Federasaun 8 Ema Fiziku Defisiente Komemora Daruak Aniversariu

Federasaun 8 Ema Fiziku Defisiente Komemora Daruak Aniversariu

- in Desportu
5274
0
deficiencia-timor

DILI- Maske Sekretariu Estadu Juventude no Desportu (SEJD) Leovigildo Hornay  la partisipa, maibe federasaun 8 ema ho fiziku  defisiente neebe hamahon an iha Committee Paralimpic Nasional Timor Leste (CPNTL) neebe lidera husi Julio Sarmento Lopes, komemora daruak aniversariu ho orgulhu no kontenti tebes hodi hatudu talentu desportivas no muzikas iha Eis Salaun KONI Dili, Tersa (4/7/2017).

Iha loron importante ba ema ho kondisaun defisiente nee, Federasaun foun 5 ema fiziku defisiente simu posse husi Prezidenti Assosiasaun Defisiente Timor Leste (ADTL) ho Prezidenti CPNTL, Julio Sarmento Lopes, hanesan Federasaun Bocia, Federasaun Ragby, Federasaun Xadress, Federasaun Gol Ball no Federasaun Swimming/Nani. Ho nunee, federasaun neebe hamahon aan iha CPNTL hamutuk 13.

Prezidenti CPNTL, Julio Sarmento Lopes ba jornalista sira hatete, maske hasoru desafius barak, maibe federasaun 8 ema defisiente neebe hamahon an iha CPNTL  servisu hamutuk ho CPNTL no ADTL hodi halao aktividade desportivas no formasaun hodi kadi talentu atletas sira iha federasaun ida-idak.

Atu halao atividade desportivas iha federasaun ida-idak, ami fo apoiu orsamentu no ekipamentus ba federasaun ida-idak, nunee sira bele prepara sira nia atletas neebe iha prestasaun hodi kompete iha eventu nasional no internasional nomos halao servisu administrasaun,” katak Julio.

Tuir Julio, ekipamentus neebe sosa ba federasaun sira mak hanesan, kadeira roda basket ball, ekipa ba lempar lembing, cakram no sel-seluk tan.

Iha oportunidade nee, dosente UNTL nee mos hatete katak maske ema ho kondisaun defisiente husi teritoriu Timor laran tomak la partisipa iha serimonia nee, maibe husi munisipiu 4 neebe besik ho Munisipiu Dili hanesan, Liquisa, Ermera, Aileu no Manatuto partisipa.

Ba oin ami sei halao atividade desportivas iha munisipiu 4 nee, nunee komunidade iha area rural mos senti katak ema ho kondisaun defisiente iha area rural mos hetan atensaun husi nasional,” tenik Julio.

Atu remata ninia diskursu, Julio Sarmento Lopes husu ba federasaun hotu-hotu atu prepara nia atletas, tanba iha tinan nee, Timor Leste sei partisipa iha eventu internasional iha Malazia.

Entretantu, Prezidenti ADTL, João Pequinho, hatete katak direitu ema ho fiziku defisiente barak liu iha nakukun laran. Tanba nee, nia husu ba federasaun ema defisiente hotu-hotu tenke servisu hamutuk ho ADTL-CPNTL, hodi nunee direitu ema ho kondisaun defisiente labele iha nakukun laran deit.

Nuudar sidadaun Timor Leste, imi mos iha direitu atu partisipa iha dezenvolvimentu nasional iha rai laran. Tanba nee, tenke servisu hamutuk imi labele sai ema izolamente,” dehan João.

Nia mos hatete, nasaun lubuk hakarak fo apoiu ba federasaun ema ho kondisaun defisiente, maibe sira hakarak hare mos sira neebe hakarak dezenvolve sira nia telentu desportivas.

Nasaun Australia, Japaun no sel-seluk tan hakarak fo apoiu ba federasaun ema ho kondisaun defisiente iha Timor Leste, maibe atletas sira iha federasaun tenke iha prestasaun diak,” tenik nia.

Alein de halao serimonia tomada de posse, Komisaun Organizadora halao mos atividade eksibisaun husi federasaun sira. Maibe federasaun rua deit mak halo eksibisaun, hanesan federasaun volley seating no federasaun tenis de meza. Mikael M.Mau

Facebook Comments

Leave a Reply

Your email address will not be published. Required fields are marked *