Iha ninia intervensaun, Ministru Saude, Nelson Martins rekoinese katak, ministeriu ne’ebe nia lidera, iha duni ninia problema barak, maibe ninia parte sempre halo esforsu no buka meius hodi rezolve.
“Ami sempre esforsu hodi hadia buat saida maka akontese iha Ministeriu Saude ninia laran. Nebee esplikasaun barak liu konaba funsaun publiku nian nee, so Komisaun Funsaun Publikui maka bele fo ninia esplikasaun. Maibe MS esforsu makas hodi hadia professional ema iha Ministeriu Saude laran,” deklara Ministru Nelson.
Konaba sira nebee remata eskola medicina Cuba nian, Ministru Nelson hatete katak MS prepara ona fatin ba sira. “Nebee wainhira hau ba halo vizita iha Cuba fila mai, hau mos prontu kedas buka fatin ba medicina Cuba sira nian. Tanba nee, ami mos iha Outubru 2010, halo reuniaun ho direitor hotu, sira prontu simu medicina Cuba sira iha distritu ida-idak.
Ministru Nelson mos hatete katak MS presiza osan U$26 milloens, maibe MS hetan deit orsamentu uitoan hodi uza ba transporte tula medicina Cuba sira ba distritu ida-idak.
Servisu MS nian, hatete Ministru Nelson, haree liu konaba saude, maibe konaba fali ba formasaun nee iha Ministeriu Edukasan ninia okos. Tuir Ministru Nelson, ekipamentus saude nian iha fakuldade Medicina UNTL balun menus, nebee Banku Mundial iha tempu badak  sei fo osan hodi ajuda estudante medicina sira iha UNTL, hodi sosa ekipamentus balun atu estudante sira bele halo pratika.
Konaba SISCA, Ministru Nelson mos hatete katak  nee nudar programa nebee diak, tanba involve mos estudante medicina UNTL no Medicina Cuba.
Ministru Nelson mos haktuir, durante nee Hospital iha Timor laran tomak menus duni aimoruk, hanesan iha tinan 2010 MS menus loos aimoruk, tanba ema nebee halo  konsulta iha hospital Timor laran tomak iha 2010 hamutuk 399.
“Maibe hanesan ema hotu hatene katak ita Timor to’o agora mos laiha fabrika aimoruk, tanba nee ita sei depende ba nasaun seluk. Ho nunee kadaves ita sei susar nafatin hetan aimoruk.  Aimoruk menus duni, nebee ami mos esfrosu atu halo reuniaun ho SAMES kada  fulan 6 dala ida,” hatete Ministru Nelson.
Ministru Nelson mos husu atu oinsa bele iha farmacia nebee loke durante 24 oras, tanba nee importante tebes ba populasaun sira nebee moras.
“Ida nee maka dezafiu nebee maka MS sei hasoru, nebee hau mos husu ba deputadus sira nian kumpriensaun hodi ajuda nafatin MS rezolve problema sira hanesan nee,” husu Ministru Nelson.
Deklarasaun husi Ministru Nelson, nee hetan kedas reasaun makas husi membrus deputadu sira.    Tuir Deputadu Manuel Tilman husi Bankada KOTA, bazeia ba konstituisaun RDTL, trabalador sira iha ninia direitu. Maibe, ema nebee servisu Hospital, ninia greve la hanesan ho ema sira nebee servisu iha loja.
“Nebee kuandu ema nebee servisu iha hospital halo greve tenke tuir lei tanba nee MS tenke defini wainhira staf hospital halo greve oinsa ho sira ninia servisu nebee lor-loron tenke atende pasienti,” husu deputadu Tilman.
Konba vensimentu ho salariu, Deputadu Tilman husu ba MS tenke haree didiak, tanba ema nebee professional ho mediku sira mos sira ninia salariu la hanesan ho sira seluk. Parte seluk mos ba estudante medicina UNTL nee ministeiru edukasuan mos tenke tau matan ba sira, nebee lalika husik ministeriu saude mesak.
Parte seluk mos, Deputadu Antonino Bianco husi Bankada Fretilin louva ba servisu nebe tekniku MS sira halo, tanba sira mos halo duni servisu.
“Maibe hau hakarak dehan katak ho situasaun nebee maka ministru esplika nee signifika governu ne laiha duni preparasaun hodi lori MS nee ba oinsa. Tanba iha debate orsamentu nee hau husu kedan osan hira maka tau ba ema atu trata ema nebee moras, no osan hira tau ba ema atu labele hetan moras,” deklara Deputadu Antonino.
Konaba osan hira tau ba ema labele hetan moras nee, hatete Deputadu Antonino katak nee liga ba estudante medicina Cuba nebee agora ba ona distritu maibe governu la determina fatin nebee diak hodi tau sira para bele mos atende pasienti sira iha distritu ho diak. “Nebee hau senti tratamenetu governu ida nee ba medicina sira aat liu duke governu ida uluk,” hatete Deputadu Antonino.
Nunee iha iha fatin hanesan, Deputada Teresa de Carvalho husi Bankada PD louva ba professional saude sira hotu nebee maka esforsu servisu ho diak. Nomos louva louva Ministru Saude no ninia Vice nebee ho ulun malirin rezolve problema sira nebee maka akontese iha MS laran.
Deputada Tereza mos husu ba povu TL tomak atu haksolok tanba governu nee halo ona saude gratuita, maibe komunidade mos tenke kumpriende kuandu aimoruk maka la sufsienti, tanba hanesan ema hotu hatene nasaun Timor to’o agora seidauk iha ninia fabrika aimoruk.
“Tanba nee hau hakarak husu oinsa kuandu ita nian stcok aimoruk nee tenke uza to’o tinan ida. Hau husu ba Ministru para hadia sistema nee hodi uza aimoruk nee to’o tinan ida,” husu Deputada Teresa. arm

• Tweet
• Share

---