Familia Naksobu Vokasaun Mos Destruidu

Familia Naksobu Vokasaun Mos Destruidu

- in Distritu
832
0
Selingkuh

MAUBISSE–Bainhira familia naksobu vokasaun mos destruidu, tanba familia mak sai hanesan we matan neebe fo moris ba vokasaun ema ida idak nian. No, familia Kristaun neebe diak laos hamriik mesak deit, maibe presiza hamrik metin nafatin ho Kristu no harohan ba Kristu atu hametin liu tan vokasaun neebe mak ida-idak simu.

Dehan Pe. Matias Mendoca Marcal de Jesus Pinto, SDB liu husi nia homilia iha Missa Agradesementu ba familia sira, iha Paroquia Imaculada Coracao de Maria Maubisse, Domingu (10/9/2017).

Tuir Pe. Matias katak Vokasaun laos Padre no Madre deit, maibe harii uma kain ou forma familia mos vokasaun, nee signifika katak familia mak sai hanesan sentru ba vokasaun ou wematan ba moris vokasaun. Bainhira familia neebe diak hakiak vokasaun Padre no Madre neebe diak nomos harii uma kain neebe diak.

Familia presiza kria unidade no fo liman ba malu. Tanba evanjellu hateten katak ema hatene aifuan husi ai hun, tanba ai hun neebe diak fo fuan neebe diak.

Tuir Pe. Matias katak familia mak sai hanesan ai horis neebe diak no wematan moris ba vokasaun liu-liu hanesan Padre no Madre. Tanba nee, mak familia kristaun neebe diak tenke kria kondisaun neebe diak atu respeita malu no rona malu mak sai hanesan xave loke odamatan vokasaun Padre no Madre.

 Ita mak nuudar Maromak nia liman no ain, tanba nee ita iha dever atu hatoo Maromak nia lia fuan ba ema sira seluk liu-liu sira neebe hadookan husi Maromak. Atu sirabele fila fali ba dalan Maromak nian atu bele hetan moris laek mak hanesan segunda leitura Sao Paulo, Koalia mai ita katak Sarani nudar familia neebe diak tenke kumpri Maromak nia ukun  fuan,”dehan Pe. Matias.

Nia hatutan, Sao Paulo mos hanorin ba sarani katak keta laran monu ba ema nia kaben, keta hasai ema nia distinu ka oho ema seluk ho metodu oin-oin. Maibe, sai familia neebe diak tenke hadomi ema seluk hanesan ita nia aan rasik no hadomi Maromak hanesan hamomi ita nia aan rasik.

Maromak nia ukun fuan sanulu (10), Maromak habadak ba rua deit mak hadomi Maromak no hadomi maun-alin sira, bainhira ita hadomi maun-alin sira signifika katak ita hadomi Maromak. Moris nudar familia presiza respeita malu no rona malu ida nee signifika katak hanesan ministeriu neebe diak hodi forma familia Kristaun neebe diak.

Nia esplika katak laos familia deit mak atu respeita malu no rona malu, maibe familia neebe diak presiza mos respeita sosiedade ida nee mak bele harii fundasaun neebe metin ba vokasaun hanesan Jesus dehan husu ba Aman Maromak iha lalehan Aman Maromak sei haraik ba imi.

Maromak fo grasa mai ita lor-loron, maibe depende ba ita ema ida-idak oinsa atu prontu simu Maromak nia grasa, ita simu Maromak nia grasa, bainhira ita moris iha Maromak nia ukun fuan hanesan vokasaun atu sai Padre no Madre presiza fundasaun metin husi familia, tanba familia mak sai hanesan baze fo apoiu ba vokasaun,”dehan Enkaregadu Eskola Assales Fatumaca.

Iha biban nee mos, Pe. Matias Pinto, SDB mos fo agradese ba familia sira, Amu Paroku Imaculda Curacao de Maria Maubisse, autoridade lokal, lider komunitariu, Postu Administrativa Maubisse, sarani Maubisse hotu.Tanba bele servisu hamutuk hodi realiza Missa agradesementu nee bele lao ho diak.

Iha fatin hanesan, Domingos A. C.Martins nuudar reprezentante familia hateten sente orgullu tanba tinan barak nia laran sira hein hela, ikus mai Maromak hili sira nia oan idaatu sai bibi atan ba sarani sira.

Familia sente orgullu no agradese ba Maromak, tanba dalaba Nailulik nee la fasil no difisil, maibe nia bele alkansa duni nia objetivu, nuudar familia fo apoiu nafatin no hanohan nafatin ba Maromak, atu nunee nia vokasaun nee bele buras liutan,”dehan Domingos.

Nia hatutan, ho haksolok boot liu-liu nuudar Suku Maulau, Postu Administrativa Maubisse, tanba Maulau oan ida mos Maromak bele hili sai nudar Nai lulik iha loron (15/8/2017) sai Nai Lulik hodi simu bensaun ordenasaun sacerdotal husi Dom Basilio do Nacimento, Pr iha SantuariuNossa Senhora Auxiladora dos Cristos Fatumaca. Tanba nee nuudar familia agradese ba Maromak, tanba sira nia oan bele alkansa nia objetivu neebe nia mehi atu sai Nai lulik.

Entretantu, Prezidente Konsellu Paroquia Imaculada Coracao de Maria Maubisse Agostinho Doutel Sarmento, katak primeiru agradese ba Maromak, tanba liu husi Maromak nia tulun bele haraik bibi atan ida husi Maubisse.

Ami nia oan ami nia maun, ami nia subrino bele simu ordenasaun Nai lulik nomos agradese ba Inan-Aman, tanba hahu husi inisiu Inan-Aman mak fo apoiu moral no material maibe bainhira sai Nai lulik ba ema hotu”. Dehan Agostinho.

Nia hatutan, sai Nai lulik ida nee hanesan bibiatan ba Sarani sira, oinsa atu haklaken Maromak nia ukun fuan ba Sarani sirabele moris tuir obrigasaun sarani nian neebe simu husi Maromak bainhira halo sinal Cruz.

Tuir infomasaun neebe STL rekoila katak Pe, Matias Mendoca Marcal de Jesus Pinto, SDB nia Inan husi Suku Lesuata Postu Administrativa Turiscai, Munisipiu Manufahi, nunee mos nia Aman husi Suku Maulau Postu Administrativa Maubisse Munisipiu Ainaro, nia  hahu ninia eskola, Indnesia, Filipina too sai padre iha Fatumaca. No, agora nee dadaun halo knar iha Fatumaca nuudar enkaregadu ba eskola Assales iha Fatumaca. Augusto da Costa

Facebook Comments

Leave a Reply

Your email address will not be published. Required fields are marked *