Esperensia PD – CNRT Laos Aat

Esperensia PD – CNRT Laos Aat

- in Politics
338
0
download (1)

Editor: Godinho Barros

DILI —  Partidu Demokratiku (PD) iha esperensia propriu ho Partidu  CNRT  iha governasaun,  nee laos esperensia aat. Maibe parte husi estratejia Politika Timor Leste nian ho manan soberania.

Sekretariu Jeral Partidu Demokratiku (PD) Antonio da Conceicão hatete, haree ba esperensia husi governu anterior, neebe PD forma governu ho CNRT, maibe depois too dalan klaran CNRT hasai PD husi governu, ida nee agora PD  lakaer,  tanba PD iha mos esperensia ho CNRT no Fretilin.

Esperensia ho CNRT nee loos duni iha V ba VI governu iha remodelasaun, momentu neeba CNRT tenke halo estratejia tanba Fronteira Maritima tenke halo re-estruturasaun, ba remodelasaun governu hodi bele inklui fali elementus husi partidu Fretilin nian too PM rasik tenke husik nia kargu, hodi fo fali PM ba ema husi partidu Fretilin, dehan Antonio ba Jornalista Sesta (21/02/2020) iha nia rezidensia Tuana-Laran.

Partidu Demokrat ofisialmente deklara lao hamutuk ho CNRT, Partidu Khunto, PUDD, UDT, no Frenti Mudansa deside forma governu da-sia.

Nia hatutan desizaun politika neebe CNRT halo, PD sofre konsekuensia  hamenus membru governu, redusaun nee implika mos ba PD nia Prezidente Partidu, neebe momentu neeba asume hela kargu nuudar Ministru Agrikultura, husik nia  kargu, nunee mos prezidente CNRT husik nia kargu hanesan PM. Maibe nee lavale ba buat ida, atu halo nafatin ami hamriik ho CNRT ba nasaun, tanba nee ami nunka konsidera katak situasaun neebe hasoru ona sai esperensia aat.

Antonio relata  momentu neeba iha intensaun prinsipal, tanba tenke  iha kompromisiu hamutuk ba fronteira maritima, nunee votus iha PN nee bele sai votus ida deit.

Ami nia esperensia ho CNRT dala barak ema seluk koalia katak esperensia nee ladiak, CNRT hases PD, maibe ami lakonsidera hanesan hases PD, maibe ami mos intende saida mak interese nasional, tanba FM, afirma Antonio.

Nia relata laos deit ida nee, maibe iha mos esperensia ho Fretilin, PD rasik mos sofre no hetan konsekunesia boot, Lasama tenke hasoru investigasaun iha prokuradoria jeral, tanba deit halo alegasaun ba PM kona ba sobornu Conoco-Philis, maibe buat hotu sira husik liu, mai too 2017  sira hola situasaun ida neebe mak moruk hodi ba tane Fretilin ba ukun neebe esperensia Fretilin ho CNRT.

Neebe ho buat sira nee lavale ba buat ida, atu halo nafatin ami  hamriik ho CNRT ba nasaun tanba nee ami nunka konsidera katak situasaun neebe ami hasoru  sai esperensia aat, maibe tanba deit nasaun mak ami hola desizaun lao ho CNRT, afirma Antonio.

Nunee mos Prezidente Partidu PD Mariano Assanami Sabino  antes nee hatete, PD prontu atu sakrifika aan, tanba interese nasional, PD prontu hamriik ho partidu se deit atu hakotu impase.

Mezmu iha esperensia balu bainhira lao ho CNRT, maibe PD latau ida nee ba oin, PD konsidera nee hanesan esperensia  ba PD atu sai maduru, tanba nee karik atu sakrifika tan mos PD, mos prontu tanba deit interese povu no nasaun.

Tuir  observasaun Jornalista haree iha media sosial, mosu ID barak mak halao protestu inklui halo  insulta ba Partidu PD, tanba deside lao ho CNRT, iha insulta nee hatete PD sofre ona ba governasaun CNRT iha governu anterior, maibe PD sei hakarak nafatin hili lao ho CNRT. Rep: Jeniche da Costa/ Guilhermina Franco

Komentariu

Facebook Comments

Leave a Reply

Your email address will not be published. Required fields are marked *