Domingos dos Santos Soriano

Domingos dos Santos Soriano

- in Perfil
3427
0
Profil Domingos

HUSI dasa foer ikus mai sai Xefi Departementu Saneamentu Munisipiu Dili. La seluk la leet, nia mak Domingos dos Santos Soriano. Uluk tempu Indoneia, nia servisu hanesan sukarela ou volontariu iha Wali Kota ho knar dasar foer no hamos valeta. Depois, nia tuir test iha Kantor Wilayah (Kanwil) Pekerjaan Umum (PU).  Rezultadu, nia liu no tau nia nafatin iha Wali Kota Dili.

Hau sai hanesan supervisor hodi halao servisu kona ba raut foer iha Sidade Dili, hahu iha 1993-1999 tama ba referendum,” dehan Domingos ba STL iha nia knar fatin Matadoru, Munisipiu Dili, Kuarta (16/8/2017).

Depois Timor ukun aan, iha tinan 2002, Domingos kontinua fali servisu iha SAS Munisipiu Dili, hafoin tes liu iha tinan refere  sai funsionariu publiku iha Munisipiu Dili. Knar nafatin deit hanesan supervisor ou mandor hodi haree kolega sira nia servisu too agora. Nia mak asumi kargu hanesan Xefi Departermentu Saneamentu Munisipiu Dili (SMD).

Iha tinan 2007-2008, nia sai hanesan kordenador hodi organiza kolega sira hodi hamos foer iha Sidade Dili. Nuunee too agora nai-ulun sira fo fiar ba nia sai hanesan Xefi Departementu Saneamentu Munisipiu Dili. Sira nia knar mak oinsa atu trata Sidade Dili sai furak liu tan no sidade neebe mos husi lixu ou foer.

Ami nia servisu nee oinsa trata Dili nee sai sidade neebe mos no furak. Maibe, realidade hatudu katak komunidade balun seidauk iha konsensia. Sira sei soe foer arbiru hela deit,” dehan Domingos.

Ho knar neebe estadu tula iha sira nia kabas, Domingos ho nia kolega sira sempre esforsuan  masimu oinsa atu minimiza lixu iha Sidade Dili, atu nunee Sidade Dili  bele sai mos no furak. Maibe fila fali ba konsensia ema ida-idak ou komunidade sira oinsa atu soe foer tuir lei no orden neebe mak iha.

Mesmu lei kona ba regula ema soe foer tuir regras ou fatin lixu neebe mak governu prepara tiha ona, maibe susar bainhira komunidade sira laiha konsensia mak lei nee bele diak dalan sanulu, sei la bale, tanba lei nee atu lao ho diak bainhira komunidade sira iha konsensia soe foer tuir lei no orden nebe mak iha, nomos kompriende sistema domokrasia neebe nia vantazen no desvantazen nee too iha neebe. Maibe agora ema uza demokrasia tuir deit ida-idak nia gostu la respeita lei no orden neebe mak iha, kontinua soe foer arbiru deit laiha konsensia.

Ami mos esforsu an nafatin oinsa mak Sidade Dili bele mos no sai furak liutan. Maibe loron ba loron komunidade sira iha Sidade Dili laiha konsensia kontinua soe foer arbiru, sira tur iha fatin jardin sira han-hemu, fuma no soe foer arbiru deit. Ida nee mak difikuldade boot ida ba ami Saneamentu Munisipiu Dili. Espera ho lei numeru 33/2008 no dekreitu lei numeru 2/2017 implementa ona bele minimiza ou redus ona lixu ou foer iha Sidade Dili,” tenik Domingos.

Nia hatutan tan katak, lei nee regula kona ba ema la bele husik animal livre iha sidade Dili, faan sasan iha trotoar leten, halo uma iha valeta leten, no ema la bele soe foer arbiru. Maibe durante nee lei nee implementa mak orden publiku sira ba oho ema nia animal husik livre iha Dili, prende ema faan sasan iha trotoar leten. Kona ba sansaun multa seidauk implemeta.

Tuir lei numeru 33/2008 sansaun multa ba ema soe foer husi U$D 5.00 too U$D 500. Maibe iha lei nee ladun esplika klaru kona ba esfesifiku type sansaun multa nee, tanba nee mak governu liu husi  Ministreiu Administrasaun Estatal (MAE) kria tan dekreitu lei numeru 2/2017, bainhira se mak soe foer arbiru sei hetan sansaun multa U$D 115.00, nee bale ba ema hotu, nomos prosesa nia ba tribunal. Espera lei nee implementa ho CCTV neebe mak iha sei bele minimiza ou redus lixu iha Sidade Dili,” katak Domingos.

Domingos dos Santos Soriano, moris  iha Suku Ulmera, Postu Administrativu Bazartete,  Munipiu Liquica, 25 Outubru 1966, husi aifuan domin Mau-Hunu (matebian)  no Marta dos Santos.  Domingos mak oan ba dala haat (4) husi maun-alin nain hitu (7), mene nain rua no feto nain haat.

Domingos hahu eskola Kartila ou Primaria Klase too klase III iha Ulmera area liga ba Munisipiu  Ermera iha tinan 1972-1975, nunee transfere ba Liquica la ramata, tanba golpe, nunee husik eskola halai ba ailaran durante tinan haat (4) ba too Postu Administrativa Alas, Munisipiu Manufahi.

Hafoin iha tinan 1984 kontinua Eskola Primaria (SD) 2 Farol Dili. Nunee transfere ba iha SD 13 Fatuhada Dili too ramata iha tinan 1984.  Kontinua ba Pre-Sekundaria (SMP) Comoro iha tinan 1984-1987.  Kontinua ba Eskola Sekundariu (SMA) iha Matadoro Dili  iha tinan 1997-1990.

Depois remata nia estudu, Domingos sente ekonomia la sufisente ou la premiti atu moris lor-loron nian. Tanba nee, nia servisu voluntaria iha Wali Kota Dili durante tinan tolu nia laran hahu husi tinan 1990-1993.

Depois referendum hotu tiha nia ba kontinua servisu kontratadu iha SAS Munisipiu Dili iha tinan 2001-2002 too agora, hafoin iha tinan 2002-2008 supervisor ba Water Solders, Residus Solidus ou air limba dan persampahan. Nunee iha tinan 2013 sai hanesan Xefi Departementu Sanementu Munisipiu Dili  too agora nia asumi kargu hanesan Xefi Departmentu Saneamentu Munisipiu Dili.

Oras nee nia partense ba Suku Fatuhada Postu Administrativa Dom Alexio, Munisipiu Dili. Nia forma familia iha tinan 1996 ho Isabel da Silva husi Postu Administrativa Venilale, Munisipiu Baucau.

Rezultadu husi forma uma kain ho Isabel da Silva, agora iha ona oan nain lima (5), mane nain haat (4) feto ida (1). Oan primeiru ho naran Hunberto dos Santos moris iha dia (6/11/1997), oras nee estudu iha UNPAZ. Oan segundu ho naran Agostinho dos Santos Soriano, moris iha (20/7/1999), oras nee estudu iha eskola Sekundaria Matadoro. Oan terseiru ho naran Zenioi Pascoal dos Santos da Silva moris iha dia (13/4/2001), agora eskola iha SMA Paulus. Oan kuatru ho naran Costodio dos Santtos Soriano, moris iha Dili (31/5/2003), estudu iha SMP Farol no oan ikun ho naran Valeria da Auxiladora da Silva Soares, moris iha Dili (25/5/2007), agora eskola primaria klase V Fatuhada. Augusto da Costa

 

Facebook Comments

Leave a Reply

Your email address will not be published. Required fields are marked *