Maibe parte seluk, ha’re ba mudansa klimatika tinan ida nee, la lori distinu diak ba populasaun, liliu atan oan sira ne’ebe hela iha area rural. Ne’ebe kada tinan sira nia moris depende liu ba produsaun aihan ne’ebe sira kuda.
Mudansa klimatika tinan nee, bele dehan lori terus no susar, lori tristi no halerik ba populasaun Timor Leste tomak. Udan boot tuun bebeik, halakon tiha tempu bailoro. Kria dezastra iha fatin-fatin, estraga dalan no ponte iha area distritu hotu-hotu, estraga hare iha natar, no aihan oioin iha to’os, inklui mos hamate animal hakiak.  Situasaun “kalohan metan” hirak nee halo populasaun tomak tristi. Ne’ebe bainhira tinan ida nee remata, ita remata ho tristisaun, i simu tinan foun mos ho kondisaun tristisaun nafatin. Tinan 2011 mai nee, ita sei hasoru problema oioin, boot liu mak problema menus aihan.
Prujemplu hanesan kondi saun area Suku Foho Ailiko, Sub Distrito Hatu’udo, to’o tinan nee remata no tama ba tinan foun, maioria povu suku ida nee sei la hetan koileta aihan ne’ebe bele halo sira kontenti. Udan tinan ida nee hamosu dezastera ba sira nia aihan iha to’os. Sira nia aihan barak mak sai dodok, sai aat, tamba udan boot demais. Sira aihan iha to’os hanesan batar, fehuk, aifarina,talas, fehuk roupa, no aihan seluk tan, udan estraga barak.
“Hau bele dehan, ba tinan ida ne’e ho tinan oin, populasaun Suku Foho Ailiko sei infrenta menus aiahn (hamlaha). Dezastera naturais ne’ebe akontese iha fulan kotuk liu ba, rezulta aihan iha natar no natar, a’at hotu. Tinan ida ne’e povu sei la hetan produsaun diak hanesan tinan-tinan,” hatete Administrador Sub Distrito Hatu’udo Cancio da Costa Xina ba STL foin lalais nee iha Hatu’udo.
Area Sub Distrito Hatu’udo, iha suku rua hanesan Foho Ailiko ho Leolima. Kada tinan povu suku rua nee moris ho aisuak no insada. Sira nia vida depende ba aihan ne’ebe mak sira kuda iha tos no natar.  Maibe tinan ida ne’e sira labele halo buat ida tamba udan estraga hotu. Ha’re ba kondisaun hirak nee, Administrador Hatu’udo husu ba goovernu persiza atende bainhira tama tinan foun, 2011.
Preokupasaun hanesan hato’o husi Manuel de Araujo (komunidade Hatu’udo). Nia dehan, tinan ida ne’e udan demais liu. Kada tinan, bainhira tama ba fulan Juinhu to’o Agustus, udan laiha (tempu bailoro), maibe tinan ida ne’e kontrariu. Bailoro laiha. Udan tuun nunka para. Estraga populasaun nia aihan iha to’os no natar.  “Iha tinan ida ne’e ita bele dehan agrikultor  iha Suku Foho Ailiko sei la hetan koileta aihan,tamba udan estragus hotu,dala ruma tinan ida ne’e ami sei hetan menus aihan,tamba ne’ ami husu ba Governu atu tau matan ou buka meus oinsa atu bele rejolve,” Manuel afirma.
Administrador  Sub Distrito Ainaro Vasco Gomes de Araujo rekonhese tinan ida ne’e povu sira sei la hetan koileta tamba sira nia aihan hetan estragus barak. Ho kondisaun nee, “Hau husu ba nai ulun sira presiza tau matan, para povu sira labele mate hamlaha,” Vasco salienta. mj1

• Tweet
• Share

---