CCI-TL Loke Feira

CCI-TL Loke Feira

- in Economics
8
0
oscar lima_141_thumb_medium344_0

DILI-Camara Comersiu Industria Timor Leste (CCI-TL) Loke feira loron tolu hahu husi loron Sesta (29 too 1 Dezembru) ho objetivu atu fo oportunidade ba empreza kiik, faan sira nia produtu hodi hetan rendimentu sustenta familia.

Kestaun nee fo sai husi Prezidente Camara Comersiu Industria TL(CCI-TL), Oscar Lima ba jornalista Sesta (29/11/2019) iha nia knaar fatin Akait Dili.

Ita haree katak durante nee atividade hotu hotu lao paradu, no povu kiik sira la hetan rendimentu, tanba nee CCI-TL, iha hanoin ida hodi realiza  feira, atu nunee negosiante kiik sira bele lori netik sira nia produtu lokal mai faan, hodi hetan netin osan oan ruma, no feira ida nee loke mos oportunidade ba banku sira atu mai faan mos sira nia programa iha feira nee, dehan Prezidente CCI-TL, Oscar Lima.

Nia mos afirma liu tan katak, hanesan setor privadu tenke fo atensaun ba atividade povu kiik nian, no labele haree deit ba buat neebe  boot, hodi husik hela sira kiik nee, tanba nee hahu agora tenke haree mos atividade kiik sira nee.

Ekonomia iha rai ida atu lao diak maka, tenke dezenvolve diak liu tan pekenas no empreza kiik sira no ekonomia laos depende deit ba empreza boot deit, maibe tenke haree mos ida kiik, tanba povu barak maka hola parte iha atividade negosiu kiik iha kapitak Dili.

Hau hanoin liu husi impase politik neebe lao iha rai laran, halo povu kiik barak maka terus, maibe ida nee hanesan faze ida atu hanorin  ita bele hakas aan liu tan, liu husi inisiativa neebe ita iha hodi alkansa ita nia objetivu tuir planu ida idak nian, dehan Oscar Lima.

Iha fatin hanesan, Reprezentante Ministru Turismu Comersiu Industria (MTCI), atual Asesor Prinsipal, Jacinto Rigoberto hatutan, Feira Industria Merkadu 2019 nee, importante tebes tanba konvida mos negosiante kiik sira atu lori sira nia produtu lokal mai faan iha feira ida nee, hodi hetan netik rendimentu ruma.

Hau apresia tebes ho inisiativa CCI-TL nian, hodi organiza Feira industria merkadu 2019, tanba atu halo expozisaun ba produtu rai laran iha merkadu, atu nunee publiku hotu bele mai vizita hodi sosa netik buat ruma iha atividade ida nee, tanba nee feira ida nee importante tebes, dehan  Asesor Prinsipal nee.

Nia mos afirma liu tan katak, feira hanesan eventu neebe promove husi orgaun sosial no unidade politika neebe asumi papel ba ekonomia sustentavel.

Nunee mos Diretora ezekutiva Guida Araujo Monteiro hatutan, feira ida nee importante tebes, atu enkoraza vizibilidade organizasaun no nia membru sira, atu nunee bele loke dalan ba merkadu exspozisaun produtu husi asosiasaun no organizasaun sira neebe liga ba fator ekonomia iha rai laran. Madalena Horta

Komentariu

Facebook Comments

Leave a Reply

Your email address will not be published. Required fields are marked *