Dom Virgilio: Natal Loron Ksolok, Soe Hahalok Aat, 50 Simu Jesus

Dom Virgilio: Natal Loron Ksolok, Soe Hahalok Aat, 50 Simu Jesus

- in Politics
4688
0
12615152_1117968291549218_4743342626407878572_o

DILI-Iha loron 24 de Dezembru, sarani Katolik mundu tomak selebra loron Natalisiu Nain Jesus Kristu neebe moris mai iha mundu, hodi ksolok, dame, paz no esperansa ba ema hot-hotu, mak oportunidade ba ema atu soe hahalok tuan molok tama ba tinan foun.

Igreza Katolika Timor Leste (TL), liliu Dioseze Dili neebe lidera husi Bispu Dioseze Dili, Dom Virgilio do Carmo da Silva SDB, mak dirije misa Natal, hamutuk padres, madres, sarani sira no membru governu balun inklui Prezidente Republika Fransisco Guterres Lu Olo ho nia familias sira, iha Igreza Katedral, Dili.

Iha Omilia, Dom Virgilio hateten kalan Natal fo hanoin katak Jesus moris mai mundu, iha ida-idak nia familia, I partikularmente iha ita idak idak nia fuan. Jesus lao iha ambiente ida neebe ema barak hatene iha fatin moris Belem. Tanba nee ema kriatura atu simu Maromak oan neebe mai iha ema hotu nia let.

Iha Primeira leitura fo hanoin katak povu neebe lao nakukun laran hare naroman boot ida, ba ema sira neebe tur iha nakukun laran naroman boot ida mosu ba sira. No ohin naroman iha Timor Leste, tanba maksoin moris iha ema hotu nia leet, povu neebe moris iha nakukun laran hare naroman boot ida.

Profeita Isaias nian iha momentu neeba iha povu ida neebe iha istoria nakukun, basa povu nee iha prosesaun tanba simu sira nia hahalok hodi moris iha nakukun laran.Tanba nee, Isaias mosu hodi Nai Maromak nia naran haklaken paz ho esperansa, profeta Isaias hafanu povu Farizeus hodi hein loron ksolok, neebe loron ida neebe sai ksolok ba ema hotu.

Ida nee sei sai duni loron ksolok ba ema idak idak nian, maibe saida maka ita halo atu soe hahalok aat sira hotu,” tenik Dom Virgilio bainhira preside Misa kalan Natal iha igreja Katedral, Dili, Domingu (24/12/2017).

Dom Virgilio hateten, Nasaun Timor Leste nasaun livre, povu livre, basa keta haluha nasaun Timor leste iha uma ida nee duni tenke sai ksolok ba ninia familia no nasaun.

Iha fatin hanesan Jose da Silva hanesan sarani hateten, Natal katak Jesus moris mai mundu, hodi hafoun ema idak idak nia laran hodi moris haksolok no kontenti iha familia nia laran.

Natal katak ita Nai Jesus moris mai mundu hodi hafoun ita nia idak idak nia laran, hodi moris kontenti ho ita nia familia sira,” dehan Jose.

Entretantu misa kalan Natal iha Igreja Katedral Dili hahu iha tuku 21:00 OTL remata 23: 22 OTL, Misa nee lao diak no laiha problema ida maka akontese, tanba hetan seguransa husi PNTL.

50 Simu Jesus

Dom Virgilio akompania husi Padre Parokia, Santa Terezinha do Menino Jesus Bedois Pe. Alberting Franco hodi selebra misa Natal, mesmu tempu fo sakramentu Eukaristia ba labarik 50 resin, iha loron  (25/12/2017) hodi simu Nain Jesus iha sira nia fuan

Iha Omilia bibi atan Dioseze Dili hateten, labarik hirak nee simu primeira komuniaun iha loron Natal signifika sira simu naran iha sira moris no simu Nain Jesus iha sira nia fuan, simu paun lalehan no simu aihan espiritu lalehan nian.

Eis Provinsial SDB Indonesia/Timor esplika katak paun neebe mak imi simu sei haforsa imi nia neon haforma imi nia klamar iha vida espiritual, ida nee imi nain 50 neebe prepara imi nia durante nee ohin imi rasik mai simu Jesus iha imi nia fuan.

Natal Jesus hatudu mak ita katak nia mak naroman mundu nia, Natal ita hanoin ita Nain Jesus iha ita nia leet, iha ita nia familia, iha ita nia fuan. Iha Bethlem neebe rai ida kiik no mukit Jesus moris iha neeba, Nain feto no Sao Jose sente laran taridu tanba laiha solidaridade. Nee duni liturzia ohin nia konvida ita atu sai husi nakukun ba naroamak nia, hanesan Jesus moris iha Bethlem,” dehan Dom Virgilio liu husi omilia bainhira prizide misa Natal iha Parokia Santa Terezinha do Menino Jesus Bedois Segunda (25/12/2017/2017).

Nia dehan, Anjo sira lori naroman ba sira neebe lao hela iha nakukun laran, lao hela iha sala laran, bibiatan sira laos rona deit maibe halo tuir anjo sira nia lian no halai ba Bethlem no haree, anjo sira haksolok tanba Jesus nia prezensa ida nee ho ksolok.

Needuni se ita buka duni naroman atu sai husi nakukun ita hakbesik ba santu, hakbesik ba santidade ninia moris nia,” dehan Dom Virgilio.

Nunee iha kalan Natal Padre Parokia, Sagradu Coracão De Jesus Pe. Guilhermino da Silva banhira prizide misa kalan Natal (24/12/2017) iha Igreja Sagradu Coracao De Jesus Becora dehan, iha situasaun difisil nia laran.

Se ita iha tauk nia laran lia fuan keta tauk nee hametin tebes ita no lia keta tauk nee fo tebes eperansa mai ita. Pelumenus ema neebe iha esperensia tauk nia bele koko nia bele sente lia fuan ida nee iha nia moris,” dehan Pe, Guilhermino liu husi Omilia

Nia dehan, maibe ba ema sira simples ba ema sira neebe bele dehan hanesan bibiatan sira liafuan ida nee ba sira hanesan buat foun, sa tan Maromak nia anjo neebe mak mosu ba sira, ida nee nabilan tebes tebes halo sira hakfodak liu tan. Ema neebe esperensia ho kbiit hatene oinsa kuidadu no oinsa bibiatan ida bele moris.

Nunee nia dehan, bibiatan ida nia servisu mak hein bibi, bibiatan ida nunka hela iha sidade maibe sira sempre hela iha rai luan, hanesan fatin ba sira atu moris hisik kosar ben ba moris, fatin ba sira atu halao sira nia knar.

Sira moris sira preokupa deit ho sira nia bibi, sira mos nunka iha haree herodes nia oin iha tempu neeba, sa tan rona herodes nia Vida! Sira kala rona maibe sira la preokupa tanba sira laos ema ba ida nee, sira ema ba bibi sira deit. Iha kalan nee mos sira hein sira nia bibi hanesan bain bain, sira lahatene se mak Mesias nee! Maibe, anjo mosu ba sira hateten katak keta tauk, ohin moris ona ho imi mesias ita nain, ema hili kose mina ba nia ulun no hili sai liurai.

Mesias ida nee moris los iha bibi luhan, nia latransforma bibi luhan sai nabilan no kmanek, nia laos moris iha sitausaun bain bain, buat neebe labain bain ba bibiatan sira neebe halai. Bainhira sira haree sira hakfodak no tauk tanba sira nunka sira haree buat neebe nabilan hafoin sira hatene nee Maromak nia anjo, sira hatene katak Maromak nia Gloria mosu ona ba sira, no sira haksolok tebes. Rona anjo nia lian katak Mesias moris ona,” esplika Pe Guilhermino.

Nia hatutan, hanesan ema judeu sira hatene Mesias nee liurai neebe sei moris ba sira atu solisita, sira haksolok liu tan rona anjo sira nia lian hananu no hahi nain Maromak, ida nee mak bibiatan sira nia Natal iha tempu Jesus moris.

Jesus transforma bibi luhan no bibiatan nia moris maibe Jesus transforma bibiatan sira nia neon no laran, sira sente haksolok tebes no sira hetan previleziu boot tebes, Maromak halo sira sai ema numeru 1, haree Mesias tama iha mundu, Mesias mai moris iha sira nia fatin basa, sira ema neebe simples no ema neebe mos no haraik aan, sira lahanesan ho ema iha sidade ka hanesan ho ema boot neebe mak nia laran nakonu ho manipulasaun ka falsifikasaun.

Nakukun kalan nia halo sira tauk, maibe nain nia naran liu husi anjo mosu halo sira nia neon kontente no laran haksolok nain mai moris iha sira nia aan no iha sira nia situasaun real.

Iha Observasaun diariu nee iha Tereinu katak, misa kalan Natal  prezide husi Padre Parokia Sagrado Coracao de Jesus, Pe Guilhermino da Silva iha Igreja Becora hahu iha tuku 8:00 Otl  kalan to remata, lao diak tebes tanba hetan segirasa maka husi Polisia Nasional Timor Leste liu liu seksaun Tranzitu no apoiu husi patruilamentu konjunta husi F-FDTL no PNTL.

Sarani Husi Parokia Sagradu Coracao de Jesus Wain ba wain antusias tebes hodi partisipa misa nee too remata, maske igreja refere fatin la dun sufesinte ba sarani sira atu tur iha kadeira maibe saranai maioria araza tur fatin ba sira aan (lori kadeira husi uma) hodi tur balun hamrik too Misa remata maibe sira lasente kolen e sira nafatin hatudu sira ksolok no kontente hodi partisipa misa too remata. Carme Ximenes/ Luciana Ximenes

Facebook Comments

Leave a Reply

Your email address will not be published. Required fields are marked *