AMP Oecusse Ezije Taur Hasai Alkatiri

AMP Oecusse Ezije Taur Hasai Alkatiri

- in Politics
143
0
zeesm_204

AMBENO – Kuadros militantes no simpatizantes Aliansa Mudansa ba Progresu (AMP), Ambeno Oecusse hamutuk ho aliadu sira ezije Primeiru Ministru Taur Matan Ruak, atu hasai Prezidenti Autoridade (PA), RAEOA- ZEESM TL Dr. Mari Alkatiri husi ninia kargu.

Razaun sira husu Dr. Mari Alkatiri husik nia kargu atu submete ba prosesu judisiariu ba rezolusaun Parlamentu Nasional (PN) no. 18/2019 kona ba rekomendasaun Camara de kontas husi relatoriu auditoria financeiru ba RAEOA-ZEESM – TL hahu husi tinan 2016, 2017 no 2018 nian.

Aliende nee mos sira rekomenda ba Ministeriu Publiku atu loke investigasaun ba PA RAEAO – ZEESM, TL ba Roo Haksolok, no mos husu ba Primeiru Ministru atu  suspende kargu PA RAEOA hodi hili fali kargu foun. Sira fo ultimatum nee ho durasaun loron 15 maka sei laiha rezultdu sei mobiliza povo Oecusse hodi halao asaun pasifiku

Ami militantes kuadros no estrutura AMP Rejiaun Oecusse kompostu husi partidu CNRT, PLP, KHUNTO, no Aliadu Frente Demokratiku Nasional (FDN), nomos PEP, ami hakarak hatoo ami nia ezijensia liu husi media nasional, Radio, Televizaun, Mediak Cetak, I mos Radio Komunidade. Relasiona ho rezolusaun PN no. 18/2019 iha loron 11 de marsu 2019 kona ba rekomendasaun Camara de kontas husi relatoriu auditoria financeiro ba RAEOA-ZEESM TL,” dehan koordenador AMP RAEOA Firmindo Taeki ho estrutura tomak liu husi komunikadu imprensa neebe halao iha cede AMP bairo Numbei, Oecusse, Tersa (26/3/2019).

Nia hatutan, militantes AMP fo apoiu masimu ba rezolusaun PN no. 18/2019 hodi kontinua halo auditoria financeiro ba mega projetu ZEESM hahu husu tinan 2016, 2017 no 2018 nian.

Ami hatoo apresiasaun nee ba instituisaun Camara de Contas neebe halao ninia knar ho diak tuir konstituisaun RDTL haruka hodi halo auditoria ba osan povo nian iha autoridade RAEOA. Ami mos apresia i louva deputados sira iha PN nudar fiscalizador politika ba actos guvernu no estrutura AMP kompostu husi partidu CNRT, PLP, KHUNTO, UDT/FM, FDN no PEP, husu ba guvernu sentral no ministerio publiku procurador jeral da republika atu kumpri rezolusaun PN nian no. 18/2019 nian,” Nia afirma

Ami reprezenta povo maioria Oecusse, Ambeno husu ba PA hodi klarifika ba publiku liu-liu povo Atoni Oecusse kona ba Ro Ferry Haksolok ninia paradeiru iha neebe los, tamba saida mak Ro nee too agora sedauk too Oecusse Timor leste,” dehan portavos AMP nee.

Liu husi komunikadu imprensa nee sira rekomenda ba Ministeriu Publiku atu loke investigasaun lideransa autoridade RAEOA ba financeiru ZEESM nian, “Ami povo Oecusse rekomenda ba ministerio publiku atu loke investigasaun ba presidenti autoridade RAEAO- ZEESM TL ba Ro haksolok, ami husu ba Dr. Jose Ximenes procurador da republika hodi investiga Dr. Mari Alkatiri ho ninia secretario rejionais sira kona ba residensia Autoridade neebe harii iha Fulolo, aldeia Sanane, Suku Costa, Postu Administrativu Pante Makasar, Oecusse neebe lori osan povo nian hadau povo kbiit laek nia rai hodi halo uma residensia, ikus mai halo deliberasaun hodi sai aset privado. Hahalok ida nee abuju de poder nudar krime peculato de uza konsidera hanesan korupsaun”. Dehan reprezentate kuadros Militante AMP Oecusse

Ami husu ba Primeiru Ministru VIII Guvernu Konstitusional atu hola desizaun imediata hodi suspende Dr. Mari Alkatiri husi kargu Presidenti Autoridade RAEOA no ZEESM TL tamba Ukun Mari Alkatiri Otoriter no larespeitu povo ninia propriedade hanesan rai, uma no ai horis neebe afeita husi mega projetu ZEESM no halo povo atoni Oecusse sai fali bainaka iha nia rai rasik”. Tenik nia

Tamba Orsamentu neebe guvernu sentral aloka mai atu halo dezenvolvimentu iha Oecusse maibe iha implemetasaun autoridade ho nia estrutura sira halo privatiza, partidariza no familiariza hodi benefisia ba sira ho sira nia partidu FRETILIN.

Tamba nee Estrutura AMP rejiaun, postu, sucos, aldeias fiar metin no kaer nafatin ba komprimisio lideransa AMP nian neebe halo ho atoni Oecusse katak AMP manan sei hasai Dr. Mari Alkatiri ho Arsenio Paixao Bano husi administrasaun hodi la ukun iha RAEOA, nomos Dr. Mari Alkatiri rasik deklara ba nia militantes partidu FRETILIN iha salaun parokia Oecusse Numebi katak Votus FRETILIN sei la too 20 mil mak sei la sama tan ain iha Oecusse”. nia dehan

Ami husu ba sua selensia Primeiru ministru Taur Matan Ruak hodi nomeia ona Presidenti Autoridade foun ba rejiaun Oecusse Ambeno. Karik laiha rezulatdu baa mi nia ezijensia mak ami sei mobiliza militantes hotu hodi halo manifestasaun boot hasoru Dr. Mari Alkatiri ho nia estrutura tomak.

Liga ho ejijensia ba mandatu autoridade Oecusse nian nee antes nee PA RAEOA- ZEESM TL Dr. Mari Alkatiri hateten ba  nia mandate nudar presidenti RAEOA no ZEESM nia hein desizaun husi xefe guvernu no xefe estadu.

Iha oportunidade nee, Vice Koordenador AMP RAEOA, Martinho Abani Elu hateten, sei la iha rezultadu husi data ohin durante loron 15 nia laran maka estrutura AMP RAEOA hamutuk ho povu Oecusse husi Aldeia, Suku too Postu Administrativu, sei mobiliza masa hodi halao asaun pasifiku.

Entretantu, partisipa iha komunikadu imprensa nee mai husi estrutura no povo husi aldeia suku, postu administrativu 4 iha rejiaun Oecusse no reponsabel ba ezijensia nee maka mai husi estrutura AMP RAEOA kompostu husi Koordenador AMP Firmindo Taeki actual koordenador Partidu CNRT Rejiaun Oecusse, Vice I Koordenador AMP Martinho Abani Elu actual koordenador PLP Rejiaun Oecusse, vice II Koordenador AMP Pedro D.C da Silva Aktual koordenador Khunto rejiaun Oecusse, aliado FDN rejiaun Oecusse Fransisco Sarmento, aliadu PEP Xavier da Costa. Abilio Elo Nini

Komentariu

Facebook Comments

Leave a Reply

Your email address will not be published. Required fields are marked *