Tuir  Xefi   Senadu  fakuldade  Engenaria, Romeu Verdial katak, kareta anguna nebee ho numeru Polisia 54201, nebee  monu iha rai naruk, iha area Fatu-Ahi, halo estudante fakuldade engenaria nain tolu mate, nain sanolu resin rua (12) kanek todan, no sei halo tratamentu iha Hospital Nasional  Guidu Valadares Dili. 
Nia hateten, akontese nee mais ou menus tuku 16.00 otl. Agguna ne’e rasik nakonu ho estudante UNTL,fakuldade engenaria, departamentu konstrusaun sivil husi semester  rua (2) no hat (4), hamutuk nain sanolu resin sia (19)mane nain sanolu resin lima (15) no feto nain hat (4), maibe ida mate fatin, no rua seluk mate iha HNGV Bidau.
Estudante sira ne’e atu fila hikas husi Hera, bainhira halao estudu hotu ona, maibe tamba kareta laiha, sira deside atu sae deit angguna nebe liu iha sira nia oin.   
Estudante  nain 3 nebee mate ho naran Natalino Noronha semester 4 husi distritu Bobonaro (Balibo), oras nee dadaun mate isin  Natalino sesta (29/10) ohin, lori ona ba Bobonaro, Carolina da Costa  semester  4, husi Distritu Manatuto (Kairui), isin mate lori hikas ona ba nia distritu, no Fridus husi distritu Lospalos semester 6, isin mate lori ona ba nia distritu, hodi halo Seremonia Vuneral.
Iha fatin hanesan Vise Reitor  Miguel Maia dos Santos, hateten, sira senti tristi tebes ho akontesementu nebeee hakotu estudante nain tolu nia vida, no ba oin sira sei prepara kareta bus rua ka tolu ba estudante nebee mak estuda iha Hera, tanba akontesementu nee ba dala rua ona.
Nune’e mos Calisto Gusmaõ  nudar estudante fakuldade engenaria haktuir katak, nudar kolega senti laran tristi tebes ho asidenti nee, tanba halo sira nia kolega nain tolu mate, no sira seluk sei halo tratamentu intensivu iha Hospital Bidau. Ho asidenti nee governu tenki  tau konsiderasaun, tanba tinan uluk mos akontese tiha ona. Jasinta Sequeira

• Tweet
• Share

---