Abelino Tixeira Maia Soares

Abelino Tixeira Maia Soares

- in Perfil
2451
0
PPPPPPFFFIIIIILLLLLL

BA funsionariu tomak iha Tribunal Distrital Dili (TTD), Abelino Tixeira Maia Soares, laos foun, tanba  Ermera oan nee mak sai nuudar tradutor no interpretador. Uluk nia sei kiik iha mehi hakarak sai hanesan forsas armadas F-FDTL, maibe la konsege alkansa nia mehi nee, tuir saida mak nia hakarak ka cita cita sei kiik. Ikus mai sai fali hanesan tradutor no interpretador.

Aifuan domin husi Abelino Tixeira Bras no Ines Tixeira Maia, moris iha Ermera, fulan 12 Agostu 1985. Nia forma ona uma kain ho Anita Martins husi Munisipiu Lautem. Agora dadaun iha ona oan nain rua (2).

Hahu halao nia estudu iha Eskola Primaria Nunutali Ermera no remata iha tinan 1998. Kontinua Eskola Pre Sekundaria iha Eskola 10 De Abril Gleno husi tinan 2001, remata iha tinan 2003. Kontinua Eskola Sekundaria Nino Conis Santana husi tinan  2004 no remata iha 2006. Durante halo estudu iha eskola sekundario, nia nunka husik tempu livre, hodi halimar, maibe aproveita mos tempu tuir kursu intensivu lingua portuguesa, husi nivel 1 too 3, hodi remata duni nia kursu sira nee, ho sertifikadu neebe iha.

Bainhira remata eskola no kursu neebe tuir ona, iha tinan 2008 konkore ba iha UNTL hodi hili departementu lingua portuguesa. Maibe bainhira tuir teste, valor la too kriteria UNTL nian no universidade deside, atu sira neebe la liu, atu tuir fali kursu ida hanaran ano propeudetico tinan ida, ba lingua portugues iha Instituto Camoes.

Remata tiha kursu neebe iha, no hetan sertifikadu atu ba tama iha departementu lingua portugues, maibe  sei tuir tan teste, no iha failansu uitoan, labele liu atu tama iha departementu nee. Maibe, reitor deside sira atu transfere ba iha departementu seluk, hanesan komunikasaun social no formasaun dos professores.

Iha momentu neeba, koloka ba iha departementu  komunikasaun sosial neebe hanesan departementu  foun iha UNTL. Maske la hetan fatin, atu halao estudu iha departementu lingua portugues, maibe esforsu halao estudu iha departementu komunikasaun sosial, maibe la determina estudu too deit iha semester lima no la konsege remata.

Ho konhesementu neebe iha, ba lingua portuguesa, bainhira Embaixada Portuguesa loke kursu ida kona ba edukadores nao formais ba lingua portuguesa, aproveita oportunidade nee ba tuir no orariu lao hanesan, nunee deside husik hela eskola hodi aproveita ba iha kursu neebe halao durante tinan 1 fulan 6 iha tinan 2009 nia laran.

Bainhira remata tiha kursu nee, iha hanoin atu ba kontinua fali eskola iha universidade, maibe tribunal loke vaga presiza tradutor iha fiar an atu konkore, no konsege pasa duni iha tinan 2010, neebe sai hanesan kontratadu. Iha tinan 2011 Tribunal haruka sira tuir formasaun kona ba tradutor no interpretador iha formasaun juridika too iha 2012.  Iha 2013 Tribunal loke ona vaga ba publiku katak, atu tama iha kriteria hanesan funsionario publiku nunee em termus konkursu publiku.

Antes halo servisu hanesan funsionario tradutor iha tribunal, uluk mos halao servisu iha eleisaun 2007 ba 2012 sai hanesan brigada ba iha poling staff  iha Suku Raiheu, Ermera. Bainhira tuir kursu edukadores nao formais, halao mos atividade ho labarik sira no hanorin lingua portuguesa no esplika lalaok neebe diak atu aprende ba labarik sira.

Hanesan funsionario ida, esforsu ba servisu tomak neebe iha, tenta ho esforsu masimu atu halao nafatin knar nee tuir saida mak estabelese ona iha lei no hatur ona iha regras instituisaun nian. Servisu hamutuk ho kolega sira, atu bele fahe esperiensia ba malu, atu bele aprende hamutuk, atu servisu nee lao ba oin ho susesu.

Knar hanesan tradutor no interpretador ema babain hare hanesan buat neebe la vale, maibe knar nee atu hare didiak nia mos importante hotu iha instituisaun ida nia laran. Sai tradutor no interpretador nee, laos fasil. Tradutor nia knar atu tradus deit dokumentus, bele liu husi lian neebe hatene ba lian seluk, maibe interpretador mak ida neebe verbal, no ema ida koalia ita koalia tuir deit saida mak nia kolia.

Servisu neebe hau iha, hau sente vantazen boot ba hau mak liu liu iha instituisaun neebe servisu, ho knar neebe sai hanesan tradutor no interpretador hau sente hanesan hau aprende buat barak, liu liu liafuan portuges barak neebe hau la aprende hau mai iha nee hetan tan termus barak, ”esplika Abelino ba STL iha TDD,  Tersa (22/08/2017).

Ba nia, desvantazen mak, dalaruma la iha preparasaun diak sente grogi iha audensia laran. Maibe esforsu nafatin, atu ultrapasa dezafiu sira nee.

Tanba nee, lia menon ba juventude liu liu funsinario sira servisu ho hakarak, no servisu ho laran ho esforsu hodi servisu nee lao ho susesu no ho efisiensia no efikasia. Nasaun Timor Leste mos presiza ema matenek, jerasaun foun estuda makas atu tane rai ida nee, ba interese povu nian, no interese ema hotu nian. Terezinha De Deus.

 

Facebook Comments

Leave a Reply

Your email address will not be published. Required fields are marked *