GMN Investe Ai Industria Jabon Iha TL

GMN Investe Ai Industria Jabon Iha TL

- in Economics
2972
0
Ilha Atauro

DILI – PT. Global Media Nusantara (GMN)  husi Indonesia halao dezenvolvimentu iha area agro bisnis servisu hamutuk ho Leohey Global Florestal (LGF) halo lansamentu programa plantasaun ai industria ‘Jabon’ ho industria Hard Wood  iha Timor Leste (TL) liu husi asina plaka neebe halao husi Diretor PT. GMN, Hendriyana, ST, ho  Diretor Leohey Global Florestal, LDA, Eng. Ricardo Cardoso Nheu.

Serimonia lansamentu programa plantasaun ai industria ‘Jabon’ ho industria Hard Wood  neebe halao iha Hotel Timor, Kuarta (15/6/2017), partisipa husi Vise Ministru Agrikultura no Peska (MAP)  Marcos da Cruz, Prezidenti Camra Comersiu Industria Timor Leste (CCI-TL) Oscar Lima, Prezidenti UNAPE, Francisco Lay,  Emprezaria Timor oan, Claricia Lay no Embaixador  Indonesia ba Timor Leste, Sahat Sitorus.

Iha serimonia lansamentu nee, VI Governu Konstitusional neebe reprezenta husi Vise Ministru Agrikultura no Peska, Marcos da Cruz, afirma katak dezenvolvimentu iha nasaun TL  presiza involvimentu Timor oan hotu. Tanba nee, katak Marcos, Governu konsidera nafatin ba setor privadu hanesan parseiru ba dezenvolvimentu ekonomia TL atu bele kontribui nafatin no governu apoiu mehi neebe realiza husi Kompaña GMN ho LGF.

Tuir nia, TL laos potensial deit iha area agrikultura, maibe mos iha area peska, pekuaria no area florestal. Tuir estudu neebe ministeiru nee hetan katak mazumenus 50% Timor nee rai floresta. Tanba nee, husu ba parte hotu-hotu atu halo protesaun makaas, tanba realidade iha rai balun presiza halo reboisaun re-florestasaun.

Tanba nee, katak Marcos, rai  iha Ainaro, Same no Lospalos presiza proteze diak liu tan no iha fatin seluk mos rai iha ninia potensialidade no presiza kuda fali. Mezmu governu fahe ona viveirus no kuda ona ba fatin sira balun maibe ladun susesu tanba laiha ema ida neebe tau matan permanente.

Mehi oinsa bele dezenvolve diak ita nia floresta, agrikultura neebe iha ona agora,  peska nomos pekuaria. Iha rai potensia boot area floresta tuir dadus neebe iha mak maizomenus 50% rai nee area neebe kategoria ba floresta. Iha rai balu presiza halo re-florestasaun, reboisaun no iha rai balun neebe presiza halo protesaun,”dehan Marcos.

Entretantu, Diretor LGF, Ricardo Cardoso Nheu dehan  kompaña nee hari iha tinan hirak liu ba tanba hare ba potensialidade iha area importantes. Realidade neebe iha katak agrikultor lahatene oinsa maka bele hetan osan. Tamba nee husu nafatin sira nia kontribuisaun atu bele involve iha programa sira nee.

Tuir nia, naran kompaña nee foti husi ninia avo nia uma lisan ida iha Liquica neba. Kompaña nee nia mehi atu oinsa maka bele koopera ho kompaña internasional husi Indonezia nian atu bele apoiu no servisu hamutuk atu oinsa bele fo motivasaun iha area florestal.

Kompaña nee ami komesa hanoin no hari iha tinan hirak liu ba katak iha area importantes. Ami hare katak iha fatin barak no ita hare mos katak ita nia agrikultura barak maka lahatene atu ba neebe. Oinsa maka sira bele involve an iha prosesu ida nee. Ami koalia no husu nafatin ba maluk agrikultor sira atu kontribui ba programa nee,”nia dehan eis Sekretariu Estadu Komersiu nee.

Iha sorin seluk, Diretor Kompaña GMN Hendrayana afirma katak, inisiativa ida nee iha tanba iha ona informasaun ba publiku sira atu hatene konaba klima mundu neebe akontese. Tanba akontesementu sira nee halo mundu hotu tau atensaun masimu. Tanba nee maka industria ai jabon ho industria Hard Wood nee mosu hodi atende nesesidade ekonomia.

Laos nee deit, katak Hendrayana, maibe iha parte seluk mos nia impaktu konaba ambiental. Tanba nee maka estadu Indonezia mos tau atensaun ba florestal iha Indonezia atu bele proteje florestal no labele tesi ai arbiru. Industria tenki mai husi ai katak, kuda ai lai depois ta no uza ba nesesidades.

Tuir nia, area nee importante tebes tanba tuir sira nia estudu konaba ai Jabon nee iha kategoria lima maka diak. Hanesan diak ba ekolojia katak foti ai neebe iha rai iha Indonezia hanesan iha provinsia Sulawesi ema bolu Samama, Jawa  bolu Hanja, Sumatera sema bolu Setinggi langit iha NTT no TL mos iha ai sira nee.

Tuir ita nia estudu no peskiza neebe halo husi ai Jabon nee rasik iha Timor mos iha no ai original hanesan Ai-Kameli bele halo sasan asesoris hanesan arloji, usb, regua no seluk tan. Mezmu ai sira nee tuir ami nia hare katak nia aspeitu positivu tebes ba ambiente no mos ba ekonomia nebe iha Timor,”nia tenik tan.

Entretantu, Prezidenti CCI-TL, Oscar Lima hatete katak nia orgulhu ho esforsu neebe halo husi Ricardo Nheu ho Francisco Lay, nuudar emprezariu senior iha TL. Tanba nee, nia husu ba governu atu fo apoiu ba emprezariu Timor oan neebe iha vontade no servisu makaas fo kontribui ba dezenvolvimentu iha rai ida nee.

“Se governu la apoiu ba ita nia emprezariu Timor oan sira neebe iha vontade no servisu makaas atu kontribui ba dezenvolvimentu ekonomia iha rai laran, hau hanoin ita nia dezenvolvimentu iha nasaun ida nee sei lalao ho diak,” dehan Oscar. Justinho Manuel da Costa/M.Mau

Facebook Comments

Leave a Reply

Your email address will not be published. Required fields are marked *