Estudante 15.000 Laiha Kaderneta

Estudante 15.000 Laiha Kaderneta

- in Edukasaun, Notisias Online
31
0
21f-801f11-3

DILI-Problema kaderneta sai preokupasaun iha Edukasaun Munisipiu Ainaro, tanba estudante hamutuk 15.000 (rihun sanulu resin lima:red) husi eskola Ensinu Baziku laiha kaderneta.

Dehan Diretor Edukasaun Munisipiu Ainaro, Celestino Magno Perreira ba STL, iha  Suai Room Timor Plaza, Dili, Tersa  (19/11/2019).

Nia dehan, kuaze eskola tomak neebe mak iha Munisipiu  Ainaro seidauk iha kaderneta eskolar, liu -liu ba estudante primeiru no segundu anu inklui mos 3 siklu balu, seidauk iha kaderneta eskolar.

Hau hanoin kuaze 15.000 estudantes mak seidauk iha kaderneta eskolar,nee laos estudantes sekundariu, maibe ensinu baziku ninian,dehan Celestino.

Nia hatete, agora dadaun professor sira priense deit valor estudantes provizoriu iha surat tahan, hodi hein sentru empresaun,bainhira imprimi ona kaderneta,atu bele priense valor hirak nee didiak iha kaderneta eskolar.

Ami hein deit, bainhira mak ami nian estudante sira bele hetan kaderneta eskolar, tuir lolos eskola sira iha hotu kaderneta, para bele fasilita servisu professor sira nian, liu -liu rezultadu estudante sira nian ba ezame, nia hatete.

Maibe, Celestino hatete, buat hotu entrega ba sentru empresaun mak halo. Tanba nee, sira kontinua halo proposta nafatin ba iha sentru empresaun.

Nunee mos Superintendente Edukasaun Munisipiu Dili, Virgilio Freitas Cabral hatete,kona ba kaderneta eskolar, too agora eskola balun iha Dili laran seidauk iha, liu-liu estudante sira iha nivel Ensinu Baziku. Tanba sira mak halo inspeksaun ba eskola sira, haree ba fasilidade no asuntu seluk tan.

Ita nian kaderneta laiha ba estudantes, tanba too agora estudantes balun seidauk iha kaderneta eskolar, maibe kaderneta eskolar nee tenke iha duni, para bele priense valor estudante sira nian husi ezame,nia hatete.

Nia hatete,espera katak, governu tau atensaun ba kaderneta eskolar, tanba laiha kaderneta,defikulta professor sira, oinsa bele priense valor estudante sira nia,neebe professor sira iha inisiativa,para priense valor provizoriu estudante sira nian.

Entretantu ba asuntu ida nee, bainhira STL halo konfirmasaun ho Ministra Edukasaun Joventude no Desportu  (MEJD), Dulce de Jesus Soares,maibe lakohi fo komentariu ba asuntu ida nee.

Ida nee hau seidauk fo komentariu,dehan nia. Jacinta Sequeira-ESTI 09

Komentariu

Facebook Comments

Leave a Reply

Your email address will not be published. Required fields are marked *