Bobonaro Oan Hakarak Kontinua Istoria Americo

Bobonaro Oan Hakarak Kontinua Istoria Americo

- in Distritu
1241
0
Foho Matebian

MALIANA-Bobonaro oan hakarak kontinua istoria boxista Timor Oan hanesan Thomas Americo (matebian) no Victor Ramos neebe iha tempo okupasaun Indonesia, konsege hamorin naran Timor Leste iha eventu nasional no internasional.

Iha tempo ukun aan nee, Bobonaro oan hakarak kontinua istoria pasadu nee.

Ami esforsu atu kontinua lao tuir istoria Thomas Americo no Vitor Ramos. Sira nain rua hosi Bobonaro,” hateten Prezidente Association Bobonaro Boxing Amateur (ABBA), Cornelis Raibaq ba STL foin lalais nee iha Maliana.

Nia parte agora buka hela dalan, atu loke sasana boxing ida iha Maliana. Maske seidauk hetan apoiu husi governu no kompania balu, atu estabelese sasana boxing iha Maliana, maibe nia optimista, ba futuru sei hetan objectivu.

Raibaq hatete, objectivo estabelese sasana boxing iha Maliana, atu minimiza krimi mak akontese entre joven iha area autoridade Municipal Bobonaro. Durante ukun an, joven barak involve iha arte marciais hodi hatudu hahalok krimi hasoru ema seluk.

Nia haree, joven Bobonaro iha talentu ba boxista, maibe laiha fatin atu ezerce sira nia hakarak. Tamba ne’e, nia hamutuk estruktura ABBA, buka dalan atu husu apoiu governu no kompania balu.

Atu estabelese sasana boxing iha Maliana, ABBA prepara ona kondisaun minimu. Tamba, ekipamentos boxista balu agora dadaun associasaun iha ona, hein ring boxista, atu kompleta. Aleinde ne’e, Bobonaro oan barak, mak prontu sai treinador.

Bobonaro oan hela iha Dili barak mak iha esperiencia ba boxista. Balu mos hela Bobonaro. sira prontu atu sai treinador, kuando estabelese ona sasana iha Bobonaro.

Secretaris Jeral Associasaun Boxista Bobonaro, Leandro Vicente hatete, Bobonaro iha potensia boot ba boxista. Iha tempo okupasaun Indonesia iha Timor Leste, Bobonaro oan mak dahuluk halo istoria iha boxista nian. Bobonaro oan reprezenta nasaun Indonesia iha eventu nasional no interbasional,

Tuir Leandro, associasaun boxing Bobonaro buka meios ida, ba futuru sei loke sasana ida iha Maliana, kapital autoridade Municipal Bobonaro, hodi envolve joven sira mak iha talento ba boxista. Ba joven Bobonaro, boxing laos desportu foun ida, maibe sira kuinese nanis iha okupasaun Indonesia.

Boxing laos deportu foun ba ema Bobonaro oan, tamba Bobonaro oan mak sai eroi dahuluk iha tempo okupasaun Indonesia,” Leandro hatete.

Entertanto, treinador Cavalho fronteira, Carlos de Jesus hatete, nia nudar Bobonaro oan prontu, atu fo apoiu treino ba jovens Bobonaro sira mak hakarak promove talento iha boxing. Ba ema Bobonaro oan, boxing laos buat foun ida iha sira nia istoria. Tamba, iha Timor Leste, Bobonaro oan mak dahuluk, lori boxing mai iha Timor Leste.

Tuir Carlos, boxista iha Dili, Bobonaro oan mos barak mak envolve hamutuk. Tamba ne’e, nudar Bobonaro oan, prontu atu fo apoi ba malu lori Bobonaro hetan. “Bobonaro oan mos, hahu hamorin ona naran Bobonaro iha nasional,” Carlos. João Mau Leto

 

Facebook Comments

Leave a Reply

Your email address will not be published. Required fields are marked *