Carinton Salazar Gonzaga Freitas

Carinton Salazar Gonzaga Freitas

- in Perfil
243
0
image001 (1)

Mane maluk ida nee moris hosi família simples ida iha area Munisipiu Baucau. Oan husi Ana Fernanda Freitas (matebian) hosi Suku Uailili, Uagarana. Nia aman hosi Ostico, Vemasse, Baucau. Iha tempu kolonia Portugés,  ninia aman halao knaar nu’udar professor lian Portugues iha tinan 1970.

Iha tinan 1975 bainhira funu boot nakfera, ninia aman ho família sira seluk halai ba ailaran. Hafoin rejiste tinan tolu iha ailaran, sira tun mai rende iha tinan 1978, hamutuk ho populasaun balu. Maske hetan intimidasaun no ameasa oioin, maibé lahamate sira nia espíritu luta ba ukun an.

Iha tinan 1980, ninia aman hetan hikas kontaktu ho ninia kompatriota sira iha ailaran, Komando da Luta Falintil.

Iha re-organizasaun ba funu, maun boot Kay Rala Xanana Gusmão hamutuk ho ninia grupu balu mós, ba hasoru populasaun balu iha Ostico.

Ikus mai harii organizasaun luta neebé hanaran Milícia Popular da Libertação Nacionál (MIPLIN). Iha tempu nee, ninia aman hetan konfiansa sai nu’udar Responsavel Prinsipál ba MIPLIN iha Zona Ventania (Anin-Fuik).

Liu tiha periodu balu, sira-nia serbisu  klandestina, hetan deskobre hosi militár Indonézia (TNI). Sira barak kapturadu tanba sira-nia involvimentu iha MIPLIN. Hafoin tuir inkéritu oioin  iha tempu neebá, TNI desterra sira ba Illa Ataúro.  Depois husi Atauro destera ba Purogua, Postu Administrativu Kailaku. Ikus mai, Carinton Salazar Gonzaga Freitas moris iha Purgoa, Kailaku, iha kadeia laran.

Tama faze ukun aan, iha tinan 2009, Carinton Salazar Gonzaga Freitas hahú haknar an iha Ministériu da Saúde. Laos deit halao funsaun nudar funsionariu publiku, nia mos ativu hakerek. Nia hakerek  artigu barak kona-ba saúde iha Ministériu Saúde.

Iha tinan 2011, nia frekuenta kursu multi-media kona-ba Web-Design no Graphic Design iha Inixindo Jakarta. Frekuenta kursu Jornalismu no Komunikasaun “Executive Master em Protocol e Media” iha Portugal, tinan 2014. Iha Instituto Superior de Comunicão Empresariál, Praça Principe Real, Lisboa.

Iha tinan 2018, frekuenta hikas kursu kona-ba “Professional Editor In News And Article” iha Wydia Karya Utama Bandung, Indonézia.

Iha tinan 2019 hakbiit liután ninia koñesementu kona-ba lian Tetun. Nia frekuenta kursu hakerek Tetun iha Lorosa’e English Language Institute (LELI). Alende nee, nia mos sai fasilitadór kona-ba hakerek notísia no artigu ba  pontu vocal mídia saúde iha munisipiu balu.

Atual nu’udar Photographer, Videographer no Editor ba notisia saúde ne’ebé normalmente públika iha media railaran no railiur.

Maske hala’o ninia knar nudar funsionáriu públiku, nia tenke obdese loron-loron ba servisu ministériu. So iha buat ida neebé nia nunka soe mak livru. Nia gosta lee livru, kualker livru saida deit nia lee. Hanesan ema matenek sira hatete, “Livru mak Janela hodi fihir ba mundu.” Bainhira lahatoman an ho lee, ita lahatene saida mak akontese iha mundu.

Referensia hosi livru no artigu barak, tantu, hakerek nain hosi rai laran ho rai liur sira, nia iha hanoin ida katak, nia hakarak prezerva ninia istória rasik. Maibé nia tenke halo saida hodi prezerva hirak nee hotu. Dalan uniku liu mak tenke hakerek, hodi akumula akontesementu balu neebé ninia inan aman sira halo no dalaruma sira haluha atu temi.

                                       ***

Ho grasa maromak nian, iha Maiu 2019, nia konsege finaliza livru ida neebe nia hakerek. Livru nee nia lansa ho títulu “MIPLIN & Desterradu Polítiku”. Iha livru nee nia hakerek konaba organizasaun luta nian ida nian, liga ba desterradu polítiku sira iha Illa Ataúro no Kailaku.

Nia espera, iha tinan 2020, nia sei lansa tan ninia livru konaba antolojia. Livru nee ho titulu “Domin no Bala-Musan”. Koalia konaba istória domin neebé halao hosi parseiru ida, durante iha invazaun nia laran.

Nia hakarak hatoo mensajen ba inan-aman sira liu hosi artigu badak oan nee. Nia husu inan aman sira tenke “Hatoman oan sira ho kultura  lee. Nunee mós ba maluk jornalista sira, ho 5-W+1-H, utiliza hakerek notisia ba livru ida mós, bele. Obrigadu. Jeniche da Costa

 

Komentariu

Facebook Comments

Leave a Reply

Your email address will not be published. Required fields are marked *