Governu Kaer Metin Politika Tuan

Governu Kaer Metin Politika Tuan

- in Economics
75
0
Aniceto

DILI-Governu da ualu kaer nafatin politika fiskal tuan husi Governu AMP, maske la serve ona tau osan barak hodi aumenta despeza publika no provoka  kresimentu ekonomiku 5,1 iha 2019, no 7,2 iha 2020.

Kresimentu real la depende deit osan boot ka kiik, maibe depende ba fatores oioin. Governu hakarak apresenta kresimentu ekonomiku nao petrolíferu ida solidu, no ho kualidade atu lori Timor Leste ba iha mehi atu sai hanesan paiz rendimentu mediu alto iha 2030, neebe hatuir Planu Estratejia  Dezenvolvimentu (PED).

Hare ba kotuk 2012 ho orsamentu $1.8 billoes , hetan kresimentu real 5.7%, enkuantu 2016 nian ho orsamentu aprovadu $1.952 billoes, boot liu ituan proposta orsamentu 2020 nian, kresimentu real 5.1% deit, Signifika kresimentu real la depende deit osan boot ka kiik, maibe depende ba faktores oioin no komponente PIB sira seluk, hanesan iinvestimentu privadu, balansu komersial no seluk tan, dehan Xefi Bankada Fretilin, Aniceto Guterres liu husi deklarasaun politika iha  diskusaun PJE  2020,  PN Tersa, (02/12/2019).

Nia informa liu tan katak, fator neebe determinante mak ezekusaun orsamental de faktu, ezekusaun orsamentu 2019 kuaze la lao, liu liu iha kategoria kapital dezenvolvimentu, neebe halo ema hotu sente katak ekonomia la funsiona ho diak, no krize governasaun durante tinan ida ho balun.

Too Outubru 2019, ezekusaun real 55% deit, ida nee mos barak liu mak mai husi kategoria despezas rekorentes nian,  despezas neebe fasil atu implementa.

Dala barak politiku sira,  membru Governu,  buka justifika tun sae hodi dehan, ezekusaun menus tanba “impasse politika” no membru governu la kumpletu. Maibe nee argumentu falsu, argumentu atu subar deit inkapasidade governu nian, tanba ema hotu hatene mediokrecidade membru governu sira, diretores no xefe departementu foun sira neebe nomeadu tuir kor partidu, no membrus partidu politiku sira.

Fator  sira nee hotu maka, IMF iha nia projesaun hatete katak, 2019 kresimentu real 3.9% maibe Governu dehan katak 5.1%. Ba tinan 2020 nian, IMF, Banku Mundial, no ADB dehan katak kresimentu 4.9%, depois husi 2020 too 2030 nia media mak 5%. Entaun, 5.1% nee numeru mai husi nebe, sura halo nusa ? Ida fali 2020 nian 7.2% nee iha neebe  bele siik kualker numeru ida hodi halo politika no bosok malu, maibe  la fo konfiansa ba investor sira atu kuda sira nia osan iha Timor Leste. Investor rai liur, sira fiar liu instituisoens ho kredibilidade hanesan IMF no Banku Mundial, duke dadus TL no prozesaun sira neebe la kredivel. Investimentu privadu mos nuudar komponente esensial ida atu dudu kresimentu PIB,  kria empregu, kombate kiak no haburas ekonomia.

Dadus kresementu real hahu husi tinan 2012 depois de lansamentu PED iha 2011 mai too 2018, kresimentu real Produtu Internu Bruto  PIB nao petroliferu mak hanesan tuir mai:

  • 2012 : kresimentu real 5.7% husi estimativa 13%.
  • 2013 : 4%                                12.7%;
  • 2014 : 7%                                12.5%;
  • 2015 : 5%                                11.7%;
  • 2016 : 1%                                12.4%;
  • 2017 : -3.5%                                0%;
  • 2018 : -0.8%                                5%;

Ita hare, entre kresimentu real ho estimativa PED nian, iha diskrepansia boot tebes, nem too metade husi estimativa,” dehan nia.

Iha fatin hanean Deputadu Adriano do Nascimento dehan, Primeiru Ministru   Taur Matan Ruak deklara ona katak, liu husi planu asaun no orsamentu neebe iha, governu sei halo esforsu hasae kresementu ekonomia TL ba  7,2% tinan oin.

Ita hein espetativa governu nian neebe boot atu alkansa iha tinan 2020, kresementu ekonomia sae ba 7,2%, tanba nee governu nia planu no programa, ita hein promesa sira nee,dehan Deputadu nee.

Nunee mos Primeiru Ministru Taur Matan Ruak dehan VIII governu nafatin halo esforsu hodi hasae kresementu ekonomia iha rai laran ba 7,2%, tanba durante tinan ida nee ekonomia hatudu sinal  rekoperasaun no aseleirasaun bele hare momos kresementu  neebe forte husi produtu internu. “Kresementu neebe forte husi ita nia produtu neebe dadaun nee kalkula ba 5,1% nee hanesan konfiansa no espetativa neebe boot  atu bele alkansa iha tinan 2020, kresementu ekonomia ida neebe hamutuk 7,2%, maibe atu alkansa metas sira nee presiza ita hotu nia servisu hamutuk,” dehan Primeiru Ministru. Madalena Horta

 

Komentariu

Facebook Comments

Leave a Reply

Your email address will not be published. Required fields are marked *