Analiza Ba Impaktu “Intractible Conflict Interests” Ho Sumba Programa- OJE 2020

Analiza Ba Impaktu “Intractible Conflict Interests” Ho Sumba Programa- OJE 2020

- in Opini
555
0

Husi: Badalesa

Ba programa Oitavu Governu kaduka laos ona asuntu konspirasaun ba opiniaun publiku. Programa no OJE 2020 laos ona buat “Cogito Ergo Sum”/negasaun ho mehi ou abstratu maibe sai justisa e verdade.

Demokrasia Timor-Leste sei nurak maibe iha maturidade multiplikasaun numeru mandatu governu hakat iha numeru UNO (1) to’o ho numeru NONA (9) Governu iha tinan foun 2020.  Ba demokrasia kualidade hodi servi no liberta povu husi mukit sei hakdasak rai no mantein lao ba kotuk fali; wanhira, buat demokrasia deliberativu ho dezisaun foti kartaun la-iha ona sentidu moral responsabilidade ba povu nia dezisaun deliberativu hosi votus ba membru partidu sira hetan asentu parlementaria iha uma fukun parlamentu nasional.

Votasaun deliberativa membru parlamentu nian la-fo votus maioria ba OJE 2020 iha faze ieneralidade, fo ona Greeng Light ba mandatu Oitavu Governu atu kaduka no husik ba na’I Prezidente Republika Timor-Leste hodi foti dezisaun konstitusionais bele monu ba dalan rekoligasaun hodi forma Nona Governu ou ba dalan seluk dezolve membru parlamentu hodi hakat ba lisan eleisaun antesipada ba da-ruak nudar legasia favoritu ba Na’I Prezidente atual.

Demokrasia deliberativu fo green light hodi dehan ba veteran/a sira: Ohin imi sei sai heroismu ba pensaun vitalista liu husi foti kartaun iha uma fukun parlamentu, maibe ba loron aban imi sei sai traidor ba imi nia povu”, tanba sira seidauk senti benefisiu husi ukun-rasik-an. Hodi dehan iha kanal seluk katak ba loron horseik ita sai maluk ho kolega deit, maibe banhira o la-kohi rona hau iha momentu ida ita nia konsiderasaun monu ba politika kotoran. Tanba, naturalmente politika ne’e kotor (foer), tenik prespektiva husi Sr. Abel Larishina. Dinamika dezisaun politika ba impase politika nasional ohin loron ho kondisaun foer, tanba, Na’I Prezidente budu situasaun ho naran buka dialogu ou opiniaun konsensus iha Aitarak laran. Iha Aitarak laran mak utilia aitarak hodi buka consensus sei la-hetan solusaun monu ba formasaun governu inklusiva, tanba, markasaun lideransa foin lais iha Aitarak Laran ho maioria figura lideransa aitarak partidu ida nian.

Nune’e, legasia politika kotoran sempre domina iha demokrasia deliberativa Timor-Leste no hahoris ona legasia demokrasia ho poder informal mak regula, dezolve membru parlamentu, Eleisaun Antesipada no multiplika numerikal ba Nona (9) Governu….Nona ida ne’e sei determina husi na’I prezidente atual iha tempu besik, iha tinan 2020.

Artigu ida ne’e sei dezenvolve tuir issu trend. Ita halisuk hamutuk kona-ba devolvimentu konspirasaun destinu Oitavu Governu (G8) ou ho pesamentu seluk dehan “Green lights” ba Na’I prezidente atu foti dezisaun konstitusionais hodi hamosu Nona Governu ho ninia Programa-Orsamentu OJE 2020; iha mos “Green Door” ba Mandatu Oitavu Governu atu husik hela kargu governasaun, no oinsa hetan markasaun legasia politika kotor sai dezafiu ba futuru relasional entre veteranu/a sira nudar modelu ba kolega deit ou sai modelu belun diak ba jerasaun foun.

Ba jerasaun foun kompriende ona politika kotor iha relasaun moris kolega deit no sai belun diak iha istoria/legasia janela konspirasaun Green Lights and Green Doors, hodi sobu unidade lideransa nasional no ba moris povu sei depende deit mina no gas no sei la-liberta husi kiak no mukit, sai hino lideransa nasional sira nian atu promote ba povu iha tempu promesa kampana politika eleitoral. Artigu ne’e intende atu analiza klean ba asuntu hirak sirkula ho trend opiniaun publika, iha pontus rua, mak hanesan tuir mai ne’e:

Oitavu Governu Sofre ba Konspirasaun Politika Green Lights no Green Doors

Oitavu Governu (G8) sofre tebes wanhira inisia ninia governasaun ho roda makina tolu ne’ebe hakbi’it lao ba tinan ida nia laran. Governa ho makina roda tolu implika ba membru governante balun tenki lori pasta interinu ba ministeriu seluk ho dual funsaun; nune’e, ba governante refere infrenta inkapasidade ba ezekusaun no kontrolu adedu sira ho efikasia no akuntabel; ba nia infrenta mos dependensia ba asesoria sira maibe ba pesoal asesoria sira la-asegura no la-halao orientasaun hirarkia, maibe ba sira mak eziji deit diretu benefisiu salarial vaganza duke halo esforsu ba atinjimentu rezultadu espetativa servi povu..

Nune’e, G8 akumula konspirasaun politika foer Green Lights – Green Doors (lampu hijau – Pintu hijau) wanhira pakote roda tolu sai defisiensia iha tinan ida nia laran. Governu nia planu ba OJE 2020 bo’ot liu no ninia alokasaun orsamentu la-tuir prosedural kategorizasaun (ba asesoria sira foin aprende) hanesan “Hau Ezisti foin aprende, foin hatene, no simu tiha salariu foin servisu. G8 mos iha esforsu hodi aumenta volume imprestimu no la-iha politika diak hodi kria kampu servisu no redus taxa ba investedor sira, nune’e, parte terseria oposizaun ba G8 mak kritika no foti referensia husi seitor universitariu sira ne’ebe produs joven granduandu barak la-hetan servisu ho sira nia diploma S1, S2, S3-S4.

Moris povu aileba hetan derota ba krezimentu ekonomia familia wanhira sira nia rendementu ordinariu menus ba sustentabilidade familia nia vida lor-loron durante tinan tolu nia laran. Fenomena malnutrisaun sei aumenta iha la-barik timoranan sira, nudar jerasaun foun ba nasaun ida ne’e. Nune’e, ita hahu tama lampu hijau no odamatan hijau ba modelu lideransa ne’ebe iha integridade, justu no demokratiku ba jerasaun foun timoranan.

Prezidente RDTL Atual Halimar Konnspirasaun, Kria Kondisaun Impase Politika durante Mandatu Tinan Tolu

Nai Prezidente atual hetan apoia maximu husi maun bo’ot “Xanana” iha periudu eleisaun presidensial. Rezultadu eleisaun mosu ho segundu ronde foin hamanan eleitadu ida sai presidente RDTL ba periudu ohin loron. Ohin loron prezidente RDTL atual infrenta konspirasaun promesa solusaun politika inserteza ba povu ne’ebe maun bo’ot husu ba hodi fo votus ba nia. Kondisaun konspirasaun refere dehan katak prezidente atual hetan pasta prezidente rua: ida, nudar prezidente Partidu, no ba ida saseluk nudar prezidente RDTL II. Kargu ba prezidente ruak ne’e, sai indikador ba interese “Intractable Conflict” durante Nai prezidente nia mandatu ba tinan lima. Iha mandatu ida ne’e mosu retorika “komando informal” kaer volante governasaun. Ba komando informal ne’e refere ba se? Ba resposta bele hetan kedan iha ida be koalia sai ba publiku ne’e.

Dezisaun Nai Prezidente ba asuntu nasionais liu husi poder konstitusional dezolve parlamentu dahuluk, veta iha toma pose ba membru governu da-walu nian, halo veta ba lei petroliferu, no promove konspirasaun domina poder informal influensia dezisaun sira, no promove tan dezisaun ultimo rekursu ba impase politika “Eleisaun Antesipada ba da-ruak. Nune’e, ba artigu nain re-afirma katak nai prezidente kria ona kondisaun ida atu monu ba dezisaun interese partidaria iha grande inkluzaun forma governasaun tuir mai; tanba, Na’I prezidente ida ne’e nakfila ona lia ho unanimo ho kamrada Sekjen katak “sei la-akontese tan eleisaun antesipada”.

Artigu ne’e, hakarak salienta liu tan katak Demokrasia Eleisaun Antesipada la-eduka exersisu povu nia liberdade tomak atu tuir iha eleisaun sekuensial refere. Ho lian seluk, Lideransa Timor-anan nega liberdade povu ne’ebe fo votus ba sira, tanba promesa falsa iha hadiak kondisaun moris  sai nil, durante mandatu Nai Prezidente ida ne’e.

Konkluzaun

Presidente RDTL Atual sai Promotor exelensia Eleisaun Antesipada. Legasia eleisaun antesipada so mosu famousu deit iha mandatu Nai Prezidente atual. Na’I Prezidente hanoin lisuk katak ne’e dalan uniku ba rezolusaun hari’I dame no estabilidade. Nai Prezidente molok foti dezisaun ruma sempre ho modus operandi konsultasaun publiku hodi kria espasu ba prevalensia konspirasaun politika inimigavel iha rai laran. Ita horas ne’e, ba jerasaun foun  lakon tebes ba figura Aman ba moris unidade nasional.

Ba eleisaun antesipada sai kondisaun ba konspirasaun governasaun inklusivu, sai matadalan uniku ba solusaun impase politika. Los duni ba maun sira ne’ebe hetan votus minoria no hetan asentu mihis iha palku vota parlamentaria sei hetan konsolasaun husi impase politika; maibe, ba povu nia votus laos dirije ba formasaun governu grande inklusiva hodi promove demokrasia tabela malu nian, fahe kadeira ba malu, no la-realiza nafatin ita bo’ot sira nia promesa kampana eleitoral.

Ikus liu, ita hotu senti horas ne’e moris ho ambiente dinamika poltika foer. Ita mesak jersaun foun apelu ba malu atu helik ho kompremetidu atu la-hola espelu lideransa hirak ne’ebe hakarak politika para goza moris iha partidu ho promesa falsa no bali politika para servi povu ho sasukat moris leal, kredibel, dignu molok foti dezisaun ne’ebe justu no demokratiku iha prosesu toma formasaun governu da nonu (9) iha tempu besik. Ba ultimo dezisaun iha prerogatoriu Nai Prezidente nia liman, Aitarak laran. Ba ilas herois nasional, ba modelu lideransa tanen a’as interese nasaun-estadu-povu konfigura iha “Xanana’ mak ba jerasaun foun sempre agradese husi fuan hakraik-an no momos.

Makhakerek Dosente UNPAZ

Kontaktu: ximxavier@gmail.com/77418344

Komentariu

Facebook Comments

Leave a Reply

Your email address will not be published. Required fields are marked *