Afonso Carmona ‘Leikiki’

Afonso Carmona ‘Leikiki’

- in Perfil
8
0
image002 (3)

Kapital Dili sai area sentru ba barak. Barak mai husi munisipiu 12, hela iha Dili. Ida-idak halao ninia servisu tuir profesaun, inklui Atabae oan ida nee. Naran kompletu, Afonso Carmona ‘Leikiki’, agora dadaun halao knar nudar juiz, no hetan konfiansa asumi kargu nudar Jiz Administrador Tribunal Distrital Dili (TDD).

Afonso Carmona moris iha Atabae, Postu Administrativu Atabae, dia 21 Maio tinan 1964. Oan dobeng husi Belchior Carmona (matebian) no Anita Bui-Pelo Pereira (matebian). Inan aman moris depende ba agrikultura, hakiak karau barak, no ajuda ema seluk halo natar. Sira moris hamahon aan iha uma lisan Ota Gelo.

Desde halao knar juiz, Carmona kaer metin ba ninia prinsipiu: “Lakohi Falta Prosesu Julgamentu”. Uluk sei eskola mos, nia lakohi falta, maske ba eskola tarde, nia tenta tama nafatin ba aula laran. Se falta, nia sente siensia neebe nia estuda, hakiduk ba kotuk. Tanba nee, durante eskola iha nivel SLTP, SLTA, no universidade, ninia mehi mak estuda deit.

Nudar agrikultor nia oan,  ninia inan aman sempre haruka nia tenke estuda. Inan aman obriga nia tenke estuda, tanba nia maun sira lakohi eskola. So nia deit mak eskola, entaun inan aman obriga tenke estuda.

Nia asesu ba eskola, hahu kedan husi eskola pre-primaria, sempre hasoru difikuldade konaba osan atu selu eskola. Defikuldade nee nia hasoru too nivel universidade. Tanba problema ida nee, nia lamehi atu kontinua estudu ba universidade. Maibe iha tempu hirak liuba, Carmona ho ninia kolega nain 5 neebe sira eskola hamutuk iha eskola sekundaria  Maliana, sei iha tempu Indonezia, tuir selesaun iha Dili atu ba eskola iha railiur. Carmona mos tuir sira mai Dili.

Momentu mai Dili, dehan Carmona, ema nakonu ona iha bus laran. Sofer bus lakohi tula nia tanba tur fatin nakonu ona. Maibe ninia kolega sira deskuti malu ho motorista para tenke tula nia mai Dili. Entaun, nia sae bus, tur iha bagasi sasan, husi Maliana too mai Dili.

Too tiha Dili, nia tuir selesaun ba iha Fakuldade Ekonomia  maibe lapassa. Nia pasa fali  ba Fakuldade Direitu. Ninia kolega sira neebe hakarak halao estudu iha area tekniku,  sira mos passa fali ba area mediku nian. Depois ida nee, sira ba hasoru Governador Timor Timur, Ir. Mario Viegas Carrascalao (matebian) hodi informa sira nia hakarak atu ba eskola iha indonezia tuir fakuldade neebe sira hili ona.

Ir. Mario Viegas Carrascalao hatan ba sira: “Se imi hakarak eskola tuir imi nia hakarak, sei laselu imi nia eskola. Maibe eskola ba interese rai doben Timor Leste, sei selu imi nia eskola”.

Liafuan Mario Viegas nee enkoraja ona nia. Nia sente iha forsa no vontade atu ba halao estudu maske iha difikuldade ba osan. Entaun liafuan Mario nia nee, Carmona Foti Fakuldade de Direitu. Ho nee, nia halao estudu iha Universidade Udayana Bali no iha inskrisaun nia kolega ida maka fo osan. Ninia kolega nee naran: Joao Henrique de Carvalho, agora halao mos knar nudar Defensor Publiku.

Remata tiha ninia lisensitura, Carmona fila fali mai Timor Leste. Tama faze ukun aan, iha tempu governasaun UNTAET, iha fulan Fevereru 2000, nia tuir selesaun ba kareira juiz,  maibe rezultadu fosai, nia halao knar nudar prokurador. Iha dia 12 de Marcu 2000, Carmona ba halao servisu iha Oecusse.

Ikus mai, Carmona konklui katak, ninia mehi komplikadu tebes. Mais importante maka, nia tuir duni orientasaun inan aman, katak eskola tenke estuda no reza, tenke hanoin diak ba ema hotu.

                                         ***

Edukasaun formal, nia hahu eskola primaria iha Atabae, remata tinan 1981, eskola pre-sekundaria Maliana, remata tinan 1984, eskola sekundaria Maliana, remata tinan 1987, universidade remata iha Universidade Udayana Bali, Indonezia, remata tinan 1993.

Konaba esperiensia servisu, Carmona sai funsionariu iha area planeamentu Timor Leste nian. Sai Xefi Seksaun Dezenvolvimentu Suku iha Eskritoriu Dezenvolvimentu Suku nian iha Munisipiu Bobonaro, tinan 1996. Xefi Rekursu Humanus e Administrasaun Munisipiu Bobonaro Bobonaro iha tinan 1997.

Xefi Prokurador Distrital de Oecuse, iha dia 12 de Marcu 2000 ate 2004. Juiz Administrador iha Tribunal Distrital Baucau, husi tinan 2011 too 12 Setembru 2019. Agora Juiz Administrador Tribunal Distrital Dili ate tinan 2023. Juiz de deireitu 3 klasse,  desde 18 Maio 2009. Komisariu Suplente CNE desde 2013 ate 15 Setembru 2018, no komisariu CNE desde 16 Setembru ate 2021. Prezidente ekipa tribunal Rekursu nian, ba kordenasuan aktividade mai distritu ho USAID desde 2014 ate 2017.

Nia esplika konaba nia partesipasaun iha luta, baze de apoiu lima iha ailaran. Desteru husi suku Atabae ba iha suku Rairobo iha tinan 1976 too 1980. Envolve iha rezistensia desde 1981. Membru RENETIL 1988 ho kodigu Leiquiqui halo juramentu no testamuna maka kompaneru Vitor Tavares no Joao Gama. Hetan detensaun husi Militar iha parte portu Dili iha fulan Junu 1991.

Afonso konta tuir nia frekuensia ba kursu no formasaun professional katak, kursu lideransa ADUMULA iha Dili fulan tolu iha tinan 1997 ho durasaun 600h00. Tuir trenu siensia militar nian iha tinan 1995 durante fulan ida. Kursu direitu iha Australia Darwin, komesa 29/01/2000 ate 09/02/2000. Kursu no treinu ba advokasia Timor Leste nian, iha Universidade Indonesia Komesa 05/09/2000 ate 05/10/2000. Trenu konaba materia juvinil menor justisa, komesa 31/10/2000 ate 01/11/2000 iha Dili.  Kursu direitu too iha 10/11/2001 iha Dili.  Trenu direitu do trabalhu too iha 31/10/2002. Kursu direitu IDLO 2003 ate 2004 iha Dili.  Preparasaun estajiu sentru formasaun judisiariu 2004, husi fulan Setembru Outubru, Novembro 2004. Formasaun ba kadeira profesiona majistradu defensoria publiku iha sentru formasaun juridiku,  komesa 31 Janero 2006 ate 18/05/2009 no formasaun komplementar sempre realiza kada tinan.  Formasaun komplementar ka estajiu iha Portugal 05/01/2011 ate 05/07/2011. Aktividade seluk partesipa konferensia iha India, Bangkok,  Indonesia iha tinan 2016, no observador ba elisaun internasional iha Indonesia iha tinan 2019.

Ikus liu Carmona hakarak konklui katak,  hanesan juiz, iha sala julgamentu laran sempre halo ema hamnasa,  no nia oin midar ba ema hotu. Nia mos sempre halo arguidu no lezadu sira hadame malu,  iha krime neebe nia natureza semi publiku, tanba liu husi nia advertensia, neebe diak no kapas.

Carmona sempre atende ema neebe maka ba dere nia odamatan, hanesan ofisial kolega juiz seluk, inklui media sira neebe presija nia atu entrevista. Maske hela deit oras balu atu tama julgamentu,  maibe nia sei atende nafatin pregunta husi media sira nian,  hatudu katak nia mos kopera ho media hodi hatoo informasaun. Isin metan morena,  fuuk komesa mutin ona,  hamrik la altura liu mas pas pas,  sempre uja olku iha matan, sempre hamnasa, sempre hase dor,  ida nee maka karakterista husi Atabae ona nee. Terezinha de Deus

Komentariu

Facebook Comments

Leave a Reply

Your email address will not be published. Required fields are marked *