BOP Asina Plataforma AMP, Alkatiri: Governu Monu, Eleisaun Antisipada

BOP Asina Plataforma AMP, Alkatiri: Governu Monu, Eleisaun Antisipada

- in Politics
367
0
Asina Plataforma

DILI — Bloku Opozisaun Parlamentu (BOP) CNRT, PLP no Khunto asina ona plataforma koligasaun ba VIII governu konstituisional. Maibe pasu BOP nian sei determina liu husi desizaun povu nian, tanba partidu koligasaun Fretilin – PD prontu ba eleisaun antisipa, kuandu setimu governu monu.

Tuir Primeiru Ministru Mari Bin Amude Alkatiri programa governu nia pasa iha parlamentu nasional dalan maka tenke hakat ba eleisaun antisipada.

Se programa governu la pasa ita ba elisaun antisipada,” dehan PM ba Jornalista sira hafoin remata enkontru ho Prezidente Republika, iha Palasiu Prezidensial Bairo Pite, Kinta (12/10/2017).

Alkatiri hatutan oras nee dadaun   iha Timor-Leste ema balun koalia politika inkonsistente no laiha koerensia, ida neebe laos supreza ba politika, ohin koalia ida aban koalia halo oin seluk, maibe ba Fretilin iha nia politika neebe maka konsistente, tanba politika konsistente ema la gosta.

Alkatiri informa governu minoritariu neebe forma husi partidu koligasaun Fretilin-PD monu husu responsabilidade ba deputadu sira iha parlamentu. Tanba governu nee monu ka la monu desizaun iha deputadu sira nia liman, laos partidu koligasaun nian.

Se hakarak halo referendu ida ita halo, se hakarak maka nunee ita halo referedum aliansa maioritaria ka minoritaria,”  Alkatiri akresenta governu  minoridade  nia  programa  la liu iha parlament, sei governu foun ida hanaran governu jestaun.

Xefe governu nee hatutan nia parte laiha ona tempu atu konvense partidu opozisaun sira iha parlamentu. Tanba bainhira fila fali iha parlamentu, nee nuudar obrigasaun atu hatoo programa governu nian. Obrigasaun governu nia katak Alkatiri aprezenta programa governu nian, nee direitu governu nian atu aprezenta ba parlamentu, kuandu la aprezenta programa, signifika la kumpri dever hanesan governu.

Alkatiri informa programa neebe governu atu aprezenta ba iha parlamentu nasional nia karater nee atu servi povu no hatan problema neeb povu hasoru durantenee, tanba programa nee atu servi duni povu, atinji povu nian nesesidade neebe presiza.

Hau lafiar deputadu ida atu kontra fali programa ida nee,” argumenta Alkatiri.

Entretantu iha fatin seluk Bloku Opozisaun Parlamentu (BOP) asina ona plataforma koligasaun ba VIII governu, kuandu VII governu neebe forma husi partidu Fretilin-PD monu. Akordu plataforma koligasaun ba governu nee asinadu husi Prezidente Bankada CNRT, Arao Noe de J. da C. Amaral, Fidelis M. E. Mangalhaes Prezidente bankada PLP, no Luis Roberto da Silva Prezidente Bankada Khunto.

Hafoin asina plataforma koligasaun ba governu, neebe halao iha Hotel JL Villa Aimutin Dili Kinta, (12/10/2017).  Xefe Bankada Khunto, Luis Roberto da Silva dehan plataforma politika bloku koligasaun inisiativa politika hodi aprejenta ba Prezidente Republika konaba opozisaun maioria parlamentar nian.

Nee etapa ida atu reforsa deit karta neebe ami haruka ona ba PR no hanoin ba futuru. Liu husi programa neebe maka iha sei kuda nafatin interese nasional iha fuan no kuda nafatin paz no estabilidade iha rai laran. Tanba realidade iha PN opozisaun domina, nuudar opozisaun sei vota kontra programa governu iha parlamentu. Partidu tolu nee ho inisiativa politikamente hodi aprejenta plataforma politika hodi hatoo ba PR foin lais nee atu hodi hatudu katak nuudar opozisaun iha parlamentu no iha nafatin interese nasional no ami mos prepara hela atu forma governu neebe mak define ona iha konstituisaun,” tenik Luis.

Nunee mos Xefe Bankada CNRT, Arao Noe de Jesus dehan partidu   iha parlamentu nasional laos halo knar rasik. Maibe nuudar bankada halao deit politika tuir partidu nia bazea orentasaun partidu. Tanba nee asina plataforma nee atu forma estrutura nasional inklui Prezidente CNRT Xanana Gusmao.

Akordu nee atu reforsa deit karta neebe haruka ona ba prezidente republika tanba nee akordu nee hanesan reforsa tan deit karta ida nee. katak orentasaun sira neebe maka partidu tolu halao nee politika partidu nian.

Ita hotu hatene katak partidu nee iha PN laos halo knar rasik maibe nudar bankada halao politika partidu nian bajeia ba orentasaun politika partidu. Tanba nee maka ami asina dadauk nee atu halo estrutura nasional CNRT nian hanesan funsaun politika CNRT nian inklui Prezidente Xanana Gusmao iha linha CPN,” tenik Arao.

Enkuantu Xefe Bankada PLP, Fidelis Manglhaes dehan atu forma maioria parlamentare tuir konstituisaun fo dalan, tanba nee halo politikamente atu halo atuasaun tuir konstituisaun. Ida nee hanesan responsabilidade partidu maioria iha parlamentu ho intensaun atu fo moris diak ba povu. Tanba nee maka akordu nee halo.

Tanba ita atu implementa ita nia programa, ita implementa ita nia politika tanba nee presiza apoiu maioria iha PN. Ami halao ida nee maka ami fiar malu ami ho laran nakloke ho respeita malu.  Neebe ba oin ami sei deskute ho kumprende hotu entre ami,” tenik Fidelis.

Plataforma politika aliansa maioria parlamentar nia intensaun katak Fidelis atu tane   rai no ema ho kosar ben rasik, hodi bali povu nia mehi. Preambulu konsidera katak iha eleisaun neebe realiza iha loron 22 Juilu 2017, povu TL esperansa ho forma livre no demokratiku nia no vontade hodi la fo ba partidu politiku sira hotu neebe konkore iha aktu eleitoral hodi hetan maioria absoluta iha PN.

Nia hatutan rejultadu ida nee atu forma governu ida neebe metin estavel no reprezentativu, presiza servisu hamutuk entre parpol neebe hetan asentu iha parlamentar hodi hamosu maioria parlamentar neebe garante estabilidade governativa. Rekonese katak servisu hamutuk nee rekere esforsu no sakrifiiu boot husi parpol sira hodi konvense politika no programa idak-idak nian nunee entegra iha planu komun.

Planu komun governasaun ida neebe fo impulse ba dezenvolvimentu no moris diak povu. Tanba nee parpol neebe la entegra iha koligasaun governamental deside hamosu politika ida hodi promove moris diak ba povu, hametin estabilidade nasional kompremetidu ba dezenvolvimetu pais nian liu husi afirmasaun iha PN hanesan sentru prinsipal ba diskusaun politika nasaun nian.

Parrtidu Libertacao Popular (PLP), partidu Kmanek Haburas Unidade Nasional Timor Oan (Khunto) no partidu Congresso Nacional d Reconstrucao de Timor Leste (CNRT) hamosu plataforma politika ida hodi define integra programa no politika publikas nebe rigorozu no abrajentes hodi mobiliza povu hola parte iha dezenvolvimentu nasional ho rekursu neebe ho forma edukadu no efisiente.

Prinsipiu no vizaun maka atu reafirma politika parpol neebe forma aliansa maioria parlamentar (AMP) hodi serbi povu no nasaun neebe ho diak plataforma nee hatur tuir prinsipius fundamental konstituisaun RDTL neebe konsagra iha artifu 1 to artigu 15 hanesan valores demokratiku moris diak povu nian.

Respeita ba direitus humanus no promove respeitu ba leis no regras konstuisaun neebe vigora iha nasaun nee. Konsidera moos katak plano estratejiku dezenvolvimentu 2030 hatuur dejenvolvimentu hamanu hanesan fator determinante ba harii nasaun TL neebe progresivu no justu. Maka plataforma nee harii bazeia ba pilares dezenvolvimentu nian establese iha PED 2030 iha capital sosial infraestruturas bazeia ba dezenvomvimentu ekonomia no kuadru instituisoins hodi lori TL ba pais neebe rendemimentu mediu no altu iha 2030 nunee liberta povu husi kiak no mukit.

Objetiu prinsipal plataforma nee maka lori povu TL ba moris diak liu husi promove dezenvolvimentu ida neebe fahe rekursu ho oportunidade hanesan. Atu alkansa objetivu nee maka iha tinan lima 2017-2022. Sei adopta estratejias sira. Kontinua hametin estabilidade paz no seguransa. Hadia diak liu povu nia moris liu husi investementu publiku neebe liga liu ba kapasidade produtu povu nian. Kontinua halao politika desentralizasaun hodi hakbesik governunasaun ba povu atu responde nesesiaddes imediatas povu iha areias no munisipius. Hametin sistema justisa hodi hamosu sistema justisa ida nebe indepedente efisiente no justu.

Promove transparansia no kontabilidade ba uzu kualiker fundu estadu.  Kontinua implementa reforma fiskal, preserva no haburas jestaun fundu petroliferu. Kontinua promove seitor privadu hodi aijuda kria oportunidade trabalhu. Hadia fali programas balun neebe la kondus situasan atual pais nia. Promove dezenvolvimentu ida neebe fahe rekursu ho oprtunidade hanesan. Hadia prestasaun servisu neebe diak ba povu, promove programa asesu ba kreditu neebe lais no baratu. Promove nafatin rekonesementu ba antigus kombantentes libertasaun nasional. Kontinua fo atensaun ba juventude no promosaun igualidade.

Hametin no dezenvolve indentidade cultural no harii uma ba kbit laek ho kualidade no hahu politika rural no urmana.  Asinadu husi Prezidente Bankada CNRT Arao Noe de J. da C. Amaral, Fidelis M. E. Mangalhaes Prezidente bankada PLP, no Luis Roberto da Silva Prezidente Bankada Khunto. Visto Prezidente CNRT Kay Rala Xanana Gusmao, Taur Matan Ruak Prezidente PLP no Konseleiru Superior Khunto Jose dos Santos Naimori. Natalino Costa/Justinho Manuel

Facebook Comments

Leave a Reply

Your email address will not be published. Required fields are marked *