Dun Buan, JT Sai Arguidu Iha Tribunal

Dun Buan, JT Sai Arguidu Iha Tribunal

- in Krime
2301
0
TTD1

DILI- Arguidu ho inisial JT hatan iha tribunal, tanba dun lezada ho inisial RL buan.

Tuir akuzasaun neebe tribunal lee sai husi Ministeriu Publiku katak, iha loron 12 Marçu 2017 tuku 16:00 iha Likintai Taibesi Lahane nian, lezada koalia hela ho nia primu liu husi telefone.

Derepente arguidu mosu ba ho kondisaun lanu, hodi tolok no dehan katak sei oho mate sira tanba sira maka han nia alin, no dehan katak lezada sira kaer ai kulit aat, sei duni sai sira atu labele hela iha fatin neeba.

Iha momentu nee, arguidu foti kedan fatuk tuda ba iha lezada, maibe lakona hodi kona deit tembok.

Arguidu mos kontinua diskuti malu ho lezada nia oan, no kontinua ameasa katak, sei oho mate sira. Arguidu JT hanesan autor ba krime ameasa neebe previstu no punidu tuir artigu 157 kodigu penal.

Hatan ba faktus neebe iha, arguidu deklara katak deklarasaun neebe iha balu loos balu lalos.

Hau tolok deit, tanba hau lanu, konaba buan hau la koalia, no hau mos la kaer fatuk hodi tuda, ”dehan arguidu iha Sala julgamentu Tribunal Distrital Dili.

Iha fatin hanesan, lezada mos reforsa tan katak, arguidu tuda duni nia, no arguidu mos deskonfia sira buan, no dehan katak, nia alin mate lezada sira maka han.

Rona tiha deklarasaun husi parte rua, tribunal adia fali julgamentu ba iha loron 9 fulan Janeiru tuku 11:00 hodi rona testamuna. Terezinha De Deus

Facebook Comments

Leave a Reply

Your email address will not be published. Required fields are marked *