Prezidente Parlamentu Nasional, Fernando Lasama de Araujo, konsidera trazedia ka dezastre  ne’e akontese tanba la iha seriedade servi husi Ministru Edukasaun, João Cançio Freitas,  atu kria kondisaun ne’ebe favoravel ba estudante  sira.
“Ida ne’e lamentavel tebes no hanesan kelalaian. Tanba agora besik ona fin do anu, maibe ministeriu seidauk deit sosa kareta foun atu reforsa ba UNTL. Ne’e hatudu katak la iha duni seriadade atu servi ba nasaun,” afirma Lasama ba  jurnalista sira iha PN, Sesta (29/10).
Iha Orsamentu Jeral Estadu (OJE) tinan fiskal   2010, PN aprova orsamentu hodi aloka ba Ministeriu Edukasaun, atu sosa tan kareta ba estudante UNTL Fakuldade Engenaria ho Agrikultura iha Poleteknik Hera. Politika ne’e sai preoridade tanba realidade estudante hirak ne’e infrenta ona dezastre trafiku bara-barak tanba transportes ne’ebe minimu iha UNTL.  Maibe, to’o ohin loron kareta seidauk sosa tanba prosesu aprovionamentu iha ministeriu kleur liu.
Estudante UNTL, horseik mos afirma sira nia pozisaun insatisfasaun hasoru Ministru João Cançio Freitas,  hodi halo mani
festasaun iha  uma fukun nia oin, hafoin sira nia kolega ne’ebe mate aumenta ba nain tolu, husi nain ida ne’ebe mate iha fatin akontesementu.
Akontesementu mosu wainhira estudante hirak ne’e asprovieta sae kareta anguna  ho numeru Polisia 54201, baku fila ba naruk iha area Fatuahi nian.
Estudante na’in tolu ne’ebe mate mak, Natalino Noronha semester  hat  (4) husi Distritu Bobonaro (Balibo), Carolino da Costa (semester 4) husi Distritu Manatuto (Kairui) ho  Wil Fridus (semester 6) husi Distritu Lospalos .
Mate isin hirak ne’e haruka ona ba ida-idak nia familia  hodi halo serimonia funeral. Entertantu, vitima 12 seluk sei hala’o hela tratamentu intensive iha Hospital Nasional Guido Valadares (HNGV) tanba sofre kanek todan.  
Prezidenti Lasama rasik akresenta katak situasaun ne’ebe konsidera hanesan grave, tanba tuir lolos  governu inklui fakuldade tenke kria kondisaun ne’ebe sufisiente ba estudante sira.
Lia fuan hanesan mos mai husi Xefi Komisaun F ba asuntus Saude, Edukasaun no Kultura, Vergilio Marchal hafoin hasoru malu ho reprezentante estudante UNTL iha sala komisaun PN.
“Kazu ne’e tuir los la bele akontese, tanba PN aprova aumentu tan orsamentu ba ME atu sosa kareta. Mas, situasaun ne’e tanba prosesu aprovizionamentu ne’ebe kleur demais,” argumenta Vergilio.
Nia promote ona ba estudante sira atu laventa kestaun ne’e ba iha ME atu hare solusaun ne’ebe diak. Maibe, Deputadu husi Bankada Fretilin, Joaquim Amaral, konsidera mos kazu ne’e grave, tanba falhansu ME nian.
“Ida ne’e triste tebes tanba akontese dala rua ona. Ne’e hatudu katak Ministeriu mak tarde demais trata kestaun ne’e, hodi hamate tan ema,” dehan Joaquim
Joaquim afirma, ME tenke iha responsabilidade no iha oberigasaun husu deskulpa ba familia vitima sira. Tanba, dezastre ne’e mos mai rasik husi Failansu Ministru Edukasaun nian.
Vitima hirak husi Fakuldade Engenaria ne’e kompstu husi departamentu konstrusaun sivil husi semester  rua (2) no hat (4), hamutuk nain 19; mane nain sanolu resin lima (15) no feto nain hat (4).
Xefi   Senadu  Fakuldade  Engenaria,  Romeo Verdial  fo sasin katak, estudante sira sae tuir kareta iha kampus Fakuldade Engenaria, wainhira remata tuir izame ba semester ikus nian  ka TAS.
Nia hatutan, sira sae kareta ne’ebe baku fila ho sira, tanba kondisaun mak obriga. Basaa, momentu neba kareta la iha ona, tantu sira aproveita kareta refere atu bat un iha terminal Becora.
Dezastre ne’e, tuir Romeo katak, akontese wainhira kareta ne’ebe sira sa;e soke malu ho kareta Hilux Portugal nian, ne’ebe sira nia maluk nain hat seluk konsege haksik sai husi kareta laran.
Romeo husu husu ba ME atu toma atensaun ba estudante, tanba asidenti ne’e mosu ba estudante Fakuldade Engineria dala rua ona.
Dezastre badahuluk akontese iha fulan hirak liu ba ho kareta tronto, ne’ebe konsege soke kios ida besik iha istrada ibun atru tun ba terminal Becora nian.
Iha fatin hanesan, Vise Reitor Miguel Maia dos Santos, hateten, sira senti tristi tebes ho akontesementu ne’ebe hakotu estudante nain tolu nia vida, no agora ba oin sira sei pre-para kareta bus rua ka tolu ba estudante ne’ebe mak estuda iha Hera.
Calistro Gusmaõ  nudar estudante Fakuldade Engenaria hatutan, nudar kolega senti tristi tebes ho asidenti nee, tanba halo sira nia kolega nain tolu mate, no sira seluk sei halo  hela  tratamentu intensivu iha HNGV. qdy/sin

• Tweet
• Share

---