CNRT Lamenta Akuzasaun FRETILIN – Sosiedade Sivil

CNRT Lamenta Akuzasaun FRETILIN – Sosiedade Sivil

- in Notisias Online
318
0
PN

DILI– Lideransa partidu Congressu Nasional Reconstrusaun Timorense (CNRT), lamenta tebes ho akuzasaun husi partidu opozisaun FRETILIN no Sosiedade Sivil neebe mak akuza Sekretariu Jeral Partidu CNRT, Fransisco Kalbuady Lay desvia husi Justisa Timor Leste (TL).

Tuir Xefe Bankada CNRT, Duarte Nunes promote katak, kona ba justisa iha TL, CNRT prontu atu koopera, bainhira tribunal haruka karta notifikasaun ba Parlamentu Nasional (PN), atu hasai imunidade ba deputadu Francisco Kalbuady Lay.

Ita labele halo intrepretasaun katak, Deputadu nee atu subar husi imunidade. Maibe,  ida nee la loos tanba, nia nuudar deputadu, bainhira deit tenke mai, tanba nee CNRT prontu apoiu servisu setor justisa  bainhira tribunal haruka karta notifikasaun ba PN, atu hasai imunidade ba deputadu Francisco Kalbuady Lay hodi ba presta deklarasaun,”dehan Prezidente bankada CNRT,” ba Jornalista Tersa (26/2/2019) iha PN.

Nia haktuir, antes nee Ministeriu Publiku (MP) notifika Sekretariu Jeral Partidu CNRT Kalbuady sei iha liur tanba trata nia saude, nunee nia (Kalbuadi-red) hakerek fila fali karta ba iha MP.

Dala ida tan laos halai ses husi justisa tanba nee bainhira Tribunal haruka karta notifikasaun ba PN, atu hasai imunidade ba deputadu Francisco Kalbuady Lay, CNRT prontu apoiu hodi ba presta deklarasaun,”dehan nia.

Iha fatin ketak, tuir Deputadu Joaquim do Santos, Fretilin konsideira Francisco Kalbuady Lay uza PN sai abrigu ba nia, hodi hasoru justisa, signifika nia mai fali subar aan iha PN.

Hau hanoin Nasaun ida nee atu lao ba oin maka ita hotu hotu tenke, kopera ho justisa, tanba nee husu ba Deputadu Kalbuady bele ba hasoru uluk justisa, regras tenke lao no orgaun soberanu sira kuandu bolu ita maka, ita tenke ba, labele mai fali iha orgaun soberanu PN hodi hein, Parlamentu atu foti imunidade ka lae,”tenik nia.

Nia mos afirma liu tan katak, karik membru governu sira maka hetan imunidade hanesan nee, maka liu tinan rua tenke ba ona, mais Deputadu tenke liu tinan lima ba hatan.

“Hau lakonkorda tanba Kalbuady dehan atu koopera ho justisa, maibe realidade nia sei iha liur nia la ba hatan justisa no nia mai fali asumi knaar hanesan Deputadu iha Parlamentu maka nia foin deklara atu koopera ho justisa tanba nee ita bele dehan politika failadu”dehan Deputadu nee.

Entretantu,tuir Direktur Exekutivu FONGTIL Daniel dos Santos Carmo, kazu kona ba Francisco Kalbuady Lay, ema hot-hotu hatene katak ninia kazu iha ona Tribunal, Tribunal rasik tetu ona katak nia hanesan suspeitu liu husi desizaun Tribunal, no halo xamada ba nia hodi presta nia deklarasaun dala hira ona iha Tribunal.

Se ami la sala rona mos katak iha ona mandadu kapturasaun ba Francisco Kalbuady Lay. Maibe, tanba saida maka bainhira nia fila husi viajen mai ba konsulta, polisia lahalo ninia knaar atu halo ejekuta mandadu neebe Tribunal hasai, entaun nee ita kestiona ona katak frankeza nee iha instituisaun PNTL maka la kapavel atu asegura ka atu orden husi Tribunal ka tanba iha intervensaun politika, entaun nee maka ita buka hatene”, afirma nia.

Maibe, pior liu tan ho kazu ida neebe agora sei manas hela Tribunal lahalo xamada ka la halo mandadu kapturasaun, polísia la naran kaptura maibe derepente deit ema nee ba para tiha ona fali iha PN hanesan membru deputadu.

Hau lahatene Francisco Kalbuady Lay iha rai ida nee nia hanesan saida, se nia hanesan sidadaun bai bain hanesan ema hotu-hotu, entaun ita hotu-hotu tenke iha lei nia okos signifika PN mos labele autoriza nia, tanba PN iha regra rasik labele autoriza nia simu lai hanesan membru deputadu tanba nia iha kazu Tribunal bolu hela depois Tribunal hasai hela mandadu kapturasaun depois PN tilun diuk, matan aat hodi derepente deit bolu nia ba sai deputadu sira simu tiha nia ba subtitui nia tanba nia SEKJER partidu nian, entaun nee la diak”, hateten Daniel.

Tuir lider maximu FONGTIL nee katak Francisco Kalbuadi Lay iha rai ida nee, bainhira  koalia kontribuisaun ema hotu hotu halo kontribuisaun ba rai ida nee, tanba nee Francisco Kalbuadi Lay mos tenke konxiente katak labele helit iha PN atu hetan imunidade nee husu Francisco Kalbuadi Lay labele uza ida nee.

Tanba Saida se nia ba deputadu automatikamente nia protesaun husi imunidade entaun deputadu sira iha PN sei halimar foer hodi la hasai ninia imunidade atu nunee ba hatan iha Tribunal ida ne’e, maka kestiona TL ninia kredibilidade,   ninia PN nee hanesan orgaun reprezentativu, orgaun neebe halo lei no halo fiskalizasaun ba implementasaun lei sira, entaun ida nee sai preokupasaun ba sosiédade sivil liu liu FONGTIL.

Ita hatene iha rai ida nee iha ema didiak, ema neebe halo funu tinan 24 iha ai laran sira hotu-hotu iha konxiente ida katak ukun aan ona lei maka iha leten no ita hotu hotu iha kraik signifika se se de it maka halo sala tenke ba hatan iha Tribunal tantu Francisco Kalbuadi Lay” hateten Daniel.

Daniel hateten  liu tan katak  kazu ida nee atu hatudu ba publiku katak  nia lider sira komesa halimar ona oinsa maka tau sira nia kanur tohar tan ba iha seitor justisa no hateten ba dala ida tan katak saida maka sira halo nee la loos no sei hamonu  ita ninia marjen instituisaun judisiariu TL nian iha mundu liu liu iha povu nia matan atu povu nafatin kontinua dehan katak boot sira halo sala laiha problema  halo sala ba kaer liu hanesan nee maibe boot sira halo sala laiha .

Nia dehan kazu ida nee akontese ba dala tolu ona hahu husi kazu Maternus Bere too mai kazu Emilia Pires no mos kazu Francisco Kalbuadi Lay nee interferensia husi lider sira, ita ninia politiku sira ba iha justisa ne’e boot liu.

Hau laiha evidensia atu hateten dehan lider ida nee ka lider ida neeba nia orientesaun tanba ita mos konxiente kona ba asuntu ida nee, maibe ita haree katak prátika ida neebe PN ba hau iha nee kestiona Prezidente PN ho partidu neebe Francisco Kalbuadi Lay reprezenta ba iha PN, Prezidente PN ho partidu CNRT maka hanesan autor prinsipal kontribui hodi asegura Francisco Kalbuadi Lay atu sai membru deputadu serake Fancisco Kalbuadi Lay iha hela kazu” hateten Daniel.

Nia fundamenta liu tan autor prinsipal iha rai ida neebe promove halo intervensaun politika ba iha setor justisa no ba iha kazu Francisco Kalbuadi Lay nee maka Prezidente PN ho partidu CNRT iha PN no mos partidu sira neebe iha PN sira mos kontribui hotu PD, FRETILIN, PUDD, UDT sira maka kontribui hotu maka to’o ikus Francisco Kalbuadi Lay bele sai membru deputadu loos sira maka tenke kestiona ona uluk, sira maka tenke foti uluk pozisaun ida forte iha PN, laos ko’alia deit ba media tenke foti aktu tuir lei ka regulamentu neebe iha atu regulamentu neebe iha atu nunee labele autoriza Francisco Kalbuadi Lay ativa hanesan membru deputadu.

Tuir Diretor Ezekutiva Asosisaun HAK Manuel Monteiro,ida nee maka  dehan katak tuir sira nia pontu devista lider politiku sira la kontribui ba oinsa maka atu kombate korupsaun, koluzaun iha rai laran, tanba iha ona notifikasaun signifika katak ema nee tenke loos duni katak nia iha direitu ida sidadaun tuir konstituisaun republika sei nafatin konsidera ema nee hanesan inosente ida ka sala laek too desizaun Tribunal hakotu.

Maibe, bainhira iha ona notifikasaun husi Ministeiru Publiku signifika katak ajente ruma nee iha konflitu ho lei nunee hanesan sidadaun neebe diak, hanesan lider neebe diak tenke hatudu ezemplu diak ba sosiedade atu koopera ho justisa sala ka la sala nee tenke prova iha Tribunal so Tribunal deit maka bele prova katak dala ruma sala ka la sala kontra lei neebe  iha.

Hau dehan bainhira nain ulun siraka polítiku nain sira la hatudu ezemplu diak ba sosiedade, sosiedade sei sai aat liu tan tanba lisaun nee sira maka halo, lei sira maka halo, sira maka halo politika sira maibe sira rasik la kumpri nee sidadaun sira atu kumpri oinsa. Nunee mos halo loos liu tan prespesaun komunidade ninia katak justisa nee ba ema kiik deit, maibe justisa ba ema boot nee laiha”, nia fundamenta.

 Nia esplika nee konserteza hafraku sistema judisiariu neebe rai laran lao dadauk no mos hafraku ezistensia partidu politiku ninia liu liu CNRT neebe iha komitmentu boot hakarak kombate korupsaun, koluzaun no nepotizmu no la tolera se de’it maka komete aktu nee tenke prosesa.

Maibe saida maka ohin loron lider partidu boot ida halo hodi la koopera justisa nee hatudu lisaun la diak ba sosiedade ida nee loloos labele akontese sala ka loos nee la’os kestaun maibe kestaun maka partisipa.

Nunee mos, tuir Direktor JSMP Luis De Olivera Sampaio, “Nee maka ita nia lalaok sistema judisiariu nian, desafiu oin oin iha mos tentativa politikus sira nian, atu buka dalan desvia husi prosesu neebe lolos sira tenke kumpri. Buat neebe politikus sira sala, maka entende no interpreta notifikasaun hanesan, buat todan ida, ”dehan Luis.

Tuir lolos notifikasaun neebe iha, atu tuir prosesu neebe ligasaun ho indikasaun, ka deskonfia envolve iha krime ruma, sala ka la sala. Atu halo politikus nee kredibel liu, atu sira nia naran no organizasaun partidu nia naran boot, tuir lolos sira tenke kopera. Labele buka jeitu tun sai, hodi ses an husi prosesu nee.

Nunee iha tribunal iha prinsipiu fundamental liu maka, prezoluasaun ba inosente, ema nee ita labele fo sala ba, bainhira seidauk iha desizaun. Dala ruma politiku sira iha hanoin ba iha tribunal nee tanba sala ona, maibe tribunal fatin neebe dignu atu proteje an, no direitu sira.

Hau hanoin iha kazu Kalbuady nian, dala ruma desafiu sei iha, mas nia prosesu atu kumpri notifikasaun iha tribunal, tenke liu husi hasai nia imunidade se karik agora dadaun nia hanesan deputadu. Prosesu ida nee han tempu lubuk ida, dala ruma labele akontese,”dehan Nia.

Tanba nee politiku sira, tuir lolos tenke honestu hatudu exemplu ba sosiedade atu iha korajen, atu hasoru justisa neebe lao hela. Nee mos hanesan prosesu ida, atu foti ita nia nasaun no sistema, atu folin iha ema seluk estadu no investedor sira nia oin, atu sira bele hanoin katak, sistema judisial iha timor lao ba oin. Labele buka atu infrakeza fali no prejudika fali sistema nee rasik.

Direktor nee dehan, agora dadaun dalan atu lori membru governu no deputadu sira nee, liu husi plenaria halo levantamentu hasai tiha sira nia imunidade provezoriamente. Ida nee halo bainhira prense korum iha PN. Buat hirak nee dala barak hanesan desafiu ida, maibe hein katak sira bele kolabora, mesmu kaer estatutu hanesan deputadu, iha notifikasaun tenke ba kolabora, atu hatudu sira nia kualidade hanesan lider politiku.

Tuir lolos nia asumi kargu hanesan deputadu ativu ka membru governu ruma, se la kumpri notifikasaun, bele hasai kedan notifikasaun hodi obriga Kalbuadi marka prezensa iha audensia ka prezensa iha ministeriu publiku atu tuir enkeretu ruma. Tuir mai politiku sira aproveita, tanba nee se PN la prende korum hasai imunidade, ida nee sei susar.

Luis esplika tan, kargu politiku la permanente, tinan lima agora sira kaer ukun sei susar ba autoridade judisial sira atu ezekuta ordem nee tanba, iha impedimentu ida konaba imunidade. Maibe tinan lima mai fali, serake sira maka kaer ukun nafatin ka ema seluk, nee hanesan presegisaun boot liu ona.

Tanba nee se agora sira kaer ukun mos, koko atu kolabora atu hetan taratamentu neebe dignu liu. No autoridade judisial sira mos iha, sentimentu atu tarata ema sira nee ho dignidade, tanba sira hatene ema sira nee, nudar eis membru governu, ka asumu hela kargu importante balu.

Hatan kona ba notifikasaun Kalbuady, Prezidente Majislatura Judisial Timor Leste Antonino Gonsalves hateten, se Kalbuadi hanesan deputadu, notifikasaun tenke dirije ba iha PN.

Se nia hanesan deputadu ona situasaun lao oin seluk ona, notifika fali ba iha PN, hodi autoriza nia hatan iha investigasaun. Maibe tuir lolos notifika nia bele ba deit ona, mas depende se dehan iha imunidade tuir regra rejimentu parlamentu nian, kestaun sira nee liu husi plenaria atu bele autoriza, ”Dehan Antonino.

Nia esplika, kazu nee agora prosesu investigasaun iha ministeriu publiku, no nia mos hanesan deputadu, tenke liu husi regra imunidade nian, atu hare ba ida nee.

Salienta tan, nia hanesan deputadu ona notifikasaun haruka ba iha PN, atu husu autorizasaun, sira bele halo plenaria tuir artigu 8 rejimentu PN nian. Hodi liu husi votasaun sekretu, no sira deside hasai imunidade, atu nia ba responde iha MP ka tribunal, sira mos tenke fo hatene fali ba iha tribunal no MP katak, hasai nia imunidade ona, no nia bele ba presta deklarasaun.

Nunee MP notifika ba nia, atu ba hato deklarasaun. Maibe se la hasai imunidade mos, tenke komunika ba iha MP no tribunal, konaba rezultadu votasaun iha plenaria, la hatan nia ba, no prosesu nee sei husik, hein too nia deputadu hotu maka bele kontinua.

Nia esplika, agora dadaun prosesu investigasaun deit, tanba nee presija iha dever de kolaborasaun, tanba nee se MP notifika bele ba presta deklarasaun, atu tama ba iha julgamentu, maka bele hare fali ba nia imunidade.

Prezidnte AMJTL salienta, iha lei hateten hotu hotu iha dever atu kumpri notifikasaun ruma, la presija dada ba mai, nia rasik bele hili, no espresa nia sentimentu katak, prontu ba presta deklarasaun.

Hatan ba Kestaun nee Deputadu Calbuady Lay hatutan, nia parte pronto atu koopera ho setor Justisa, tan nee nia pronto atu ba presta Deklarasaun. Madalena Horta/Natalino Costa/Terezinha de Deus

Komentariu

Facebook Comments

Leave a Reply

Your email address will not be published. Required fields are marked *