2020 Tribunal Zero Toleransia

2020 Tribunal Zero Toleransia

- in Krime
24
0
download (1)

Editora: Domingas Gomes

DILI- Relasiona ho krime violensia domestika nia numeru neebe aas, Tribunal Distrital Dili (TDD) sei foti desizaun zero toleransia no aplika pena prizaun.

Lia hirak nee hatoo husi Juiz Administrador TDD, Afonso Carmona ba STL iha TDD Segunda, (06/01/2020).

Ba kazu sira 2020 neebe akontese tribunal tenta atu hasoru ho programa ida naran zero toleransia, signifika katak se maka halo krime iha 2020 violensia domestika, iha posibilidade tribunal aplika pena efetiva, se maka hakarak pena suspensaun halo rekursu ba iha tribunal rekursu hodi muda, dehan Afonso.

Nia hatutan, tribunal distrital nian hanoin seluk ona, maske iha tinan hirak liu ba aplika ona medida seluk maibe balu halo nafatin, tanba nee agora tenke aplika lei neebe forte ho sansaun neebe forte, atu redus krime nee.

Nia esplika tan, maske arguidu balu foin halo primera vez iha tinan 200 too mai iha tinan 2019 tribunal sei hanoin, maibe iha tinan 2020 nee tribunal la tolera maske foin primera vez, tanba tribunal sei iha nia analiza barak.

Nunee krime sira neebe aplika nia motivasaun rua, atu ema nee labele halo tan, no sosiedade neebe hatene hahalok nee krime labele halo tan, maibe agora ema balu rona tiha ona maibe halo nafatin, tanba nee tribunal tenke hanoin atu halo mudansa iha desizaun.

Carmona dehan, aplika pena prizaun efetiva nee, la bazeia ba lei maibe tribunal haree fali iha tinan hirak liu ba aplika ona medida suspensaun atu ema haree labele halo tan krime, maibe ema kontinua halo, iha hanoin atu koko tribunal, tanba nee aplika pena neebe efetiva.

Tanba nee hahu kedan husi fulan Fevereru sira neebe komete krime sei la iha zero toleransia ba sira, bainhira koko atu halimar ho lei. Atu bele redus kazu violensia neebe agora dadaun ho numeru neebe boot.

Antes nee eis Juiz Administrador TDD, Jose Maria hateten, tribunal kada loron julga kazu neebe barak liu maka violensia domestika.

Tribunal kada loron julga kazu violensia barak liu, komapara ho kazu sira seluk, dehan nia.

Nia hatete, motivu husi kazu neebe tan facebook, balu tan osan, balu tan amante, no balu tanba labarik. No desizaun neebe aplika, sira tetu haree mos ba iha arguidu nia konfesaun.

Tuir observasaun STL nian, durante nee tribunal julga kazu violensia barak liu kompara ho kazu seluk. No kazu neebe tribunal julga, barak liu maka aplika pena suspensaun deit, no pena multa.

No balu neebe tribunal aplika pena prizaun, ba iha violensia domestika sira neebe ho forma maustratus ba konjunje.* Terezinha De Deus

 

Komentariu

Facebook Comments

Leave a Reply

Your email address will not be published. Required fields are marked *