EMILIO FATIMA PEREIRA RIBEIRO

EMILIO FATIMA PEREIRA RIBEIRO

- in Perfil
1060
0
Profil Emilio

ULUK sei kiik iha mehi hakarak sai doutor espesialista nehan atu bele halo atendementu ba pasiente neebe moras nehan, maibe ikus mai la realiza mehi ida nee, hodi sai fali hanesan ofisial justisa seksaun sivil iha Tribunal Distrital Dili (TDD). La seluk la leet, nia mak Emilio Fatima Pereira Ribeiro.  Likisa oan nee moris iha Bazartete iha loron 22 fulan Outubru tinan 1981. Ai funan domin husi Jose Pereira Ribeiro no Eliza Fatima Ribeiro.

Oan primeru husi maun alin sanulu, no ida fila tiha iha nain sia mak sei moris. Agora dadaun halao servisu iha seksaun sivil nian, hanesan bainhira iha julgamnetu despaisu husi juis sira, tenke kumpri bele entrega ba kolega sira seluk, bele ba notifika ema atu fo hatene mai julgamentu ka atu fo hatene sira mai junta dokumentu ruma.  Prosesu hotu ona iha desizaun ruma kumpri karik, tenke notifika ema sira nee ho sira nia advogadu.

Uluk sei kiik iha mehi neebe furak loos hakarak sai doutor espesialista ba nehan, nunee bainhira remata iha eskola pre sekundariu nee iha hanoin atu eskola iha SPK hodi hetan asesu ba iha eskola kedokteran, maibe ho situasaun politika neebe ladiak, tenke tama iha seminariu, maske la iha intensaun hakarak tama iha asrama bainhira liu husi teste konsege liu, no tama iha seminariu, atu bele salva mos nia an hanesan joven ida iha momentu neeba.

Hahu eskola primaria iha Eskola Katolika Sao Joao De Berito Likisa (1988- 1994).  Eskola Pre Sekundaria Sao Joao De Berito Likisa (1994- 1997). Kontinua iha eskola Ensino Sekuandaria Iha Sao Jose Balide (1997- 2000). Momentu halao eskola iha neeba hela iha Seminario Menor Balide, hodi halao estudu iha Sao Jose no lokraik halao estudo mos iha Seminario Balide (1997-2001). Iha tinan 2001- 2002 tuir Padre Fransiskanu sira ba iha Uelaluhu hanorin iha Eskola Katolika Asisi Uelaluhu tinan ida. Iha  2002 kontinua eskola iha Fatumeta durante fulan lima, no husu rejignasaun hodi fila. Iha tinan 2003- 2006 no rejigna an husi Fatumeta, kontinua halo estudu iha UNTL foti Fakuldade Edukasaun Departementu Kimika remata iha tinan 2006 no hetan graduasaun iha tinan 2009.

Halao servisu hanorin iha Eskola Katolika Asisi Uelaluhu iha tinan 2001- 2002.  Halao servisu no ajuda iha Departementu Juventude Katolika Dioseze Dili husi tinan 2006- 2008. Iha iha tinan 2008- 2011 ajuda servisu iha Radio Timor Kmanek (RTK) hanesan eskritor iha radio. Iha tinan 2011 tribunal loke vaga, tuir passa no agora dadaun halao servisu iha nee.

Bainhira liu tiha vaga neebe iha, tuir formasaun tinan ida  no iha ezame final hetan valor neebe diak naton, tanba nee husi tribunal fo premiu tanba hetan primeru lugar hamutuk ho kolega ida neebe hetan segundu lugar, akompanha ho xefi nain tolu ba estajiu profisional iha Portugal durante fulan 3.  Iha estajiu neeba aprende konaba servisu ofisial de justisa nian, hare ema nian no fila fali mai oinsa bele halo atendementu ba publiku oinsa atu bele konhese diak prosesu sivil sira neebe ema halao iha neeba, atu bele mai aplika fali iha Timor.

Hanesan Timor oan neebe hetan ona oportunidade atu halo servisu iha area tribunal nian, saida deit mak nia hatene no aprende ona sei fahe ba maluk sira tuir kapasidade neebe nia iha. Matenek neebe uitoan neebe iha nee, hakarak kuda duni iha tribunal nee. Atu bele kontribui ba iha konstrusaun estadu, matenek neebe iha liu husi tribunal ida nee, bele kuda netik buat ruma iha rai doben ida nee.

Jerasaun foun ida nafatin kontribui atu dezenvolve rai doben ida nee ho nia esforsu tomak, liu husi servisu neebe iha, hodi fo tulun no apoiu mos liu husi kapasidade no matenek neebe iha.

 Hau nia dedikasaun tomak ba servisu neebe agora dadaun hau halao, tanba bele ona kontribui ba nasaun liu husi kapasidade neebe iha. Maske la barak hau nafatin servisu no apoiu tuir saida mak hau bele, ”hateten Likisa oan nee.

Likisa oan nee, ba futuru sei uza nia tempu tomak atu halao servisu tuir regra neebe iha, tanba husi regra sira mak bele mantein disiplina iha fatin neebe halao servisu ba.

Hanesan ema humanau moris iha rai ida nee, sempre hasoru dezafiu iha moris. Halao servisu iha tribunal hasoru dezafiu tanba laos hanesan ema neebe mai husi background direito, nee sai hanesan dezafiu boot.

Nunee primera vez tuir teste hodi liu noa passa ba vaga neebe  iha tinan  2011, tanba lori deit modal neebe hetan husi RTK durante tinan tolu. Tanba buat neebe hakerek sempre liga ho lei, halo divulgasaun informasaun ba konstituisaun RDTL durante tinan tolu, hare mos konaba justisa social durante tinan tolu, no hakerek konaba ida nee, sempre liga ho lei.  Nunee tribunal loke vaga modal nee dudu nia atu koko maske laos ema direito. Maibe primeira vez halo servisu iha neeba, sente hanesan nakukun loos, maibe importante mak vontade atu aprende no labele baruk buat hotu-hotu hakarak koko no esprimenta ohin mak la iha, maibe aban no bainrua sei bele.

Hanesan ema Timor oan ida, hato nia lia menon ba foin sae nee, tenke hatudu hakarak lolos nee mak saida. Agora dadaun iha idade ida hili, hakarak servisu ka hakarak eskola, se hakarak hili servisu tenke badinas servisu no hili eskola tenke badinas eskola. Hili eskola kidun tenke hatur iha kadeira para hadomi livru, hodi estuda didiak bainhira estuda didiak ema bele uja, no matenek nee bele fahe ba ema seluk. Labele kidun kadeira matenek rai deit iha laran, maibe fahe ba ema hotu no importante tenke iha vontade tenke badinas para bele dezenvolve rai ida nee. Tanba Timor presija jerasaun foun sira nia kontribuisaun, tanba katuas sira mate tiha joven sira mak sei kontinua sira nia mehi no sira nia luta neebe husik hela mai iha rai doben ida nee.

Nasaun Timor neneik jerasaun foun mak sei kaer atu bele dezenvolve, tanba nee joven sira prepara an agora, ho kapasidade neebe diak, no matenek neebe iha, atu ukun rai ida nee iha futuru oin mai, se laos Timor oan mak ukun se tan mak atu ukun.  Halao estudu ho diak, tanba husi estudu mak bele hetan matenek neebe iha atu bale dezenvolve rai ida nee, joven forte nasaun forte servisu hamutuk hodi lori Timor lao ba oin. TEREZINHA DE DEUS

Facebook Comments

Leave a Reply

Your email address will not be published. Required fields are marked *