ba komunidade, tamba nee, hatudu ba katak DIT laos boot deit iha naran, maibe nia graduadus mos iha kualidade atu kontribui ba dezenvolvimentu,dehan Magnifiku Reitor DIT, Alvaro Menezes Amaral, PhD, liu husi nia diskursu iha serimonia Graduasaun Ba XII  Tinan 2019 iha Hall DIT Ai-Meti Laran, Dili, Sesta (29/11/2019)

Nuudar Reitor no Prezidenti Senadu Akademiku DIT,  Dr. Alvaro Menezes  hatete katak  loron 29 Novembru 2019, sai hanesan momentu importante dala ida tan ba vida akademika iha DIT.

Tan nee ksolok boot ba hau nuudar Reitor no Prezidenti Senadu Akademiku DIT hodi dala ida tan konfere grau akademiku ba estudante finalista sira. Momentu ida nee mos sai espesial tebes tanba horiseik (Kinta-Red.) Nasaun Timor Leste komemora loron Proklamasaun Independensia ba dala 44,tenik Reitor Alvaro.

Liu husi oportunidade ida ne’e, Reitor Alvaro aprezenta ba publiku katak total estudante finalista nebee tuir seremonia graduasaun ba dala sanulu resin rua iha tinan 2019 hamutuk 307. Husi total ida nee, School of Engineering and Science (ema nain 48), School of Petroleum Studies (ema nain 119), School of Business and Management ((ema nain 82), ho School of Tourism and Hospitality (ema nain 58). Husi graduadu 307 neebé simu ona sira nia graduasaun iha DIT, estudante finalista nain 12 mak tama iha klasifikasaun ka kategoria hetan valór diak ho indeks prestasaun 3,35.

            Tuir nia, susesu nebee selebra liu husi seremonia solene nee foin maka pasu dahuluk, tanba loron aban sira sei enfrenta dezafius barak liutan, situasaun problematiku boot liu tan. “Iha loron Sabadu liu ba, Aman husi graduadu ida hamrik  iha palkua nee hodi fo korazen ba imi.

 Nia dehan katak, imi lapresiza triste ba saida mak akontese horseik,  lalika tauk ba saida mak aban sei akontese, tanba ohin imi preparadu ona hodi hasoru bainrua. Horseik bele kalohan metan los! Ohin bele udan bootl! Aban bele aat liutan! But You Never Give Up! Tanba bainrua sei mosu loromatan,” katak Reitor Alvaro.

Reitor DIT, Alvaro Menezes informa katak DIT iha programa estudus hamutuk 12, husi nee 10 mak akreditadu ona. Ida nee hatudu katak DIT iha kredibilidade akademiku tomak ba divulgasaun no difuzaun konhesementu no siensia hodi tulun formasaun no kapasitasaun ba joven Timor oan sira.

Tinan oin, DIT loke tan Programa Estudu Kontabilidade (Accounting) tamba seitor privadu liuliu kompanha lokal, nasional, no internasional preokupa tebes ho numeru lisensiadu kontabilidade nebe kualifikadu menus tebes.

Liu husi diskursu nee, Reitor Alvaro hatoo dezenvolvimentu nebe DIT hahu tiha ona no kontinua halo hanesan, estabelese asesor internal DIT nian hodi halo monitorizasaun no avaliasaun ba materia no referensia nebe dosenti sira uza hodi transfere no komunika siensia e konhesementu ba estudante DIT.

Agora daudaun DIT iha ona funsionariu permanente hamutuk 183. Husi numeru nee, dosente permanente hamutuk 131 nebe kompostu husi doutoradu hamutuk 10, kandidatu doutor hamutuk 13 no sira seluk ho nivel mestradu. Tinan 2019 nee, dosente DIT nian nebe ramata tan estudu iha nivel mestradu hamutuk nain 15 no doutoradu aumenta tan nain 8. Tinan ida nee mos dosente konvidadu husi universidade rai liur ho grau Full Professor e agora daudaun hanorin iha DIT hamutuk nain 6,nia informa.

Kona ba Fasilidade, katak Reitor Alvaro, tinan ida nee DIT finaliza konstrusaun edifisiu foun ho sala hanorin hamutuk 8. Tinan oin, DIT sei aumenta tan edifisiu foun ida tan hodi kompleta sala hanorin hamutuk 42. Dosentes programa Estudu hot-hotu bele ona asesu internet iha kampus DIT.

Numeru biblioteka online barak mak Dosentes DIT bele asesu no Laboratoriu DIT nian hanesan iha area engenharia civil, mekaniku, komputador, engenharia petroliferu, ekonomia e bisnis, ho turizmu e hospitalidade kontinua aproveita ho diak.

Nia mos hatete katak  dosente DIT hot-hotu intensivamente tuir formasaun lian ingles. Ida nee fasilita dosente diak liutan hodi asesu ba informasaun no livru referensia, no artigu sientifiku nebe kuaze maioria iha lian ingles. Informa iha nee mos katak dezde 2013, DIT hahu tiha ona introdus lingua ingles intensivu iha prosesu aprendijazen DIT nian liu husi Eskola Superior Turizmu no Hospitalidade. Tinan 2018 too agora nee, lingua ingles intensivu ba estudante DIT introdus tomak ona iha programa estudus hot-hotu.

Tuir nia,  Programa Mestradu (Master of Business Administration) nebe estabelese ona iha DIT no hetan lisensa husi Ministeriu Edukasaun dezde 2018 kontinua lao ho diak tebes. Estudante ba Programa Mestradu DIT nian too ona terseiru turno no primeiru turno tama ona iha faze halao peskiza no hakerek teze. Tuir planu, tinan 2 tan DIT hahu loke programa Doutoramentu.

“DIT mos kontinua kampanha hodi promove boa governasaun hodi proteze intereses inan-aman nian no publiku ba kualidade ensinu no aprendijazen. Nunee, fiar nebe publiku no inan aman sira tau mai iha DIT bele nakfilak ba rezultadu nebe diak no kualidade duni,” katak nia.

Atu remata ninia diskursu nee, Reitor Alvaro hatoo apresiasaun nebee aas no obrigadu wain ba Governu Timor-Leste, liu husi Ministeriu Edukasaun Ensinu Superior, Siensia no Kultura, the University of Western Australia, Victoria University, Australia, Universitas Udayana, Australian Volunteer International (AVI), Volunteers Service Abroad (VSA), New Zealand, Engineers Without Borders, MPRM, INAP, ANP, Timor-Gap EP, Conoco-Phillps, Slumberger, Bank Mandiri, BNCTL, KIESPTL no seluk tan nebe nia labele temi ida-ida nebee sai parseria diak ba DIT.

Hau mos hatoo agradese wain ba inan-aman graduadu sira nebee fo fiar ba DIT hodi eduka imi nia oan sira. Mos hatoo obrigadu wain ba sivitas akademika DIT hotu ba imi nian vontade diak, komitimentu makas ho servisu la kolen no solidu hodi lori DIT too hetan naran diak iha sosiedade ho industria. Ikus liu lori familia boot DIT nia naran hatoo gracias ho profisiat ba graduadu ho nia inan aman-sira. Espera imi hotu susesu iha imi nia kareira,hatete Reitor Alvaro Menezes Amaral.

Entretantu, Dr. Teressa Freiatas Belo, B. Bus, MM, liu husi nia diskursi sientifiku husu ba ba graduandu 307 haka´as aan ba atu sai lider transformador ida diak iha sosiedade bazeia ba kultura akademika, sosial no espritual timorense ba Timor-Leste 2030. Atu sai lider tranformador ida diak tenke brani moris hamutuk ho sosiedade hodi nunee bele dezenvolve di´ak futuru ida di´ak iha sosiadade.

Ita nia sosiadade sira barak mak moris hela iha liña pobreza nia okos. Ne’eduni koñesimentu neebe imi hetan iha DIT sai nuudar kapitál ida. Tan ne’e imi tenke hatudu rezultadu servisu iha sosiadade nia le’et,” dehan Teresa.

Nia dehan ba graduadu sira katak indikador neebe sai sasukat katak TL sei iha problema sosial mak kiak, analfabetu, má nutrisaun, problema ekonomia. Tanba nee mak DIT iha papel importante liu husi ninia ema sira neebe mak finaliza ninia estudu fila fali ba sosiadade hodi transforma moris sosiadade nian.

Misaun DIT nian forma ema laos atu hetan serbisu maibe forma ema atu kria serbisu ba ema seluk. Tanba nee mak graduante sira tenke prepara aan didiak hodi transforma vida ema seluk nian liuhusi problema sosiál ne’ebé iha,” katak nia.

Doutoramentu Teresa Belo hatete katak rezultadu lisensiatura neebe mak graduadu sira simu ona nuudar dalan ida atu hahú lori moris foun ba povu, koñesimentu no matenek ne’ebé DIT fo ona, nu’udar bukae ida atu motiva ninia luta ba futuru ida di´ak hamutuk ho sosiadade.

Iha fatin hanesan, Prezidente Konsellu Permanenti, Estanislau Saldanha, PhD, hatete nia senti kontenti no agradese ba inan-aman neebe mak tau fiar ba iha DIT hodi suporta oan sira to’o finaliza sira nia estudu.

Agradese tebes ba inan-aman sira tanba bele tau fiar mai ami nia institute ida nee, hodi sustenta oan sira to finaliza,”dehan nia.

Estanislau hatete, DIT senti orgullu tebes tanba bele finaliza nia estudante sira ba dala XII, maibe sira mos espera katak sira nafatin tau prioridade oinsa mak bele halao futuru ho fuan, nunee bele serbi ba nasaun ida nee hanesan mos DIT nia moto katak matenek nodi serbi.

Nia mos dehan tan katak, DIT tenki hakas aan nafatin atu nunee bele asegura nesesidade iha rai laran. DIT hakarak ho fuan tomak atu hadia kualidade atendimentu neebe mak diak liu husi prosesu digitalizasaun.

“Ita husu nafatin kona ba mesin ka makina sira neebe ho obra no buat hotu hotu, hanesan prosesu ida neebe ita mak deside. DIT kontinua reza makas atu haforsa estudante foin sae sira nia kapasidade no buka atu redus buat neebe mak la diak ba sira no DIT, mos prontu atu buka nafatin fatin neebe mak diak ba estudante sira atu bele halao sira nia estudu ho diak,” katak nia. ESTI 05

Komentariu

Facebook Comments

Leave a Reply

Your email address will not be published. Required fields are marked *