Governu La kompletu PN Husu Establse Prazu Ba PR

Governu La kompletu PN Husu Establse Prazu Ba PR

- in Nasional
105
0
logoqstll

DILI-Too agora ema hotu hein hela pozisaun Prezidente da Republika, atu fo tomada da pose ba membru Governu nain 9 neebe maka too oras nee seidauk iha ninia Ministru. Tanba nee too ona tempu atu establese prazu ba Prezidente da Republikua, too bain hira VIII Governu hamrik iha inserteza ida nee.

Lamentasaun nee hatoo husi Vise Prezidente Parlamentu Nasional, Maria Angelina Sarmento ba STL Segunda (22/07/2019) iha nia knaar fatin Parlamentu Nasional.

“Hau hanoin too ona tempu atu governu liu liu Primeiru Ministru neebe durante nee ba halo dialogu ho Prezidente da Republika, tenke establese ona prazu, too bain hira maka prezidente da Republika atu fo pose ba membru governu nain sira neebe, naran tama ona iha lista, no agora sei pendete hela husi Prezidente da Republika, no bain hira maka ita hamrik iha inserteza ida nee,”dehan Vise Prezidente Parlamentu Nasional.

Nia mos afirma liu tan katak, membru governu nain 9 neebe maka seidauk simu pose nee, ninia impaktu direita ba povu ida nee,  tanbva povu iha diretu atu asesu ba rekursu estadu nian, liu husi orsamentu jeral do estadu neebe Parlamentu nasional aprova tiha ona, no atribui ba kada ministeriu.

Ministeriu sira neebe liga direta ba povu nia moris nee maka, too agora seidauk simu pose, hanesan Ministeriu Finansa, Turismu Komersiu Industria, ministeriu Saude,Ministru Estatal, tan nee presiza hare tanba Ministeriu 9 nee liga direta ba povu iha baze.

“Hau hanoin too ona tempu Prezidente da Republika atu prudente hare situasaun sira nee, laos hare deit ba kestaun politika maibe konsensia atu hare ba povu nia moris, no oinsa maka atu lori moris diak ba povu ida nee, no atu lori moris diak ba povu maka tenke liu husi ema sira neebe atu ezekuta programa sira nee, maka hanesan Ministriu 9 nee,”dehan Vise Prezidente nee.

Tuir nia katak, ministru sira neebe maka hetan nomiasaun nee mai husi partidu neebe povu fo fiar ba, ou manan iha elisaun ida nee tanba nee koligasaun ida nee atu nomia se deit, no knaar Prezidente da Republika nian maka atu fo pose ba ema neebe povu hili on aka partidu koligasaun hili ona.

Iha fatin hanesan Prezidente Parlamentu Nasional, Arao Noe hatutan, eme hotu lamenta no publiku iha razaun atu preokupa, tanba governu la kompletu maka ezekutasaun osan, programa no planu lao ladun diak, maibe nee kompetensia Prezidente da Republika nian, atu fo pose ka lae.

“Hau hanoin ema hotu hein hela, no presiza governu neebe kompletu atu nunee bele fasilita servisu no ezekutasaun orsamentu iha Ministriu sira nee,”dehan Prezidente Parlamentu Nasional   Arao Noe.

Nia mos afirma liu tan katak, Primeiru Ministru hanesan Xefi do governu no kondidatu husi partidu koligasaun sira hotu, no hili membru governu sira nee mos lori tempu neebe naruk, karik Primeiru Ministru dehan sei la troka kandidatu ida karik laiha justifikasaun legal konaba sira nia problema, tan nee knaar Prezidente da Republika nian maka atu fo tomada da pose.

“Ita Preokupa tanba governu ida nee sei kontinua lao ho ain tolu,  tanba nee ita mos labele ezije governu nia servisu, maibe tenke responsablidade ita hotu nian, tanba sa maka governu ida nee la kompletu,”dehan PPN.

Nunee mos Deputadu Francisco Branco hatutan, lista governu neebe sei pendetente hela, no agora seidauk simu pose, nee kompetensia Primentu Ministru no Prezidente da Republika nian, tan nee hanesan Deputadu la interven iha laran. Madalena Horta

Komentariu

Facebook Comments

Leave a Reply

Your email address will not be published. Required fields are marked *