GMMD Kestiona Lixu Iha Merkadu

GMMD Kestiona Lixu Iha Merkadu

- in Metro, Nasional
242
0
download (23)

Editor: Germano de Sousa

DILI-Gestaun Merkadu Munisipal Dili (GMD) kestiona ho lixu, tanba lixu kontinua nakonu iha merkadu Taibesi no Manleuana.

Kestaun nee hatoo husi Xefe Departamentu Gestaun Merkadu Munisipiu Dili, Berta Santa G. Vieira ba STL iha nia knar fatin, Postu Administrativu Vera-Cruz, Sesta (10/1/2020).

Tuir Berta katak, negosiante neebe halao negosiu iha Merkadu Taibesi ho Manleuana, sempre soe foer latuir oras no latau iha fatin lixu. Tanba nee, lixu kontinua nakonu iha merkadu 2. Foer hirak nee kontinua naklekar tanba ita nia negosiante sira seidauk atu kumpri lolos regras neebe governu tau ona.

Nia dehan, foer kontinua nakonu laos Saneamentu Munisipiu Dili mak lahalao sira nia servisu, maibe sira nia servisu kontinua lao, ita ema mak seidauk iha komprensaun neebe klean atu buat hotu tuir nia fatin.

Ho foer neebe nakonu iha merkadu, laos saneamentu mak lahalao servisu, maibe komunidade no negosiante sira mak nafatin laiha konsiensia  hodi soe foer arbiru.

Nee duni, husu ba negosiante tantu komunidade sira, atu labele soe foer arbiru, tanba oras nee tempu udan, baihira lixu hirak nee nakonu mak sei mosu inundasaun iha tempu udan nunee mos sei riak iis neebe bele afeta ba ita hotu nia saude.

Tanba nee husu ema ida-idak nia konsiensia atu hadomin ita nia natureza liuliu iha Sidade Dili, tanba nasaun ida presiza moris iha situasaun no kondisaun neebe saudavel.

Maske nunee, Munisipiu Dili sei servisu makas liu tan, hodi bele jere merkadu rua nee, oinsa bele iha ambiente neebe moos.

Iha fatin ketak,  negosiante neebe faan ai-maran besik fatin lixu Taibesi, Carlito Soares dehan, foer hirak nee kontinua iha maske saneamentu raut. Maibe negosiante barak mak seidauk iha hanoin neebe klean kona-ba lixu nia inpaktu nee oinsa.

Tanba nee, nee mak gosta soe lixu arbiru hodi afeta ba ema seluk nia saude inklui mos kria ambiente neebe bele provoka inundasaun.

Hau hanoin ita ida-idak   iha hanoin kona-ba foer nee, maibe kuaze ema barak tantu negosiante no komunidade barak maki laiha komprensaun kona-ba dezvantazen husi lixu nee rasik, katak Carlito.

Negosiante nee dehan, hanesan ema ida moris iha nasaun ida, nia mos iha hanoin oinsa bele kontribui liu husi problema kiik sira hanesan lixu nee. Baihira foer sira lanaklekar maski saneamentu raut maibe foer sira kontinua iha. Nee atu hatudu katak laiha ema ida atu hanoin neebe diak, hodi kontribui ba nia nasaun.

Tanba nee, nia hanesan sidadaun Timor ona ida, hakarak husu ba governu atu bele hanorin labarik kiik sira hanesan gerasaun foun. Atu sira bele hadia diak liu tan ita nasaun neebe hakarak moris iha ambiente neebe mos iha futuru. Hanorin liu husi maneira neebe forti atu bele regula gerasaun foun sira.

Tuir observasaun STL iha terenu, negosiante neebe halao negosiu iha merkadu Taibesi no Menleuana seidauk iha hanoin neebe klean atu bele kumpri regras no regulamentu neebe kria husi governu. Tanba nee foer kontinua nakonu, maski Saneametu Munisipiu Ddili kontinua, halao sira nia servisu lorloron. ESTI-06

 

Komentariu

Facebook Comments

Leave a Reply

Your email address will not be published. Required fields are marked *