Basa Fen Too Monu, FP Ameasa Pena Prizaun

Basa Fen Too Monu, FP Ameasa Pena Prizaun

- in Krime
1295
0
Violensiabaku

DILI- Tribunal Distrital Dili iha loron (06/12/2017), liu husi alegasaun final ba kazu OIFS, Ministeiru Publiku akuza aplika pena prizaun tinan ida, suspende tinan rua ba arguidu FPX.

Liu husi alegasaun Ministeriu Publiku haree katak, arguidu konfesa imparsialmente la nega ba faktus, no agora dadaun maske hela separadu ho lezada maibe, arguidu nafatin apoia nia oan sira ba presiza neebe sira husu.

Ho nunee, liu husi alegasaun Ministeriu Publiku aplika pena prizaun tinan 1, suspense ba tinan rua. Entertantu parte defeza husi arguidu nian, husu ba tribunal atu aplika pena neebe adekuadu. Rona tiha husi parte rua, tribunal suspende fali julgamentu ba iha loron 21 fulan Dezembru tuku 15:00 hodi rona desizaun final.

Audensia julgamentu nee, prezide husi juis singular, juis Eusebio Xavier, Ministeriu Publiku reprezenta husi prokurador Nelson Carvalho no arguidu sira hetan asistensia legal husi Defensora Publika Agustinha De Oliveira.

Tuir akuzasaun husi Ministeriu Publiku neebe tribunal lee sai katak, arguidu FPX ho lezada CMF moris hamutuk hanesan fen no laen iha tinan 2008 no iha ona hamutuk nain 3.

Iha tinan 2009, iha sira nia uma Matadoru Dili, oras la apura momentu neeba lezada moras hela, maibe arguidu haruka lezada atu foti gayung fo ba arguidu ba haris, maibe lezada lakohi tanba lezada sente fraku lao la diak, ho ida nee arguidu hirus hodi basa dala ida kona lezada nia hasan halo lezada monu tun ba rai mak arguidu nia feton no prima ba hiit lezada.

Iha tinan 2015, iha lezada nia inan no aman nia uma lezada haruka arguidu atu ba sosa matabisu maibe arguidu lakohi ba I deiretamente hodi basa lezada dala ida iha lezada nia hasan, dada lezada ba iha varanda hodi liman buti makas iha nia kakorok, rakut iha lezada nia kakorok rezulta kanek, no dudu lezada ba didin lolon maibe la konsege tanba lezada kaer metin iha arguidu nia liman.

Iha loron 27 fulan Janeiru, tinan 2017, maizumenus iha oras tuku 06h30, iha uma Tuana Laran Dili, iha tempu neeba arguidu ba hatama hela kupong SDSB iha kompania mauhoka, tanba arguidu hanesan traballador mauhoka nian atu faan kupong no bainhira hatama tiha hotu, lezada telefone ba arguidu atu fila ba uma, maibe arguidu responde katak, sei selebra hela tiu tinan.

Ho ida nee, lezada telefone ba arguidu nia inan koalia dehan, kuandu imi halo serimonia imi mesak deit, depois maka dehan feto foun maka lakohi besik ba imi ida, iha tempu neeba arguidu mos fila kedan ba uma, bainhira too iha uma mosu kedan diskusaun ida entre arguidu ho lezada, no lezada hirus hodi dehan ba arguidu foti o nia ropa hodi sai husi nee.

Arguidu tama ba iha kuartu laran, no iha kuartu laran lezada foti arguidu nia ropa sira entrega ba arguidu dehan katak, fila ba imi nia uma atu nunee imi bele lao livre, ho ida nee arguidu mos sai husi uma ba iha inan aman nia uma, maibe dadersan arguidu ba fali uma iha neeba lezada koalia nafatin ba arguidu dehan, o dansa hotu mak o fila mai, ho ida ne arguidu diretamente tuku dala ida kona iha lezada nia ulun fatuk rezulta moras.

Lezada halai ba bolu nia maun ho naran inisial SCNF hodi ba hato keiza konaba problema nee, lezada nia maun ba duni uma lezada nian no too iha uma, lezada nia maun ho arguidu diskuti malu, lezada halai ba hakuak metin arguidu atu sori mak arguidu tuku dala barak iha lezada nia ulun, isin no rentos rezulta moras no bubu iha lezada nia rentos too agora sei kafuak hela.

Konsekuensia husi arguidu nia konduta, kauza lezada sente moras iha hasan bubu iha ulun, moras iha rentos no mos moras iha isin.

Arguidu hakarak ho intensaun, hodi liman tuku iha ulun, tuku iha isin no mos tuku iha rentos ho forma sira neebe livre no konsientemente I la ignora karakter sensuravel nia konduta.

Ministeriu Publiku akuza arguidu hanesan autor material ho forma konsumada ba krime, violensia domestika ho forma ofensa ba integridade fisika simples neebe previstu no punidu tuir artigu 145 kodigu penal, lei kontra violensia domestika lei no 07/2010.

Hatan ba akuzasaun nee, arguidu deklara katak faktus balu loos, no balu lalos.

Hau laos ho intensaun atu basa nia, maibe pas momentu hau diskuti malu ho nia maun, hau mos la kontrola an tanba nee hau mos tuku iha lezada nia ulun,” dehan arguidu iha Sala Audensia Tribunal Distrital Dili.

Arguidu deklara tan, maske problema nee halo sira hela separadu, maibe arguidu nafatin tau matan ba nia oan sira nia presiza, no iha relasaun diak ho nia fen lezada, maibe husi familia lezada nian seidauk diak malu.

Alende nee, lezada mos deklara katak, problema nee mosu tiha, liu tiha loron hirak deit arguidu telefone ba lezada no sira nia relasaun amizade lao diak nafatin, no arguidu mos tau matan ba nia oan sira hodi sosa presiza neebe sira hakarak, maibe relasaun arguidu ho lezada nia familia seidauk diak.

Lezada mos deklara katak, perdua arguidu ba hahalok neebe nia halo, husu atu labele repete tan iha futuru. Terezinha De Deus

Facebook Comments

Leave a Reply

Your email address will not be published. Required fields are marked *